ಕಳಸ: ಇಲ್ಲಿನ ಗಂಟೆಮಕ್ಕಿ ಪ್ರದೇಶದಿಂದ ಗಿರಿಜನ ವೃದ್ಧೆಯೊಬ್ಬರನ್ನು ಭಾನುವಾರ ಸ್ಥಳೀಯರು ಬಡಿಗೆಗೆ ಕಟ್ಟಿ ಹೊತ್ತುಕೊಂಡು ಬಂದು ಆಸ್ಪತ್ರೆಗೆ ಸೇರಿಸಿದರು.
86 ವರ್ಷದ ವೃದ್ಧೆ ವೆಂಕಮ್ಮ ಅನಾರೋಗ್ಯ ಬಾಧಿತರಾಗಿದ್ದು, ಅವರನ್ನು ತುರ್ತು ಚಿಕಿತ್ಸೆಗೆ ಆಸ್ಪತ್ರೆಗೆ ಕರೆದೊಯ್ಯಬೇಕಾಯಿತು. ಆದರೆ, ಈ ವೃದ್ಧೆಯ ಮನೆ ತಲುಪಲು ರಸ್ತೆ ಇಲ್ಲದ ಕಾರಣ ಅವರ ಬಂಧುಗಳು ಜೋಳಿಗೆಯಲ್ಲಿ ಮಲಗಿಸಿ ಮರದ ಬಡಿಗೆಗೆ ಕಟ್ಟಿ ಹೊತ್ತುಕೊಂಡು ಬರಬೇಕಾಯಿತು.
ಮೊದಲೇ ಆನಾರೋಗ್ಯದಿಂದ ಬಳಲಿದ್ದ ದಿ.ವೀರಪ್ಪ ಗೌಡ ಅವರ ಪತ್ನಿ ವೆಂಕಮ್ಮ ಈ ಯಾತ್ರೆಯಿಂದ ಮತ್ತಷ್ಟು ನೋವು ಅನುಭವಿಸಿದರು. ತನ್ನ ಮನೆ ಸಂಪರ್ಕಕ್ಕೆ ರಸ್ತೆ ಸೌಲಭ್ಯ ಬೇಕು ಎಂದು ಈ ವೃದ್ಧೆ ಹಲವಾರು ಬಾರಿ ಜಿಲ್ಲಾಧಿಕಾರಿಯಿಂದ ಹಿಡಿದು ಕಂದಾಯ ಸಚಿವರ ವರೆಗೆ ಅರ್ಜಿ ಸಲ್ಲಿಸಿದ್ದರೂ ಸ್ಪಂದನೆ ಸಿಕ್ಕಿಲ್ಲ ಎಂದು ಸ್ಥಳೀಯರು ದೂರಿದ್ದಾರೆ.
