ಮೈ ಜುಮ್ಮೆನಿಸಿದ 4*4 ಆಫ್ ರೋಡ್ ರ್‍ಯಾಲಿ

ಕೊಪ್ಪ: ಇ ಲ್ಲಿನ ಸ್ಪೋರ್ಟ್ಸ್ ಕ್ಲಬ್ ವತಿಯಿಂದ 8ನೇ ವರ್ಷದ ‘ಮಲ್ನಾಡ್ ಇಕೊ ಡ್ರೈವ್ 2025’ 4*4 ಆಫ್ ರೋಡ್ ರ್ಯಾಲಿ ನೋಡುಗರ ಮೈ ಜುಮ್ಮೆನಿಸಿತು.

. ತಾಲ್ಲೂಕಿನ ಹಿರೇಕೊಡಿಗೆ ಗ್ರಾಮದ ಲಾಲ್ ಬಹದ್ದೂರ್ ಶಾಸ್ತ್ರಿ ಪ್ರೌಢಶಾಲೆಯ ಕ್ರೀಡಾಂಗಣದಲ್ಲಿ ಶನಿವಾರ ಬೆಳಿಗ್ಗೆ ರ್ಯಾಲಿಗೆ ಚಾಲನೆ ನೀಡಲಾಯಿತು.

. ಶೆಟ್ಟಿಹಡ್ಲು, ಅಬ್ಬಿಗುಂಡಿ, ಅಸೂಡಿ, ಬಿಳುವಿನಕೊಪ್ಪ, ದೋರಗಲ್, ಅಲಿಗೆ ಭಾಗದಲ್ಲಿ ಹಳ್ಳ, ಅಡಿಕೆ ತೋಟ, ಗದ್ದೆಗಳಲ್ಲಿ ಚಾಲಕರು ಹರಸಾಹಸಪಟ್ಟು ವಾಹನ ಚಲಾಯಿಸಿದರು. ಮಹಿಳೆಯರು ವಾಹನ ಚಲಾಯಿಸಿ, ಸಾಹಸ ಮೆರೆದರು.

. ಏರು, ತಗ್ಗು–ದಿಣ್ಣೆ, ಕಡಿದಾದ ರಸ್ತೆಯಲ್ಲಿ ವಾಹನ ಚಲಾಯಿಸಿದ ಪರಿ ನೋಡುಗರನ್ನು ಆಕರ್ಶಿಸಿತು. ಕೆಲವು ಕಡೆಗಳಲ್ಲಿ ಟ್ರ್ಯಾಕ್ ಮಧ್ಯೆ ವಾಹನ ಸಿಲುಕಿಕೊಂಡಾಗ ಅದನ್ನು ಮೇಲೆ ಎಳೆದು ತರಲು 4*4 ಟ್ರ್ಯಾಕ್ಟರ್ ಬಳಸಲಾಯಿತು. ಮಳೆ ಬಂದಿದ್ದ ಕಾರಣಕ್ಕೆ ಟ್ರ್ಯಾಕ್ ಕೆಸರುಮಯವಾಗಿತ್ತು. ಅಕ್ಕ ಪಕ್ಕದಲ್ಲಿ ನೋಡುತ್ತಾ ಮೂಕವಿಸ್ಮಿತರಾಗಿ ನಿಂತಿದ್ದವರ ಮೈಗೆ ಕೆಸರು ರಾಚಿತು.

. ಜೀಪ್, ಜಿಪ್ಸಿ, ಥಾರ್, ಜಿಮ್ಮಿ, ಫಾರ್ಚುನರ್ ಸೇರಿದಂತೆ 150ಕ್ಕೂ ಹೆಚ್ಚು ವಾಹನಗಳು ರಾಜ್ಯದ ವಿವಿಧ ಜಿಲ್ಲೆಗಳಿಂದ ಬಂದಿದ್ದವು. ಬೆಳಿಗ್ಗೆ ರ್ಯಾಲಿಗೆ ಉದ್ಯಮಿ ವಿಶ್ವನಾಥ್ ಗದ್ದೆಮನೆ ಚಾಲನೆ ನೀಡಿದರು.

. ಸ್ಪೋರ್ಟ್ಸ್ ಕ್ಲಬ್ ಅಧ್ಯಕ್ಷ ಸಚಿನ್ ನಂದಿಗೋಡು, ಕಾರ್ಯದರ್ಶಿ ರೋಹಿತ್ ಬಾಳೆಗದ್ದೆ, ಪದಾಧಿಕಾರಿಗಳಾದ ಪೃಥ್ವಿರಾಜ್ ಕೌರಿ, ಸುನಿಲ್, ಮಂಜುನಾಥ್ ತನೂಡಿ, ಇಂದ್ರೇಶ್ ಕೆ.ಎನ್., ಅನೂಪ್ ನಾರ್ವೆ, ಹಿರೇಕೊಡಿಗೆ ಗ್ರಾಮ ಪಂಚಾಯಿತಿ ಅಧ್ಯಕ್ಷೆ ಜಯಲಕ್ಷ್ಮಿ, ಡಿಸಿಸಿ ಬ್ಯಾಂಕ್ ನಿರ್ದೇಶಕ ಎಸ್.ಎನ್.ರಾಮಸ್ವಾಮಿ ಇದ್ದರು.