ಕೋವಿಡ್‌ನಿಂದ ಜಿಲ್ಲೆಯಲ್ಲಿ ನಾಲ್ವರ ಸಾವು

ಚಿತ್ರದುರ್ಗ: ಜಿಲ್ಲಾ ಆಸ್ಪತ್ರೆಯಲ್ಲಿ ಕೋವಿಡ್‌ಗೆ ಚಿಕಿತ್ಸೆ ಪಡೆಯುತ್ತಿದ್ದವರಲ್ಲಿ ಮಂಗಳವಾರ ನಾಲ್ವರು ಮೃತಪಟ್ಟಿದ್ದಾರೆ. ಮೃತರೆಲ್ಲರೂ 50 ವರ್ಷದ ಒಳಗಿನವರು. ಕೋವಿಡ್‌ನಿಂದ ಮೃತಪಟ್ಟವರ ಸಂಖ್ಯೆ 81ಕ್ಕೆ ಏರಿಕೆಯಾಗಿದೆ.

ಚಿತ್ರದುರ್ಗದ ಕೆಎಚ್‌ಬಿ ಕಾಲೊನಿಯ ಓಂಕಾರಮ್ಮ (50), ಚೇಳಗುಡ್ಡ ಬಡಾವಣೆಯ ಸಿದ್ದೇಶ್ (38), ಹಿರಿಯೂರು ತಾಲ್ಲೂಕಿನ ಯಲಗೊಂಡನಹಳ್ಳಿಯ ವನಜಾಕ್ಷಿ (50) ಹಾಗೂ ಮೊಳಕಾಲ್ಮುರು ತಾಲ್ಲೂಕಿನ ರಾಂಪುರದ ಶಿವಕುಮಾರ್ (50) ಮೃತಪಟ್ಟವರು.

ಕೊರೊನಾ ಸೋಂಕು ಕಾಣಿಸಿಕೊಂಡು ಉಸಿರಾಟದ ತೊಂದರೆ ಆಗಿದ್ದರಿಂದ ಇವರು ಜಿಲ್ಲಾ ಆಸ್ಪತ್ರೆಗೆ ದಾಖಲಾಗಿದ್ದರು. ಸೋಮವಾರ ರಾತ್ರಿಯಿಂದ ಮಂಗಳವಾರ ಮಧ್ಯಾಹ್ನದ ವೇಳೆಗೆ ನಾಲ್ವರು ಮೃತಪಟ್ಟಿದ್ದಾರೆ ಎಂದು ಜಿಲ್ಲಾ ಆಸ್ಪತ್ರೆಯ ಮೂಲಗಳು ಮಾಹಿತಿ ನೀಡಿವೆ.

ಜಿಲ್ಲೆಯಲ್ಲಿ ಕೊರೊನಾ ಸೋಂಕಿತರ ಸಂಖ್ಯೆ ಹೆಚ್ಚಾಗುತ್ತಿದ್ದು, ಮಂಗಳವಾರ 200 ಪ್ರಕರಣಗಳು ಬಳಕಿಗೆ ಬಂದಿವೆ. ಚಿತ್ರದುರ್ಗ ತಾಲ್ಲೂಕಿನಲ್ಲಿ ಸತತ ಎರಡನೇ ದಿನವೂ 100ಕ್ಕೂ ಅಧಿಕ ಪ್ರಕರಣಗಳು ದೃಢಪಟ್ಟಿವೆ.

ಚಿತ್ರದುರ್ಗ ತಾಲ್ಲೂಕಿನಲ್ಲಿ 103, ಚಳ್ಳಕೆರೆ 25, ಹಿರಿಯೂರು 22, ಹೊಳಲ್ಕೆರೆ 26, ಹೊಸದುರ್ಗ 21, ಮೊಳಕಾಲ್ಮುರು ತಾಲ್ಲೂಕಿನಲ್ಲಿ 3 ಪ್ರಕರಣ ದೃಢಪಟ್ಟಿವೆ.

ಮಂಗಳವಾರ 2,203 ಜನರ ಗಂಟಲು ಮತ್ತು ಮೂಗಿನ ದ್ರವದ ಮಾದರಿಯನ್ನು ಸಂಗ್ರಹಿಸಲಾಗಿದೆ. ಇನ್ನೂ 895 ಜನರ ವರದಿ ಬರುವುದು ಬಾಕಿ ಇದೆ. ಜಿಲ್ಲೆಯಲ್ಲಿ ಸದ್ಯ 1,473 ಸಕ್ರಿಯ ಪ್ರಕರಣಗಳಿವೆ.

ಕೋವಿಡ್‌ ಅಂಕಿ–ಅಂಶ

* 17,855

ಒಟ್ಟು ಸೋಂಕಿತರು

* 1,473

ಸಕ್ರಿಯ ಪ್ರಕರಣ

* 16,301

ಗುಣಮುಖ ಆದವರು

* 81

ಒಟ್ಟು ಸಾವು

ದಿನದ ಏರಿಕೆ

* ಹೊಸ ಪ್ರಕರಣ – 200

* ಗುಣಮುಖ – 39

* ಸಾವು– 04

ಆಧಾರ: ಆರೋಗ್ಯ ಇಲಾಖೆ