ಹೊಸದುರ್ಗ: ತರಕಾರಿ ಸಸಿ ಖರೀದಿಸಲು ಮುಂದಾದ ರೈತರು

ಪ್ರಸ್ತುತ ತರಕಾರಿಗಳ ದರ ಅಧಿಕವಾಗಿದೆ. ಹೀಗಾಗಿ ಹೆಚ್ಚು ಆದಾಯ ಪಡೆಯುವ ಉದ್ದೇಶದಿಂದ ರೈತರು ತರಕಾರಿ ಬೆಳೆಯಲು ಮುಂದಾಗಿದ್ದಾರೆ. ಟೊಮೆಟೊ, ಮೆಣಸಿನಕಾಯಿ, ಬದನೆ, ಎಲೆಕೋಸಿನ ಸಸಿಗಳಿಗೆ ಬೇಡಿಕೆ ಹೆಚ್ಚಾಗಿದೆ. ಸಸಿಗಳ ಜೊತೆ ಹಾಗಲಕಾಯಿ, ಹಿರೇಕಾಯಿ, ಬೀನ್ಸ್ ಬಿತ್ತನೆ ಬೀಜಗಳ ಖರೀದಿಯೂ ಅಧಿಕವಾಗಿದೆ.

ಕ್ಯಾಪ್ಸಿಕಂ ₹7, ಮೆಣಸಿನಕಾಯಿ ₹1, ಟೊಮೆಟೊ ₹1, ಬದನೆ 60 ಪೈಸೆ, ಎಲೆ ಕೋಸು ಹಾಗೂ ಹೂಕೋಸು ತಲಾ 50 ಪೈಸೆ, ಚೆಂಡು ಹೂ ಸಸಿಗಳನ್ನು ₹2–₹4ಕ್ಕೆ ಮಾರಾಟ ಮಾಡಲಾಗುತ್ತಿದೆ. ತಳಿಗಳ ಆಧಾರದ ಮೇಲೆ ಬೆಲೆಯಲ್ಲಿ ವ್ಯತ್ಯಾಸವಾಗುತ್ತದೆ.

‘ಕಳೆದ ಬಾರಿ ಅಧಿಕ ಬಿಸಿಲು ಹಾಗೂ ಬರಗಾಲದಿಂದ ಸಸಿ ಮಾರಾಟ ಅಷ್ಟಾಗಿ ಇರಲಿಲ್ಲ. ಈ ಬಾರಿ ಬರಗಾಲ ಹಾಗೂ ನೀರಿನ ಕೊರತೆ ಇದ್ದರೂ ಸಸಿಗಳನ್ನು ಬೆಳೆಸಲಾಗಿದೆ. ಈಗ ಹದ ಮಳೆಯಾಗಿದ್ದು, ತರಕಾರಿ ಸಸಿಗಳ ಮಾರಾಟ ಜೋರಾಗಿ ನಡೆಯುತ್ತಿದೆ’ ಎಂದು ಬೀಸನಹಳ್ಳಿ ಜೆ.ಪಿ.ಡಿ ಫಾರಂನ ಜಗದೀಶ್ ಎಸ್. ಹೇಳಿದ್ದಾರೆ. 

‘ಈವರೆಗೆ ಅಂದಾಜು 8–10 ಲಕ್ಷ ಸಸಿಗಳ ಮಾರಾಟ ಮಾಡಲಾಗಿದೆ. ಜೂನ್‌ ಆರಂಭದಿಂದ ಚೆಂಡು ಹೂ ಸಸಿಗಳ ಬೇಡಿಕೆ ಹೆಚ್ಚಾಗಿದೆ. 2004 ರಿಂದಲೂ ನರ್ಸರಿ ಕಾಯಕ ಮಾಡುತ್ತಿದ್ದು, ಈ ಬಾರಿ ಕಡಿಮೆ ಸಮಯದಲ್ಲಿ ಅಧಿಕ ಸಸಿಗಳ ಮಾರಾಟವಾಗಿವೆ. ರೈತರು ಉತ್ತಮ ಆದಾಯ ನಿರೀಕ್ಷೆ ಹೊಂದಿದ್ದಾರೆ. ಆರಂಭದಲ್ಲಿ ಇರುವಂತೆ ಮಳೆಯೂ ಕಾಲಕಾಲಕ್ಕೆ ಚೆನ್ನಾಗಿ ಆದರೆ ಸಾಕು’ ಎಂಬುದು ಅವರ ಆಶಯವಾಗಿದೆ. 

ಚೆಂಡುಹೂ ಸಸಿಗೆ ಹೆಚ್ಚಿದ ಬೇಡಿಕೆ

ಈ ಬಾರಿ ಚೆಂಡು ಹೂ ಸಸಿಗಳಿಗೂ ಬೇಡಿಕೆ ಹೆಚ್ಚಾಗಿದೆ. ಈ ಸಸಿಗಳು 45-50 ದಿನಗಳಲ್ಲಿ ಹೂ ಬಿಡಲು ಆರಂಭಿಸುತ್ತವೆ. ಆಗಸ್ಟ್‌ನಿಂದ ಶ್ರಾವಣ ದಸರಾ ದೀಪಾವಳಿ ಸೇರಿದಂತೆ ಸಾಲು ಹಬ್ಬಗಳಿದ್ದು ಚೆಂಡು ಹೂಗಳಿಗೆ ಬೇಡಿಕೆ ಹೆಚ್ಚಾಗಿರುತ್ತದೆ. ಕಡಿಮೆ ಸಮಯದಲ್ಲಿ ಅಧಿಕ ಆದಾಯ ನೀಡುವ ಚೆಂಡು ಹೂ ಬೆಳೆಯಲು ರೈತರು ಉತ್ಸುಕರಾಗಿದ್ದಾರೆ.