ಚಿತ್ರದುರ್ಗ: ಕಲ್ಲುಕುಟಿಕರಿಗೆ ಫ್ಲೋರೈಡ್‌ ನೀರೇ ಗತಿ; ಹೆಚ್ಚಿದ ಅನಾರೋಗ್ಯ

ದಾಸರಹಳ್ಳಿ ಗ್ರಾಮದ ಗುಡಿಸಲುಗಳು ವಿದ್ಯುಚ್ಛಕ್ತಿಯಿಂದ ವಂಚಿತಗೊಂಡಿವೆ. ಬಹುತೇಕ ಮನೆಗಳಿಗೆ ಹಕ್ಕುಪತ್ರಗಳಿಲ್ಲದ ಕಾರಣ ವಿದ್ಯುತ್‌ ಸಂಪರ್ಕ ಒದಗಿಸಲು ಸಾಧ್ಯವಾಗಿಲ್ಲ. ಜನರು ಡೀಸೆಲ್‌ ತಂದು ಹಣತೆ (ಡೀಸೆಲ್‌ ಬತ್ತಿ) ಮಾಡಿಕೊಂಡು ಬೆಳಕು ಪಡೆಯುತ್ತಿದ್ದಾರೆ. ಮಂದ ಬೆಳಕಿನ ಕಾರಣಕ್ಕೆ ಹಲವರ ಕಣ್ಣುಗಳು ಮಂಜಾಗಿವೆ. ‘ಮೊದಲೆಲ್ಲಾ ಸೀಮೆಎಣ್ಣೆ ತಂದು ಹಣೆತೆಯಿಂದ ಬೆಳಕು ಪಡೆಯುತ್ತಿದ್ದೆವು. ಈಗ ಎಲ್ಲೂ ಸೀಮೆಎಣ್ಣೆ ಸಿಗುತ್ತಿಲ್ಲ ಹೀಗಾಗಿ ಡೀಸೆಲ್‌ ಹಣತೆಯೇ ನಮಗೆ ಬೆಳಕಿನ ಆಧಾರವಾಗಿದೆ. ಡೀಸೆಲ್‌ ಬೆಲೆ ಹೆಚ್ಚಿರುವ ಕಾರಣ ನಮ್ಮ ದುಡಿಮೆಯ ಬಹುಪಾಲು ಡೀಸೆಲ್‌ಗಾಗಿ ವ್ಯಯವಾಗುತ್ತಿದೆ‘ ಎನ್ನುತ್ತಾರೆ ಗ್ರಾಮದ ಮಂಜುಳಮ್ಮ.

ಅರಣ್ಯ ಪ್ರದೇಶಗಳಲ್ಲಿ ಕಲ್ಲುಗಳನ್ನು ತರಲು ಜನರು ಅನೇಕ ಸಮಸ್ಯೆಗಳನ್ನು ಎದುರಿಸುತ್ತಿದ್ದು ಕುಲಕಸುಬು ಮಾಡುವುದಕ್ಕೂ ಹಲವು ತಡೆಗಳನ್ನು ಎದುರಿಸುತ್ತಿದ್ದಾರೆ. ಹೀಗಾಗಿ ದಾಸರಹಳ್ಳಿ ಗ್ರಾಮದ ಜನರು ಉದ್ಯೋಗ ಅರಸಿ ನಗರ ಪಟ್ಟಣ ಪ್ರದೇಶಗಳಿಗೆ ಗುಳೇ ಹೋಗುತ್ತಿದ್ದಾರೆ. ಪಾಲಕರು ಗುಳೇ ಹೋಗುವ ಕಾರಣ ಮಕ್ಕಳು ಸರಿಯಾಗಿ ವಿದ್ಯಾಭ್ಯಾಸ ಪಡೆಯಲು ಸಾಧ್ಯವಾಗುತ್ತಿಲ್ಲ. ಗ್ರಾಮದಲ್ಲಿ ಕಿರಿಯ ಪ್ರಾಥಮಿಕ ಶಾಲೆಯಿದ್ದು 28 ವಿದ್ಯಾರ್ಥಿಗಳು ಇದ್ದಾರೆ. ಬಹುತೇಕ ಮಕ್ಕಳು ಅರ್ಧಕ್ಕೆ ಶಾಲೆ ತ್ಯಜಿಸುತ್ತಿದ್ದು ವಿದ್ಯಾಭ್ಯಾಸದಿಂದಲೂ ವಂಚಿತರಾಗುತ್ತಿದ್ದಾರೆ. 5ನೇ ತರಗತಿಯಿಂದ ಮಕ್ಕಳು ಬೇರೆ ಊರುಗಳಿಗೆ ನಡೆದುಕೊಂಡೇ ಹೋಗಬೇಕಾದ ಪರಿಸ್ಥಿತಿ ಇದೆ. ಹೀಗಾಗಿ ಓದುವವರ ಸಂಖ್ಯೆ ಕುಸಿಯುತ್ತಿದೆ.

ದಾಸರಹಳ್ಳಿಯಲ್ಲಿ ಗುಡಿಸಲುಗಳು ಹೆಚ್ಚಿನ ಸಂಖ್ಯೆಯಲ್ಲಿರುವರ ಕಾರಣ ಬೆಂಕಿ ಅನಾಹುತದ ಭಯ ಜನರನ್ನು ಸದಾ ಕಾಡುತ್ತದೆ. ಬೇಸಿಗೆ ಅವಧಿಯಲ್ಲಿ ಬೆಂಕಿಯಿಂದ ಹಲವು ಗುಡಿಸಲುಗಳು ಸುಟ್ಟು ಹೋದ ಉದಾಹರಣೆಗಳಿವೆ. ಹೀಗಾಗಿ ಜನರು ಡೀಸೆಲ್‌ ಬತ್ತಿಯನ್ನು ಬಹಳ ಎಚ್ಚರಿಕೆಯಿಂದ ಬಳಸುವ ಅನಿವಾರ್ಯತೆ ಇದೆ. ಮಳೆಗಾಲದಲ್ಲೂ ಗ್ರಾಮಸ್ಥರು ನೆಮ್ಮದಿಯಿಂದ ಬದುಕುವ ಪರಿಸ್ಥಿತಿ ಇಲ್ಲ. ಗುಡಿಸಲುಗಳು ಇಳಿಜಾರಿನ ಜಾಗದಲ್ಲಿದ್ದು ಮಳೆ ನೀರು ಒಳಗೆ ನುಗ್ಗಿ ಬರುತ್ತದೆ. ಮಳೆಗಾಲ ಮಳೆ ನೀರು ನುಗ್ಗುವ ಭಯದಲ್ಲಿ ಬದುಕಿದರೆ ಬೇಸಿಗೆಕಾಲದಲ್ಲಿ ಬೆಂಕಿಯ ಭಯದಿಂದಲೇ ಬದುಕುತ್ತಾರೆ.