ಶನಿವಾರ, ಅಕ್ಟೋಬರ್ 31, 2020
20 °C
ವಾಣಿವಿಲಾಸ ಸಾಗರ ಜಲಾಶಯ ಹಿನ್ನೀರು ಪ್ರದೇಶದಲ್ಲಿ ಆಯೋಜನೆ

ಹೊಸದುರ್ಗ: 100 ಬಾಲಕರಿಗೆ ಈಜು ತರಬೇತಿ

ಪ್ರಜಾವಾಣಿ ವಾರ್ತೆ Updated:

ಅಕ್ಷರ ಗಾತ್ರ : | |

Prajavani

ಹೊಸದುರ್ಗ: ವಾಣಿವಿಲಾಸ ಸಾಗರ ಜಲಾಶಯದ ಹಿನ್ನೀರು ಪ್ರದೇಶದಲ್ಲಿ ತಾಲ್ಲೂಕಿನ ವಿವಿಧ ಶಾಲೆಗಳ 100 ಬಾಲಕರಿಗೆ ಒಂದು ತಿಂಗಳ ಈಜು ತರಬೇತಿ ಶಿಬಿರ ನಡೆಯುತ್ತಿದೆ.

ಜನರಲ್‌ ತಿಮ್ಮಯ್ಯ ಜಲಸಾಹಸ ಅಕಾಡೆಮಿ ಹಾಗೂ ಶಾಸಕ ಗೂಳಿಹಟ್ಟಿ ಡಿ.ಶೇಖರ್‌ ಸಹಯೋಗದಲ್ಲಿ ಈ ಶಿಬಿರ ಆಯೋಜಿಸಲಾಗಿದೆ.

ಮಾಡದಕೆರೆ ಹೋಬಳಿಯ ಗೂಳಿಹಟ್ಟಿ, ಭೋವಿಹಟ್ಟಿ, ದುಗ್ಗಾವರ, ಡಿ.ಮಲ್ಲಾಪುರ, ನವಿಲುಕಲ್ಲು ಭೋವಿಹಟ್ಟಿ, ಕಂಠಾಪುರ ಸೇರಿ ಇನ್ನಿತರ ಶಾಲೆಗಳ 5ರಿಂದ 10ನೇ ತರಗತಿವರೆಗಿನ 100 ಮಕ್ಕಳನ್ನು ಶಿಕ್ಷಣ ಇಲಾಖೆಯ ಸಹಕಾರದೊಂದಿಗೆ ತರಬೇತಿಗೆ ಆಯ್ಕೆ ಮಾಡಲಾಗಿದೆ. 100 ಮಕ್ಕಳನ್ನು ಮೂರು ತಂಡಗಳಾಗಿ ವಿಂಗಡಿಸಲಾಗಿದೆ. ಒಂದು ತಂಡದಲ್ಲಿ 33 ಮಕ್ಕಳಿದ್ದಾರೆ. ಒಂದು ತಂಡಕ್ಕೆ 10 ದಿನಗಳ‌ವರೆಗೆ ಬೆಳಿಗ್ಗೆ 7ರಿಂದ ಸಂಜೆ 7ರವರೆಗೂ ತರಬೇತಿ ನೀಡಲಾಗುತ್ತಿದೆ.

ಈಗಾಗಲೇ ಮೊದಲನೇ ತಂಡಕ್ಕೆ ಸೆ. 26ರಿಂದ ತರಬೇತಿ ಆರಂಭವಾಗಿದೆ. ತರಬೇತಿಯಲ್ಲಿ ಭಾಗವಹಿಸಿರುವ ಬಾಲಕರಿಗೆ ಉಚಿತ ಊಟ, ವಸತಿಸೌಕರ್ಯ ಕಲ್ಪಿಸಲಾಗಿದೆ. ಶಾಸಕ ಗೂಳಿಹಟ್ಟಿ ಡಿ.ಶೇಖರ್‌ ಅವರು ಟೀಶರ್ಟ್‌, ಶೂ ಉಚಿತವಾಗಿ ನೀಡಿದ್ದಾರೆ. ಅಕ್ಟೋಬರ್‌ 25ರವರೆಗೂ ತರಬೇತಿ ನಡೆಯಲಿದೆ. ಮಂಗಳೂರು, ಬೆಂಗಳೂರು, ದಾವಣಗೆರೆಯಿಂದ ಬಂದಿರುವ 12 ತರಬೇತಿದಾರರು ಈಜುಗಾರಿಕೆಯ ಕೌಶಲ, ಬೋಟಿಂಗ್‌, ಮನರಂಜನಾ ಆಟ ಹಾಗೂ ಸಾಂಸ್ಕೃತಿಕ ಕಾರ್ಯಕ್ರಮ ತರಬೇತಿ ನೀಡುತ್ತಿದ್ದಾರೆ.

‘ಕಳೆದ ವರ್ಷ ಶಾಸಕ ಗೂಳಿಹಟ್ಟಿ ಡಿ.ಶೇಖರ್‌ ಅವರು ಜಿಲ್ಲೆಯ 250 ದೈಹಿಕ ಶಿಕ್ಷಕರಿಗೆ ಈಜು ತರಬೇತಿ ಏರ್ಪಡಿಸಿ ಶಿಕ್ಷಕರ ಮೆಚ್ಚುಗೆಗೆ ಪಾತ್ರರಾಗಿದ್ದರು. ಶಾಲಾ ಮಕ್ಕಳಿಗೂ ಈ ತರಬೇತಿ ಅಗತ್ಯ ಎಂಬ ಉದ್ದೇಶದಿಂದ ಈ ಬಾರಿ ಮಾಡದಕೆರೆ ಹೋಬಳಿಯ ಆಯ್ದ ಶಾಲೆಗಳ ಬಾಲಕರಿಗೆ ಆಯೋಜಿಸಿದ್ದಾರೆ.  ಪ್ರವಾಹದಲ್ಲಿ ಸಿಲುಕಿದಾಗ ಹಾಗೂ ನೀರಿನಲ್ಲಿ ಮುಳುಗಡೆಯಾದ ಸಂದರ್ಭದಲ್ಲಿ ತಮ್ಮನ್ನು ಹಾಗೂ ಇತರರನ್ನು ರಕ್ಷಿಸಿಕೊಳ್ಳಲು ನೆರವಾಗಲಿದೆ. ಈ ತರಬೇತಿಯನ್ನು ಮುಂದಿನ ದಿನದಲ್ಲಿ ತಾಲ್ಲೂಕಿನ ಎಲ್ಲ ಶಾಲೆಯ ಮಕ್ಕಳಿಗೂ ವಿಸ್ತರಿಸುವ ಸಾಧ್ಯತೆ ಇದೆ’ ಎಂದು ಯುವಜನ ಸೇವೆ ಹಾಗೂ ಕ್ರೀಡಾ ಅಧಿಕಾರಿ ಎನ್‌.ಟಿ.ದಿವಾಕರ್‌ ವಿವರಿಸಿದರು.

ಪ್ರಜಾವಾಣಿ ಫೇಸ್‌ಬುಕ್ ಪುಟವನ್ನು ಲೈಕ್ ಮಾಡಿ, ಪ್ರಮುಖ ಸುದ್ದಿಗಳ ಅಪ್‌ಡೇಟ್ಸ್ ಪಡೆಯಿರಿ.

ಪ್ರಜಾವಾಣಿಯನ್ನು ಟ್ವಿಟರ್‌ನಲ್ಲಿ ಇಲ್ಲಿ ಫಾಲೋ ಮಾಡಿ.

ಟೆಲಿಗ್ರಾಂ ಮೂಲಕ ನಮ್ಮ ಸುದ್ದಿಗಳ ಅಪ್‌ಡೇಟ್ಸ್ ಪಡೆಯಲು ಇಲ್ಲಿ ಕ್ಲಿಕ್ ಮಾಡಿ.

ಈ ವಿಭಾಗದಿಂದ ಇನ್ನಷ್ಟು