ಮಾರುಕಟ್ಟೆ ನೋಟ: ಕಾಳುಮೆಣಸು– ಬೆಳೆಗಾರರ ಭರವಸೆ ‘ಕಪ್ಪು ಬಂಗಾರ’

ಪ್ರಮುಖ ತೋಟಗಾರಿಕಾ ಬೆಳೆಗಳಾದ ಅಡಿಕೆ, ತೆಂಗು ರೋಗ ಬಾಧೆಯಿಂದ ಇಳುವರಿ ಕುಸಿತ ಕಂಡಾಗ ಬೆಳೆಗಾರನ ಕೈಹಿಡಿಯುವುದು ಜಿಲ್ಲೆಯ ಪ್ರಮುಖ ಸಂಬಾರ ಬೆಳೆಯಾಗಿರುವ ಕಾಳುಮೆಣಸು. ‘ಕಪ್ಪು ಬಂಗಾರ’ದ ಮೇಲೆ ರೈತರು ಇಟ್ಟಿರುವ ಭರವಸೆಯಿಂದಾಗಿ ಜಿಲ್ಲೆಯಲ್ಲಿ ವರ್ಷದಿಂದ ವರ್ಷಕ್ಕೆ ಕಾಳುಮೆಣಸು ಪ್ರದೇಶ ವಿಸ್ತರಣೆ ಆಗುತ್ತಲೇ ಇದೆ.

ಬಹುಕಾಲದ ಸಂಗ್ರಹಿಸಿಟ್ಟರೂ ಕೆಡದ ಈ ಬೆಳೆ ರೈತರಿಗೆ ಆಪತ್‌ಕಾಲದ ನಿಧಿಯಂತೆ. ಉತ್ತಮ ದರ ಬಂದಾಗ ರೈತರು ಕಾಳುಮೆಣಸು ಮಾರಾಟ ಮಾಡುತ್ತಾರೆ. ಪ್ರಸ್ತುತ ಮಾರುಕಟ್ಟೆಯಲ್ಲಿ ಕಾಳುಮೆಣಸು ಕೆ.ಜಿ.ಯೊಂದಕ್ಕೆ ಕನಿಷ್ಠ ₹370ರಿಂದ ಗರಿಷ್ಠ ₹555 ರವರೆಗೆ ದರ ಇದೆ.

ಕಳೆದ ಜೂನ್‌ ತಿಂಗಳ ಕೊನೆಯಲ್ಲಿ ಕಾಳುಮೆಳಸು ಕೆ.ಜಿ.ಯೊಂದಕ್ಕೆ ಗರಿಷ್ಠ ₹465 ದರ ಇದ್ದರೆ, ಜುಲೈನಲ್ಲಿ ಗರಿಷ್ಠ ₹ 545, ಆಗಸ್ಟ್‌ನಲ್ಲಿ ಕನಿಷ್ಠ ₹370ರಿಂದ ಗರಿಷ್ಠ ₹ 615, ಸೆಪ್ಟೆಂಬರ್‌, ಅಕ್ಟೋಬರ್‌ನಲ್ಲಿ ಕನಿಷ್ಠ ₹370ರಿಂದ ಗರಿಷ್ಠ ₹585, ನವೆಂಬರ್, ಡಿಸೆಂಬರ್‌ನಲ್ಲಿ ಕನಿಷ್ಠ ₹450ರಿಂದ ಗರಿಷ್ಠ ₹570 ದರ ದೊರೆತಿದೆ. ದರದಲ್ಲಿ ಕೊಂಚ ಏರಿಳಿತವಾದರೂ, ಉಪ ಬೆಳೆಯಾಗಿರುವ ಕಾರಣ ದೊಡ್ಡ ನಷ್ಟವಾಗುವುದಿಲ್ಲ ಎನ್ನುತ್ತಾರೆ ರೈತರು.

‘ಸಣ್ಣ ಹಿಡುವಳಿದಾರರು ತೋಟ ನಿರ್ವಹಣೆ, ಕಾಳುಮೆಣಸು ಕೊಯ್ಲು ಸ್ವತಃ ನಿರ್ವಹಿಸಿದರೆ, ರೈತರಿಗೆ ಲಾಭದಾಯಕ. ಕೃಷಿ ಕಾರ್ಮಿಕರನ್ನು ಅವಲಂಬಿಸಿದರೆ ಬೆಳೆಗಾರರಿಗೆ ಕೆ.ಜಿ.ಗೆ ₹700ರಷ್ಟಾದರೂ ಸಿಕ್ಕಿದರೆ ಅನುಕೂಲ. ಈ ಭಾಗದಲ್ಲಿ ಫಣಿಯೂರು ಜಾತಿಯ ಕಾಳುಮೆಣಸು ಬೆಳೆಯುವವರು ಹೆಚ್ಚು’ ಎನ್ನುತ್ತಾರೆ ಬೆಳೆಗಾರ ಬಂಟ್ವಾಳ ತಾಲ್ಲೂಕು ಮೆಣಸಿನಗಂಡಿಯ ಶಿವಪ್ರಸಾದ್.

‘ಮಂಗ, ನವಿಲು ಕಾಟದಿಂದ ಬೆಳೆ ಉಳಿಸಿಕೊಳ್ಳುವುದು ಸವಾಲು. ಜೊತೆಗೆ ಅಲ್ಲಲ್ಲಿ ಶೀಘ್ರ ಸೊರಗು ರೋಗ ಮತ್ತು ನಿಧಾನ ಸೊರಗು ರೋಗವೂ ಇದೆ. ತೋಟದಲ್ಲಿ ಅಡಿಕೆ ಮರಕ್ಕೆ ಹಬ್ಬುವ ಬಳ್ಳಿಯ ಮೇಲೆ, ಮರದ ಚಂಡೆ ಉದಿರು ಬಿದ್ದರೆ, ಬಳ್ಳಿಯೂ ಹಾಳಾಗುತ್ತದೆ. ಇವೆಲ್ಲ ಸಮಸ್ಯೆಗಳಿದ್ದರೂ, ಕಾಳುಮೆಣಸು ಖಚಿತ ಆದಾಯ ನೀಡುವ ಪರ್ಯಾಯ ಬೆಳೆ’ ಎಂದು ಅವರು ಪ್ರತಿಕ್ರಿಯಿಸಿದರು.