ಪುತ್ತೂರು: ತಾಲ್ಲೂಕಿನ ಪೆರ್ನಾಜೆ ಪರಿಸರಕ್ಕೆ ಒಂದು ವಾರದ ಅವಧಿಯಲ್ಲಿ 4 ಬಾರಿ ರಾತ್ರಿ ವೇಳೆ ಕಾಡಾನೆಗಳು ದಾಳಿ ಮಾಡಿ ಕೃಷಿ ಹಾನಿ ಮಾಡಿದ್ದು, ಕೃಷಿಕರು ಕಂಗೆಟ್ಟಿದ್ದಾರೆ.
ಪೆರ್ನಾಜೆಯ ರಾಘವೇಂದ್ರ ಭಟ್ ಅವರ ತೋಟಕ್ಕೆ ಶನಿವಾರ ರಾತ್ರಿ ದಾಳಿ ಮಾಡಿ ಕಾಡಾನೆಗಳು 10 ತೆಂಗಿನಮರ, 15ಕ್ಕೂ ಅಧಿಕ ಬಾಳೆಗಿಡಗಳು ಹಾಗೂ 2 ದೀವಿ ಹಲಸು ಮರಗಳನ್ನು ನಾಶ ಮಾಡಿವೆ. ಗೋಪಾಲಕೃಷ್ಣ ಕಲ್ಲೂರಾಯ ಅವರ ತೋಟಕ್ಕೆ ನುಗ್ಗಿದ ಕಾಡಾನೆಗಳು ಅಡಿಕೆ, ತೆಂಗು, ಬಾಳೆಗಿಡಗಳನ್ನು ನಾಶ ಮಾಡಿವೆ.
ಅರಣ್ಯ ಇಲಾಖೆ ಅಧಿಕಾರಿಗಳು ಮತ್ತು ಸಿಬ್ಬಂದಿ ಶನಿವಾರ ರಾತ್ರಿ ಗಸ್ತು ತಿರುಗಲು ಪೆರ್ನಾಜೆ ವ್ಯಾಪ್ತಿಗೆ ಬಂದಿದ್ದರು. ಈ ವೇಳೆ ಪೆರ್ನಾಜೆ ಸಮೀಪದ ಸರ್ಜಮೂಲೆ ಎಂಬಲ್ಲಿಗೆ ಕಾಡಾನೆಗಳು ಬಂದಿರುವ ಮಾಹಿತಿಯನ್ನು ಸ್ಥಳೀಯರು ನೀಡಿದ್ದರು. ಸರ್ಜಮೂಲೆಗೆ ತೆರಳಿ ಅಲ್ಲಿಂದ ಕಾಡಾನೆಗಳನ್ನು ಓಡಿಸುವ ಕಾರ್ಯಾಚರಣೆ ನಡೆಸಿ ತೆರಳಿದ್ದರು. ಆ ಬಳಿಕ ಕಾಡಾನೆಗಳು ಪೆರ್ನಾಜೆ ಪರಿಸರಕ್ಕೆ ಬಂದು ಹಾನಿಮಾಡಿವೆ.
