ಯಕ್ಷಗಾನ ಕಲಾವಿದರು ಕಳೆದ ವರ್ಷ ಕೋವಿಡ್‌ ಲಾಕ್‌ಡೌನ್‌ ನಿರ್ಬಂಧದಿಂದ ತತ್ತರಿಸಿದಾಗ ಯಕ್ಷಧ್ರುವ ಟ್ರಸ್ಟ್‌ ನೆರವು ನೀಡಿತ್ತು. ಈ ಬಾರಿಯೂ ಲಾಕ್‌ಡೌನ್‌ ಘೋಷಿಸಿದ್ದು, ಮೇಳಗಳ ತಿರುಗಾಟ ಸ್ಥಗಿತವಾಗಿದೆ. ಇನ್ನೂ 4–5 ತಿಂಗಳು ಯಕ್ಷಕಲಾವಿದರು ಕೆಲಸ– ಆದಾಯ ಇಲ್ಲದೆ ಸಂಕಷ್ಟಕ್ಕೀಡಾಗಬಹುದು. ಇದನ್ನು ಗಮನಿಸಿದ ಯಕ್ಷಧ್ರುವ ಸಂಸ್ಥೆ ಯಕ್ಷಗಾನ ಕ್ಷೇತ್ರದ ವೃತ್ತಿನಿರತ ಕಲಾವಿದರ ಕುಟುಂಬ ಹಸಿವಿನಿಂದ ಬಳಲದಂತೆ ನೆರವಾಗಲು ನಿರ್ಧರಿಸಿದೆ. ತೀರಾ ಕಷ್ಟದಲ್ಲಿರುವ ಕಲಾವಿದರಿಗೆ ಆಹಾರ , ದಿನಸಿ ಸಾಮಗ್ರಿಗಳನ್ನು ಅವರ ಮನೆಗೇ ತಲುಪಿಸಲು ಸಂಸ್ಥೆ ನಿರ್ಧರಿಸಿದೆ.
