ಹರಿಹರ: ಕಿರಿದಾದ ರಸ್ತೆ, ರಾಷ್ಟ್ರೀಯ ಹೆದ್ದಾರಿಯ ಯೋಗ ಸಿಗುವುದೆಂದು?

ರಾಜ್ಯದ ವಿಜಯನಗರ, ದಾವಣಗೆರೆ ಮತ್ತು ಶಿವಮೊಗ್ಗ ಜಿಲ್ಲೆಯಲ್ಲಿ 194 ಕಿ.ಮೀ. ಉದ್ದಕ್ಕೆ ಹಾದು ಹೋಗಿರುವ ಈ ಹೆದ್ದಾರಿ ಹೊಸಪೇಟೆಯ ಮರಿಯಮ್ಮನಹಳ್ಳಿಯಿಂದ ಆರಂಭಗೊಂಡು ದಾವಣಗೆರೆ ಜಿಲ್ಲೆ ಮೂಲಕ ಶಿವಮೊಗ್ಗ ನಗರವನ್ನು ತಲುಪುತ್ತದೆ.

ಹೊಸಪೇಟೆ ಹಾಗೂ ಶಿವಮೊಗ್ಗದಿಂದ ಮುಂದಕ್ಕೆ ಈ ರಾಜ್ಯ ಹೆದ್ದಾರಿಯು ರಾಷ್ಟ್ರೀಯ ಹೆದ್ದಾರಿಯಾಗಿ ಪರಿವರ್ತನೆಗೊಂಡು ಮುಂದುವರಿಯುತ್ತದೆ. ಈ ಎರಡೂ ನಗರಗಳ ನಡುವಿನ 194 ಕಿ.ಮೀ. ಉದ್ದದ ಪಟ್ಟಿ ಮಾತ್ರ ರಾಜ್ಯ ಹೆದ್ದಾರಿಯಾಗಿ ಹಾಗೆಯೇ ಉಳಿದಿದೆ. 

ಈ ಹೆದ್ದಾರಿ ಬಳಸಿ ಹೊಸಪೇಟೆಯಿಂದ ಮುಂದಕ್ಕೆ ಬಳ್ಳಾರಿ, ರಾಯಚೂರು, ಕಲಬುರಗಿ, ಬೀದರ್‌ ಹಾಗೂ ಆಂಧ್ರಪ್ರದೇಶ, ತೆಲಂಗಾಣ, ಮಹಾರಾಷ್ಟ್ರಗಳಿಗೆ ವಾಹನಗಳು ಸಂಚರಿಸುತ್ತವೆ. ಹಾಗೆಯೇ ಶಿವಮೊಗ್ಗದಿಂದ ಮುಂದಕ್ಕೆ ಚಿಕ್ಕಮಗಳೂರು, ಮೈಸೂರು, ಉಡುಪಿ, ಮಂಗಳೂರು, ಚಾಮರಾಜನಗರ ಹಾಗೂ ಕೇರಳ ರಾಜ್ಯಕ್ಕೆ ವಾಹನಗಳು ಸಂಚರಿಸುತ್ತವೆ.

194 ಕಿ.ಮೀ. ಉದ್ದದ ಈ ರಸ್ತೆ, ರಾಜ್ಯ ಹೆದ್ದಾರಿಯಾಗಿದ್ದರೂ ಕೂಡ ಇಲ್ಲಿರುವ ವಾಹನ ದಟ್ಟಣೆ ರಾಷ್ಟ್ರೀಯ ಹೆದ್ದಾರಿಗಿಂತ ಯಾವುದಕ್ಕೂ ಕಡಿಮೆ ಇಲ್ಲ. ಹರಿಹರ ವಲಯದಲ್ಲಿ ಈ ಹೆದ್ದಾರಿಯಲ್ಲಿ ದಿನಕ್ಕೆ ಸರಾಸರಿ 20,000 ಭಾರಿ ವಾಹನಗಳ ಸಂಚಾರ ದಟ್ಟಣೆ ಇದೆ ಎಂದು ಪಿಡಬ್ಲುಡಿ ಅಂಕಿ–ಅಂಶಗಳೇ ಹೇಳುತ್ತವೆ.

ಶತಮಾನದಷ್ಟು ಹಳೆಯ ಕಿರು ಸೇತುವೆಗಳು

ಈ ಹೆದ್ದಾರಿಯಲ್ಲಿ ಸಿಗುವ ನಗರ ಪಟ್ಟಣ ಪ್ರದೇಶಗಳಲ್ಲಿ ಮಾತ್ರ ರಸ್ತೆ ವಿಭಜಕದೊಂದಿಗೆ ಏಕಮುಖ ಸಂಚಾರ ವ್ಯವಸ್ಥೆ ಇದೆ. ಉಳಿದಂತೆ ಶೇ 95 ಭಾಗ ದ್ವಿಪಥ ಮಾತ್ರ ಇದ್ದು ರಸ್ತೆ ವಿಭಜಕಗಳು ಇಲ್ಲ. ಈ ಹೆದ್ದಾರಿಯಲ್ಲಿ ಬರುವ ಸಣ್ಣಪುಟ್ಟ ಸೇತುವೆಗಳನ್ನು ಶತಮಾನದ ಹಿಂದೆ ನಿರ್ಮಿಸಿದ್ದು ಅವುಗಳ ಅಗಲ ಕಿರಿದಾಗಿವೆ. ಕೆಲವು ಸೇತುವೆಗಳ ಮೇಲೆ ಒಂದೇ ಬಾರಿಗೆ ಎರಡು ವಾಹನಗಳು ಸಂಚರಿಸಲಾರದಷ್ಟು ಇಕ್ಕಟ್ಟಾಗಿವೆ. ಇದೆಲ್ಲದರ ಪರಿಣಾಮವಾಗಿ ಅಪಘಾತಗಳು ಸಂಭವಿಸಿ ಅಪಾರ ಪ್ರಮಾಣದ ಜೀವ ಆಸ್ತಿ ಹಾನಿಯಾಗುತ್ತಿದೆ. ವಾಹನಗಳ ಸಂಚಾರದ ವೇಗವೂ ಕಡಿಮೆಯಾಗುತ್ತದೆ. ಈ ಹೆದ್ದಾರಿಯನ್ನು ರಾಷ್ಟ್ರೀಯ ಹೆದ್ದಾರಿಯಾಗಿ ಅಭಿವೃದ್ಧಿಪಡಿಸಬೇಕು ಎಂಬುದು ಈ ಭಾಗದ ಜನರ ಬೇಡಿಕೆಯಾಗಿದೆ.