ದಾವಣಗೆರೆ: ‘ನನ್ನ ಮಗಳಿಗೆಕೊರೊನಾ ಸೋಂಕು ಬಂದಿದ್ದು, ಆಕೆಯ ಬಗ್ಗೆ ಸಾಮಾಜಿಕ ಜಾಲತಾಣಗಳಲ್ಲಿ ಕಿಡಿಗೇಡಿಗಳು ಸುಳ್ಳು ಸುದ್ದಿ ಹರಡುತ್ತಿರುವುದಕ್ಕೆ ಬೇಸರವಾಗುತ್ತಿದೆ. ಆಕೆ ಆರೋಗ್ಯವಾಗಿದ್ದಾಳೆ. ಬಹುಶಃ ಎರಡು–ಮೂರು ದಿನಗಳಲ್ಲಿ ಮನೆಗೆ ವಾಪಸಾಗಬಹುದು’ ಎಂದು ದಾವಣಗೆರೆ ಸಂಸದ ಜಿ.ಎಂ. ಸಿದ್ದೇಶ್ವರ ಸ್ಪಷ್ಟಪಡಿಸಿದ್ದಾರೆ.
‘ನನ್ನ ಮೊಮ್ಮಗಳು, ಅಮೆರಿಕ ಹಾಗೂ ಲಂಡನ್‌ನಿಂದ ಬಂದಿರುವ ನನ್ನ ಇಬ್ಬರು ಮಕ್ಕಳು, ನನಗೆ ಹಾಗೂ ಹೆಂಡತಿಗೆ ಕೊರೊನಾ ನೆಗೆಟಿವ್‌ ಇದೆ ಎಂದು ವರದಿ ಬಂದಿದೆ’ ಎಂದು ಹೋಮ್‌ ಕ್ವಾರಂಟೈನ್‌ನಲ್ಲಿರುವ ಸಂಸದರು ವಿಡಿಯೊ ಮೂಲಕ ಮಾಹಿತಿ ಹಂಚಿಕೊಂಡಿದ್ದಾರೆ.
‘ಪ್ರಧಾನಿ ನರೇಂದ್ರ ಮೋದಿ ಅವರು 21 ದಿನಗಳ ಕಾಲ ಮನೆಯಲ್ಲೇ ಇರುವಂತೆ ಕರೆ ನೀಡಿದ್ದಾರೆ. ಆ ನಿಟ್ಟಿನಲ್ಲಿ ನಾವೆಲ್ಲರೂ ಹೋಮ್‌ ಕ್ವಾರಂಟೈನ್‌ನಲ್ಲಿದ್ದೇವೆ. ನೂರಾರು ಜನ ನನಗೆ ದೂರವಾಣಿ ಕರೆ ಮಾಡಿ ಮಗಳು ಚೆನ್ನಾಗಿದ್ದಾಳಾ ಎಂದು ಕೇಳುತ್ತಿದ್ದಾರೆ. ಮಗಳು ಹಾಗೂ ನಮ್ಮ ಕುಟುಂಬದವರೆಲ್ಲರೂ ಆರೋಗ್ಯವಾಗಿದ್ದೇವೆ’ ಎಂದು ತಿಳಿಸಿದ್ದಾರೆ.
‘ನನಗೆ ನಿಮ್ಮೆಲ್ಲರ ಆರೋಗ್ಯದ ಬಗ್ಗೆ ಕಾಳಜಿ ಇದೆ. ಎಲ್ಲರೂ ಮನೆಯಲ್ಲೇ ಇದ್ದು, ದೇಶ ಹಾಗೂ ಕರ್ನಾಟಕದ ರಕ್ಷಣೆಗೆ ಹೆಚ್ಚು ಒತ್ತು ನೀಡಬೇಕು. ಏಪ್ರಿಲ್ 14ರ ನಂತರ ನಾವೆಲ್ಲರೂ ಭೇಟಿಯಾಗಿ ಬೇವು–ಬೆಲ್ಲ ಸವಿಯೋಣ. ಎಲ್ಲರೂ ಆರೋಗ್ಯವಾಗಿರೋಣ’ ಎಂದು ಮನವಿ ಮಾಡಿದ್ದಾರೆ.
