ಪುಸ್ತಕ ಪ್ರೇಮಿಗಳಿಗಾಗಿ ಬುಕ್‌ ಪಾರ್ಕ್‌...

7

ಪುಸ್ತಕ ಪ್ರೇಮಿಗಳಿಗಾಗಿ ಬುಕ್‌ ಪಾರ್ಕ್‌...

Published:
Updated:
Deccan Herald

ವೈದ್ಯಕೀಯ ಲೇಖಕಿಯಾಗಿ, ರಾಜ್ಯ ಲೇಖಕಿಯರ ಸಂಘದ ಕಾರ್ಯದರ್ಶಿಯಾಗಿ ಹಲವು ಸೃಜನಶೀಲ ಕೃತಿಗಳನ್ನು ಪ್ರಕಟಿಸಿದ ಡಾ. ವಸುಂಧರಾ ಭೂಪತಿ ಅವರು ಕರ್ನಾಟಕ ಪುಸ್ತಕ ಪ್ರಾಧಿಕಾರದ ಅಧ್ಯಕ್ಷರಾಗಿದ್ದಾರೆ. ಪ್ರಾಧಿಕಾರ ಅಸ್ತಿತ್ವಕ್ಕೆ ಬಂದು 25 ವರ್ಷಗಳು ತುಂಬಿದ ಹಿನ್ನೆಲೆಯಲ್ಲಿ ಹಲವಾರು ಕಾರ್ಯಕ್ರಮಗಳು, ಯೋಜನೆಗಳನ್ನು ರೂಪಿಸಿದ್ದಾರೆ.

ಓದುಗರ ಮನೆಗೆ ಪ್ರಾಧಿಕಾರದ ಉಚಿತ ಪುಸ್ತಕಗಳನ್ನು ನೀಡಲು ಹುಬ್ಬಳ್ಳಿಗೆ ಬಂದಿದ್ದ ವೇಳೆ ‘ಪ್ರಜಾವಾಣಿ’ ಮೆಟ್ರೊ ಜೊತೆಗೆ ಪ್ರಾಧಿಕಾರವು ಕೈಗೆತ್ತಿಕೊಂಡಿರುವ ಚಟುವಟಿಕೆಗಳ ಬಗ್ಗೆ ಮಾತನಾಡಿದ್ದಾರೆ.

* ಪ್ರಾಧಿಕಾರದ ಅಧ್ಯಕ್ಷರಾಗಿ ನೇಮಕವಾದ ಬಳಿಕ ತಕ್ಷಣ ಏನೇನು ಯೋಜನೆಗಳನ್ನು ಕಾರ್ಯಗತಗೊಳಿಸಬೇಕು ಎಂದುಕೊಂಡಿದ್ದೀರಿ?

ವೀರಪ್ಪ ಮೊಯಿಲಿ ಅವರು ಮುಖ್ಯಮಂತ್ರಿಯಾಗಿದ್ದ ವೇಳೆ 1993ರಲ್ಲಿ ಅವರು ಆಸಕ್ತಿ ವಹಿಸಿ ಕನ್ನಡ ಪುಸ್ತಕ ಪ್ರಾಧಿಕಾರವನ್ನು ಆರಂಭಿಸಿದರು. ಎಲ್‌.ಎಸ್‌. ಶೇಷಗಿರಿರಾಯರು ಪ್ರಾಧಿಕಾರದ ಮೊದಲ ಅಧ್ಯಕ್ಷರಾಗಿದ್ದರು. ಆ ಬಳಿಕ ಹಲವು ಜನ ಮಹನೀಯರು ಪ್ರಾಧಿಕಾರವನ್ನು ಹೊಸ ಎತ್ತರಕ್ಕೆ ಕೊಂಡೊಯ್ದಿದ್ದಾರೆ. ಇದಕ್ಕೆ ಪೂರಕವಾಗಿ ನಾನೂ ಹಲವು ಯೋಜನೆಗಳನ್ನು ಹಾಕಿಕೊಂಡಿದ್ದೇನೆ. ಅದರ ಪ್ರಮುಖ ಭಾಗವಾಗಿ ಬುಕ್‌ ಪಾರ್ಕ್‌ ನಿರ್ಮಾಣ ಮಾಡಬೇಕು ಎಂಬುದು. ಈಗಾಗಲೇ ಕನ್ನಡ ಮತ್ತು ಸಂಸ್ಕೃತಿ ಸಚಿವೆ ಜಯಮಾಲಾ ಅವರೊಂದಿಗೆ ಚರ್ಚಿಸಿದ್ದೇನೆ. ಇದನ್ನು ಕಾರ್ಯಗತಗೊಳಿಸುವ ಭರವಸೆಯನ್ನೂ ಅವರು ನೀಡಿದ್ದಾರೆ. ಬುಕ್ ಪಾರ್ಕ್‌ ಪರಿಕಲ್ಪನೆ ಭಾರತಕ್ಕೆ ಹೊಸದು. ಲಂಡನ್‌ ಹಾಗೂ ಜರ್ಮನಿಯಲ್ಲಿದೆ. ಸಾಮಾನ್ಯವಾಗಿ ಪಾರ್ಕ್‌ ಎಂದರೆ ಎಲ್ಲರಿಗೂ ಇಷ್ಟ. ಅಲ್ಲಿಯೇ ಚಹಾ, ಕಾಫಿ ಅಂಗಡಿ ವ್ಯವಸ್ಥೆ ಮಾಡುತ್ತೇವೆ. ಓದುಗರಿಗೆ ಆಯ್ಕೆ ಮಾಡಿಕೊಳ್ಳಲು ಅನುಕೂಲವಾಗುವಂತೆ ಕೆಲ ಪುಸ್ತಕಗಳನ್ನು ಪ್ರಾಧಿಕಾರದಿಂದಲೇ ಒದಗಿಸುತ್ತೇವೆ. ಬೆಂಗಳೂರು, ಮೈಸೂರು ಹಾಗೂ ಧಾರವಾಡದಲ್ಲಿ ಬುಕ್‌ ಪಾರ್ಕ್‌ ಮಾಡುವ ಯೋಜನೆ ಇದೆ. ಬಜೆಟ್‌ನಲ್ಲಿ ಇದಕ್ಕೆ ಅನುದಾನ ಪಡೆದುಕೊಳ್ಳುವುದಾಗಿ ಜಯಮಾಲಾ ಅವರು ಭರವಸೆ ನೀಡಿದ್ದಾರೆ.

* ಪುಸ್ತಕ ಮಳಿಗೆಗಳಿಗೆ ಭೇಟಿ ನೀಡಿ ಪುಸ್ತಕ ಖರೀದಿಗಿಂತ ಆನ್‌ಲೈನ್‌ ಮೂಲಕವೇ ತರಿಸಿಕೊಳ್ಳುವವರ ಸಂಖ್ಯೆ ಹೆಚ್ಚುತ್ತಿದೆ. ಇದಕ್ಕೆ ಪ್ರಾಧಿಕಾರದ ಸ್ಪಂದನೆ ಏನು?

ನೀವು ಹೇಳುವುದು ನಿಜ. ಈಗ ಬಹುತೇಕ ಯುವ ಓದುಗರು ಆನ್‌ಲೈನ್‌ ಮೂಲಕವೇ ತಮಗೆ ಬೇಕಾದ ಕೃತಿಗಳನ್ನು ತರಿಸಿಕೊಳ್ಳಲು ಆಸಕ್ತಿ ವ್ಯಕ್ತಪಡಿಸುತ್ತಾರೆ. ಇದಕ್ಕಾಗಿ ಪ್ರಾಧಿಕಾರವೂ ಮುಂದಡಿ ಇಟ್ಟಿದ್ದು, kannadapustakapradhikara.com ವೆಬ್‌ಸೈಟ್‌ಗೆ ಭೇಟಿ ನೀಡಿ ಆನ್‌ಲೈನ್‌ ಮೂಲಕ ಪುಸ್ತಕಗಳನ್ನು ಖರೀದಿಸಬಹುದು. ಆಗಸ್ಟ್‌ ತಿಂಗಳಲ್ಲಿ ಆನ್‌ಲೈನ್‌ ಮೂಲಕವೇ ₹ 86 ಸಾವಿರ ಮೊತ್ತದ ಪುಸ್ತಕಗಳು ಮಾರಾಟವಾಗಿದೆ. ಓದುಗರೊಬ್ಬರು ₹ 14 ಸಾವಿರ ಮೊತ್ತದ ಪುಸ್ತಕಗಳನ್ನು ಖರೀದಿಸಿದ್ದಾರೆ.

* ಯಾವ ಸಂಪುಟಗಳು ಹೊರಬಂದಿವೆ?

ಡಾ.ಎಸ್‌.ವಿ. ಪರಮೇಶ್ವರ ಭಟ್ಟರ ಸಮಗ್ರ ಕಾವ್ಯದ 6 ಸಂಪುಗಳು, ಕರ್ನಾಟಕ ವಿದ್ಯಾವರ್ಧಕ ಸಂಘದ ನಿರ್ಮಾತೃ ರಾ.ಹ. ದೇಶಪಾಂಡೆ ಅವರ 2 ಸಂಪುಗಳು, ಸತ್ಯಕಾಮರ 6 ಸಂಪುಟ, ಪಂಪ ಭಾರತದ 2, ಆದಿಪುರಾಣದ 2, ಸಿದ್ಧಲಿಂಗಯ್ಯ ಅವರ ಸಮಗ್ರ ಸಂಪುಟದ 6, ಮೂಡ್ನಾಕೂಡು ಚಿನ್ನಸ್ವಾಮಿ, ಪ್ರೊ.ಎಸ್‌.ಜಿ. ಸಿದ್ದರಾಮಯ್ಯ ಅವರ ಸಂಪುಟಗಳು ಹೊರಬಂದಿವೆ. ಇವುಗಳನ್ನು ರಿಯಾಯಿತಿ ದರದಲ್ಲಿ ಓದುಗರ ಮನೆ ಬಾಗಿಲಿಗೆ ತಲುಪಿಸುವ ಕಾರ್ಯವನ್ನು ಪ್ರಾಧಿಕಾರ ಮಾಡುತ್ತಿದೆ.

* ಪ್ರಾಧಿಕಾರದ ಚಟುವಟಿಕೆಗಳಿಗೆ ಮೀಸಲಿಟ್ಟ ಹಣ ಸಾಕಾಗುತ್ತದೆಯೇ?

ಪ್ರಸ್ತುತ ಕನ್ನಡ ಮತ್ತು ಸಂಸ್ಕೃತಿ ಇಲಾಖೆಯು ₹ 1 ಕೋಟಿಯನ್ನು ಪ್ರಾಧಿಕಾರದ ವರ್ಷಪೂರ್ತಿ ಕಾರ್ಯಕ್ರಮಗಳು ಹಾಗೂ ₹ 1 ಕೋಟಿಯನ್ನು ಪುಸ್ತಕಗಳ ಸಗಟು ಖರೀದಿಗೆ ನೀಡುತ್ತಿದೆ. ಇನ್ನಷ್ಟು ಯೋಜನೆಗಳನ್ನು ರೂಪಿಸಲು ಹೆಚ್ಚು ಅನುದಾನ ಬೇಕಾಗುತ್ತದೆ. ಈ ಕುರಿತು ಸಚಿವರ ಗಮನ ಸೆಳೆಯಲಾಗಿದೆ. ಅತ್ಯುತ್ತಮ ಕೃತಿಗಳನ್ನು ಮುದ್ರಿಸಿಕೊಟ್ಟವರಿಗೆ ಈ ಸಲದಿಂದ ‘ಮುದ್ರಣ ಸೊಗಸು’ ಬಹುಮಾನವನ್ನು ನೀಡಲಾಗುತ್ತಿದೆ. ಮುದ್ರಣ ಕ್ಷೇತ್ರದಲ್ಲಿ ಬದುಕು ಸವೆಸಿದವರಿಗೆ ಮಾಸಾಶನ ನೀಡಲು ನಿರ್ಧರಿಸಲಾಗಿದೆ.

ಪರಿಶಿಷ್ಟ ಜಾತಿ ಹಾಗೂ ಪರಿಶಿಷ್ಟ ಪಂಗಡಕ್ಕೆ ಸೇರಿದ ಬರಹಗಾರರ ಚೊಚ್ಚಲ ಕೃತಿಗಳಿಗೆ ಪ್ರೋತ್ಸಾಹ ಧನ ನೀಡಲು ಆರಂಭಿಸಿದ್ದೇವೆ. ಅಲ್ಲದೇ, ಯಾವುದೇ ಪಂಗಡಕ್ಕೆ ಸೇರಿದ ಬರಹಗಾರರ ಚೊಚ್ಚಲ ಕೃತಿಗೂ ನೀಡುತ್ತಿರುವ ನೆರವು ಮುಂದುವರಿಯಲಿದೆ.

* ಪ್ರಾಧಿಕಾರವನ್ನು ಜನರ ಬಳಿಕೆ ಕೊಂಡೊಯ್ಯಲು ನೀವು ಕೈಗೊಂಡ ಇತರ ಯೋಜನೆಗಳೇನು?

ಪುಸ್ತಕ ಓದುವುದಕ್ಕೆ ಒಮ್ಮೊಮ್ಮೆ ಸಮಯ ಸಾಕಾಗದಿರಬಹುದು. ಇಂತಹ ಸಂದರ್ಭದಲ್ಲಿ ಕೇಳುವುದು ಸುಲಭ. ಕೆಲವು ಪುಸ್ತಕಗಳನ್ನು ಧ್ವನಿಮುದ್ರಣ ಮಾಡಿದ್ದು, ಅವುಗಳನ್ನು ಯೂ ಟ್ಯೂಬ್‌ನಲ್ಲಿಯೂ ಅಳವಡಿಸಲಾಗಿದೆ. ಯಾವುದೋ ಕೆಲಸ ಮಾಡುವಾಗ, ಪ್ರಯಾಣ ಮಾಡುತ್ತಿರುವಾಗಲೂ ಪುಸ್ತಕಗಳನ್ನು ಕೇಳುತ್ತಿರಬಹುದು. ಇಂತಹ ಹಲವು ಇ–ಬುಕ್‌ಗಳು ಯೂ ಟ್ಯೂಬ್‌ ಹಾಗೂ ಪ್ರಾಧಿಕಾರದ ವೆಬ್‌ಸೈಟ್‌ನಲ್ಲಿ ದೊರೆಯಲಿವೆ.

* ಪುಸ್ತಕ ಮಾರಾಟದ ಮೇಲೆ ಜಿಎಸ್‌ಟಿ ವಿಧಿಸುವ ಬಗ್ಗೆ ನಿಮ್ಮ ಅನಿಸಿಕೆ ಏನು?

ಜಿಎಸ್‌ಟಿ ತೆರಿಗೆ ವಿಧಿಸುವ ಅವಶ್ಯಕತೆಯೇ ಇಲ್ಲ. ಏಕೆಂದರೆ, ಪುಸ್ತಕ ಓದುವುದು, ಊಟ, ನಿದ್ರೆಯಂತೆಯೇ ಮೂಲಭೂತ ಅವಶ್ಯಕತೆ. ನಮ್ಮ ಒತ್ತಾಯಕ್ಕೆ ಮಣಿದು ಕೇಂದ್ರ ಸರ್ಕಾರ ಶೇ 18 ಇದ್ದ ಜಿಎಸ್‌ಟಿ ದರವನ್ನು ಶೇ 12ಕ್ಕೆ ಇಳಿಸಿದೆ. ಅದನ್ನೂ ರದ್ದು ಮಾಡುವಂತೆ ಮನವಿ ಮಾಡಿದ್ದೇವೆ.

 

ಬರಹ ಇಷ್ಟವಾಯಿತೆ?

  • 3

    Happy
  • 0

    Amused
  • 0

    Sad
  • 0

    Frustrated
  • 0

    Angry

Comments:

0 comments

Write the first review for this !