ಸಾವಿನಲ್ಲೂ ಒಂದಾದ ದಂಪತಿ

ಕುಂದಗೋಳ: ಗಂಡನ ಅಂತ್ಯ ಸಂಸ್ಕಾರದ ಕಾರ್ಯ ಮುಗಿಸಿ ಮರಳಿ ಮನೆಗೆ ಬರುವಷ್ಟರಲ್ಲಿ ಹೆಂಡತಿ ಕೂಡ ಹೃದಯಘಾತದಿಂದ ಮೃತಪಟ್ಟ ಘಟನೆ ಪಟ್ಟಣದ ಕುಂಬಾರ ಓಣಿಯಲ್ಲಿ ಭಾನುವಾರ ಜರುಗಿದೆ. 

ಬೆಳಿಗ್ಗೆ 6 ಗಂಟೆಗೆ ಫರಿದ್ದೀನ್ ಇಮಾಮಸಾಬ್ ಪಠಾಣ (74) ಹೃದಯಾಘಾತದಿಂದ ನಿಧನರಾಗಿದ್ದರು. ಅಂಜುಮನ್‌ ಖಬರಸ್ತಾನದಲ್ಲಿ ಸಂಜೆ 4 ಗಂಟೆಗೆ ಅಂತ್ಯಕ್ರಿಯೆ ನೆರವೇರಿಸಿ ಬರುವಷ್ಟರಲ್ಲಿ ಫರದ್ದೀನ್‌ ಅವರ ಪತ್ನಿ ಹುಸೇನಬೀ ಪಠಾಣ (70) ಹೃದಯಾಘಾತವಾಗಿ ಮೃತಪಟ್ಟಿದ್ದಾರೆ. ಈ ದಂಪತಿಗೆ ನಾಲ್ವರು ಪುತ್ರರು ಹಾಗು ಪುತ್ರಿ ಇದ್ದಾರೆ.  50 ವರ್ಷಗಳಿಂದ ಸಂಸಾರದ ಬಂಡಿ ಸಾಗಿಸಿದ ಈ ದಂಪತಿ ಸಾವಿನಲ್ಲೂ ಒಂದಾದರು. ಒಂದೇ ದಿನ ಇಬ್ಬರ ಮರಣದಿಂದಾಗಿ ಕುಟುಂಬದವರ ರೋದನೆ ಮುಗಿಲು ಮುಟ್ಟಿತ್ತು.