ಹುಬ್ಬಳ್ಳಿ | ಖಾಸಗಿ ಶಾಲೆಯಲ್ಲಿ ದುಬಾರಿ ಶುಲ್ಕ: ನಿಯಮ ಉಲ್ಲಂಘನೆ

ಹುಬ್ಬಳ್ಳಿ: 2024–25ನೇ ಸಾಲಿನ ಶೈಕ್ಷಣಿಕ ಚಟುವಟಿಕೆಗಳಿಗೆ ಪೂರಕವಾಗಿ ಜಿಲ್ಲೆಯಲ್ಲಿ ಸರ್ಕಾರಿ ಹಾಗೂ ಖಾಸಗಿ ಶಾಲೆಗಳಲ್ಲಿ ಮಕ್ಕಳ ದಾಖಲಾತಿ ಪ್ರಕ್ರಿಯೆ ಆರಂಭವಾಗಿದೆ. ಸರ್ಕಾರಿ ಶಾಲೆಗಳಲ್ಲಿ ಮಕ್ಕಳ ದಾಖಲಾತಿ, ಸೌಲಭ್ಯ ಎಲ್ಲವೂ ಉಚಿತವಿದ್ದು, ಖಾಸಗಿ ಶಾಲೆಗಳು ಸೌಲಭ್ಯಕ್ಕೆ ಅನುಸಾರ ಶುಲ್ಕ ನಿಗದಿಪಡಿಸಿವೆ.

ಮಕ್ಕಳ ದಾಖಲಾತಿಗೆ ಸಂಬಂಧಿಸಿದಂತೆ ಶುಲ್ಕ ನಿಗದಿ ಸೇರಿ ಕೆಲ ನಿಯಮಗಳನ್ನು ಪಾಲಿಸಬೇಕು ಎಂಬ ಸೂಚನೆ ಶಿಕ್ಷಣ ಇಲಾಖೆಯು ಎಲ್ಲಾ ಖಾಸಗಿ ಶಿಕ್ಷಣ ಸಂಸ್ಥೆಗಳಿಗೆ ನೀಡಿದೆ. ಆದರೆ, ಕೆಲ ಕಡೆ ಪಾಲನೆ ಆಗದಿರುವ ಬಗ್ಗೆ ಆರೋಪಗಳಿವೆ.

‘ಕೆಲ ಖಾಸಗಿ ಶಾಲೆಗಳು ಮಕ್ಕಳ ದಾಖಲಾತಿ ಶುಲ್ಕದ ಜೊತೆಗೆ ಭದ್ರತಾ ಠೇವಣಿ ನೆಪದಲ್ಲಿ ಪೋಷಕರಿಂದ ಒಂದಿಷ್ಟು ಹಣ ಪಡೆಯುತ್ತಿದ್ದಾರೆ.ಮಕ್ಕಳು ಶಾಲೆಯ ಪರಿಕರ, ಪೀಠೋಪಕರಣಗಳಿಗೆ ಹಾನಿ ಮಾಡಿದರೆ, ನಿಮ್ಮ ಠೇವಣಿ ಹಣದಲ್ಲಿ ಅದರ ಖರ್ಚನ್ನು ಪಡೆದು, ಉಳಿದ ಹಣವನ್ನು ವರ್ಷದ ಕೊನೆಯಲ್ಲಿ ನೀಡಲಾಗುವುದು ಎಂಬ ಹೇಳಿ ಮಕ್ಕಳನ್ನು ದಾಖಲು ಮಾಡಿಕೊಳ್ಳುತ್ತಿದ್ದಾರೆ’ ಎಂದು ಬಾಲಕಿಯ ಪೋಷಕ ರಾಮಣ್ಣ ಹಿರೇಮಠ ದೂರಿದರು. 

‘1ನೇ ತರಗತಿಗೆ ₹32 ಸಾವಿರ ಶುಲ್ಕ ಎಂದು ಖಾಸಗಿ ಶಾಲೆಯವರು ಹೇಳುತ್ತಾರೆ. ಕಡಿಮೆ ಮಾಡಲು ಕೋರಿದರೆ, ಕಂತುಗಳ ರೂಪದಲ್ಲಿ ಪಾವತಿಸಲು ತಿಳಿಸುತ್ತಾರೆ. ಆದರೆ, ಶುಲ್ಕದ ವಿವರವನ್ನು ಶಾಲೆಯ ಸೂಚನಾ ಫಲಕದಲ್ಲೂ ಅಳವಡಿಸಿಲ್ಲ’ ಎಂದು ಪೋಷಕ ಎಸ್‌.ಆರ್‌.ಕೃಷ್ಣಮೂರ್ತಿ ಆರೋಪಿಸಿದರು.

‘ಶಾಲೆಯ ಸೌಲಭ್ಯ, ಬೋಧನೆಗೆ ಅನುಗುಣವಾಗಿ ಶುಲ್ಕ ನಿಗದಿಪಡಿಸಿ, ಅದನ್ನು ಸೂಚನಾ ಫಲಕದಲ್ಲಿ ಅಳವಡಿಸಿದರೆ ಎಲ್ಲರಿಗೂ ಅನುಕೂಲ. ನಿಯಮ ಉಲ್ಲಂಘಿಸಿ ಪೋಷಕರಿಂದ ಹೆಚ್ಚು ಹಣ ವಸೂಲಿ ಮಾಡುವುದು ಸರಿಯಲ್ಲ’ ಎಂದರು.