ಬಿಸಿಯೂಟಕ್ಕಾಗಿ ನಿತ್ಯ 2 ಕಿ.ಮೀ ಓಡಾಟ ನಡೆಸುತ್ತಿರುವ ಲಾಡ್ಲಾಪುರದ 150 ಮಕ್ಕಳು!

ಚಿತ್ತಾಪುರ ತಾಲ್ಲೂಕಿನ ಲಾಡ್ಲಾಪುರ ಸರ್ಕಾರಿ ಹಿರಿಯ ಪ್ರಾಥಮಿಕ ಶಾಲೆಯ 1ರಿಂದ 3ನೇ ತರಗತಿಯ ಕನ್ನಡ ಮತ್ತು ಇಂಗ್ಲಿಷ್ ಮಾಧ್ಯಮದ ಪುಟಾಣಿಗಳು ವಿದ್ಯಾರ್ಥಿಗಳು ಮಧ್ಯಾಹ್ನದ ಊಟಕ್ಕಾಗಿ ಎರಡು ತಿಂಗಳಿಂದ ದಿನಾಲೂ 2 ಕಿ.ಮೀ ನಡೆಯುತ್ತಿದ್ದಾರೆ. ಬಿಸಿಯೂಟ ತಯಾರಿಸುವ ತಾಣಕ್ಕೆ ಹೋಗಲು ವಿದ್ಯಾರ್ಥಿಗಳು ರಾಜ್ಯ ಹೆದ್ದಾರಿ ದಾಟಿ, ಹಾವು– ಚೇಳುಗಳ ಆವಾಸ ಎನಿಸಿರುವ ದೊಡ್ಡ ಕೆರೆ ಏರಿಯನ್ನೂ ಹತ್ತಿಳಿಯಬೇಕಾಗಿದೆ. ಜಿಲ್ಲಾ ಉಸ್ತುವಾರಿ ಸಚಿವ ಪ್ರಿಯಾಂಕ್‌ ಖರ್ಗೆ ಅವರ ತವರು ಕ್ಷೇತ್ರದಲ್ಲಿ ವಿದ್ಯಾರ್ಥಿಗಳು ನಿತ್ಯ ಸಂಕಷ್ಟ ಪಡುತ್ತಿದ್ದಾರೆ. 

600 ಮಕ್ಕಳ ಅಡುಗೆಗೆ ಇರೋದು ನಾಲ್ವರು!:

ಪ್ರೌಢಶಾಲೆ ಹಾಗೂ ಪ್ರಾಥಮಿಕ ಶಾಲೆಗಳು ಬೇರೆ–ಬೇರೆ ಕಡೆ ಇವೆ. ಆದರೆ, ಅಡುಗೆ ಕೊಠಡಿ ಇರುವುದು ಮಾತ್ರ ಒಂದೇ. ಇದೇ ಸಮಸ್ಯೆಗೆ ಮೂಲಕಾರಣ. ಈ ಮೊದಲು ಪ್ರೌಢಶಾಲೆಯ ವಿದ್ಯಾರ್ಥಿಗಳು ಪ್ರಾಥಮಿಕ ಶಾಲೆಗೆ ಊಟಕ್ಕೆಂದು ಬರುತ್ತಿದ್ದರು. ಜೂನ್ ತಿಂಗಳಿನಿಂದ ಅಡುಗೆ ಕೋಣೆಯನ್ನು ಪ್ರಾಥಮಿಕ ಶಾಲೆಯಿಂದ ಪ್ರೌಢಶಾಲೆಗೆ ಸ್ಥಳಾಂತರಿಸಲಾಗಿದೆ. ಹೀಗಾಗಿ 150ಕ್ಕೂ ಅಧಿಕ ಮಕ್ಕಳು ನಿತ್ಯ ಬಿಸಿಯೂಟಕ್ಕೆ ಕಿಲೊ ಮೀಟರ್‌ಗಟ್ಟಲೇ ದೂರ ಹೋಗಿ ಬರುತ್ತಿದ್ದಾರೆ.

‘1ರಿಂದ 10ನೇ ತರಗತಿವರೆಗೆ ಒಟ್ಟು 600ಕ್ಕೂ ಅಧಿಕ ವಿದ್ಯಾರ್ಥಿಗಳಿದ್ದಾರೆ. 10 ವರ್ಷಗಳಿಂದ ಕೇವಲ ನಾಲ್ವರು ಸಿಬ್ಬಂದಿ ಅಡುಗೆ ಮಾಡಿ ಬಡಿಸುತ್ತಿದ್ದಾರೆ. ಮಕ್ಕಳ ಸಂಖ್ಯೆಗೆ ಅನುಗುಣವಾಗಿ ಅಡುಗೆ ಸಿಬ್ಬಂದಿ ನೇಮಕ ಆಗಿಲ್ಲ. ಮೊದಲಿಗೆ ಅಡುಗೆ ಸಿಬ್ಬಂದಿ ಪ್ರೌಢಶಾಲೆಯಲ್ಲಿ ಬಿಸಿಯೂಟ ತಯಾರಿಸಿ, ಬಿಸಿ ಬಿಸಿ ಅಡುಗೆಯನ್ನು 1 ಕಿ.ಮೀ ದೂರದ ಪ್ರಾಥಮಿಕ ಶಾಲೆಗೆ ನಿತ್ಯ ಹೊತ್ತೊಯ್ದು ಬಡಿಸುತ್ತಿದ್ದರು. ಆದರೆ, ಸಿಬ್ಬಂದಿಯ ಕೊರತೆಯಿಂದ ಕಳೆದೆರಡು ತಿಂಗಳಿನಿಂದ ಮಕ್ಕಳನ್ನೇ ಊಟಕ್ಕಾಗಿ ಕರೆಸಿಕೊಳ್ಳಲಾಗುತ್ತಿದೆ’ ಎಂದು ಮೂಲಗಳು ತಿಳಿಸಿವೆ.

‘ಕೆರೆಯ ದಾರಿಯುದ್ದಕ್ಕೂ ಜಾಲಿಗಿಡಗಳು ಬೆಳೆದಿದ್ದು, ಹಾವು– ಚೇಳುಗಳು ಓಡಾಡುತ್ತವೆ. ಕೆರೆಯ ರಸ್ತೆಯುದ್ದಕ್ಕೂ ಶೌಚ ಮಾಡಲಾಗುತ್ತಿದೆ. ವಿದ್ಯಾರ್ಥಿಗಳು ಮಲ–ಮೂತ್ರವನ್ನು ತುಳಿದುಕೊಂಡೇ ಹೋಗುವಂತಾಗಿದೆ. ಜೊತೆಗೆ ರೋಗದ ಭೀತಿಯೂ ಕಾಡುತ್ತಿದೆ. ರಾಜ್ಯ ಹೆದ್ದಾರಿ ದಾಟಿಕೊಂಡು ಹೋಗುವಾಗ ವೇಗವಾಗಿ ಸಂಚರಿಸುವ ವಾಹನಗಳಿಂದ ಮಕ್ಕಳಿಗೆ ಅಪಘಾತವಾದರೆ ಹೊಣೆ ಯಾರು’ ಎಂಬುದು ಸಾರ್ವಜನಿಕರ ಪ್ರಶ್ನೆ.

‘ಬಿಸಿಯೂಟ ತಯಾರಿಕೆಗೆ ಇಬ್ಬರು ಸಿಬ್ಬಂದಿಯನ್ನು ತಕ್ಷಣ ನೇಮಿಸುವಂತೆ ಅಲ್ಲಿನ ಪಿಡಿಒಗೆ ಹೇಳಿದ್ದೇನೆ. ಆದರೂ ವಿಳಂಬ ಮಾಡಿದ್ದಾರೆ. ಪ್ರತ್ಯೇಕ ಬಿಸಿಯೂಟ ಕೇಂದ್ರ ತೆರೆಯುವಂತೆ ಜಿಲ್ಲಾ ಪಂಚಾಯಿತಿಗೆ ಹಾಗೂ ಅಕ್ಷರದಾಸೋಹ ಇಒಗೆ ಪತ್ರ ಬರೆದಿದ್ದೇನೆ’ ಎಂದು ಚಿತ್ತಾಪುರದ ಅಕ್ಷರ ದಾಸೋಹದ ಸಹಾಯಕ ನಿರ್ದೇಶಕ ಪ್ರಕಾಶ ನಾಯ್ಕೋಡಿ ‘ಪ್ರಜಾವಾಣಿ’ಗೆ ಪ್ರತಿಕ್ರಿಯಿಸಿದ್ದಾರೆ.