ಕಲಬುರಗಿಯಲ್ಲಿ ಅಖಿಲ ಕರ್ನಾಟಕ ಪ್ರಥಮ ಗಜಲ್‌ ಸಮ್ಮೇಳನ: ಘಲ್‌ ಘಲ್‌ ನಿನಾದ

ಗಜಲ್‌ ನಾದಲೋಕ ನಿನ್ನ ಜೊತೆ ಜೊತೆಯಲಿ.. ಎಂಬ ಎರಡು ಗಜಲ್‌ ಸಂಕಲನ ಕೃತಿಗಳನ್ನು ಕಾರ್ಯಕ್ರಮದಲ್ಲಿ ಬಿಡುಗಡೆ ಮಾಡಲಾಯಿತು. ಗಜಲ್‌ ನಾದಲೋಕವನ್ನು ಬಸಮ್ಮ ಸಜ್ಜನ್‌ ಸಂಪಾದಿಸಿದ್ದು ನೂರು ಗಜಲ್‌ ಕವಿಗಳ ಸಂಕಲನವಾಗಿದೆ. ನಿನ್ನ ಜೊತೆ ಜೊತೆಯಲಿ.. ಸಮಗ್ರ ಗಜಲ್‌ ಸಂಕಲನ ಲೇಖಕ ಸಿದ್ಧರಾಮ ಹೊನ್ಕಲ್‌ ಅವರ ಕೃತಿಯಾಗಿದೆ.

ಗಜಲ್‌ ಉರ್ದು ಸಾಹಿತ್ಯದ ಒಂದು ಪ್ರಕಾರವಾಗಿದ್ದು ರಾಯಚೂರಿನ ಶಾಂತರಸರಿಂದ 70ರ ದಶಕದಲ್ಲಿ ಕನ್ನಡದಲ್ಲೂ ರಚನೆ ಪ್ರಾರಂಭವಾಯಿತು. ಅದಕ್ಕೆ ಛಂದಸ್ಸು ರೂಪಿಸಿಕೊಟ್ಟಿದ್ದು ಅವರೇ. ಇದೀಗ ರಾಜ್ಯದಾದ್ಯಂತ ಸುಮಾರು 300ಕ್ಕೂ ಹೆಚ್ಚು ಗಜಲ್‌ಕಾರರಿದ್ದಾರೆ. 2017–18ರಲ್ಲಿ ಗಜಲ್‌ ಅಕಾಡೆಮಿ ನೋಂದಣಿಯಾಗಿದೆ.

ಸಮ್ಮೇಳನಾಧ್ಯಕ್ಷೆ ಪ್ರಭಾವತಿ ಎಸ್‌. ದೇಸಾಯಿ ಶಾಂತರಸರಿಂದ ಪ್ರೇರಣೆಗೊಂಡು ಗಜಲ್‌ ರಚನೆ ಶುರು ಮಾಡಿದರು. ಒಟ್ಟು ಅವರ 23 ಕೃತಿಗಳು ಪ್ರಕಟವಾಗಿವೆ. ಅವರು ಸ್ವಾತಂತ್ರ್ಯಪೂರ್ವದಲ್ಲೇ ರಾಯಚೂರಿನಲ್ಲಿ ಹುಟ್ಟಿದ್ದು ಕಲಬುರಗಿಯಲ್ಲಿ ವಿದ್ಯಾಭ್ಯಾಸ ಮಾಡಿ ವಿಜಯಪುರವನ್ನು ಕರ್ಮಭೂಮಿಯಾಗಿಸಿಕೊಂಡರು. ಕಾರ್ಯಕ್ರಮದಲ್ಲಿ ಅವರಿಗೆ ಕಲಬುರಗಿ ಗಜಲ್‌ಕಾರರು ಬಾಗಿನ ಅರ್ಪಿಸಿ ಗೌರವ ಸಲ್ಲಿಸಿದರು.