ನಿಲ್ದಾಣಕ್ಕಿಲ್ಲ ಬಸ್ ಸಂಪರ್ಕ!
ವಿಮಾನ ನಿಲ್ದಾಣದ ಸೇವೆ ಶುರುವಾಗಿ ಇಲ್ಲಿಯವರೆಗೂ ನಗರದಿಂದ ನೇರವಾಗಿ ಬಸ್‌ಗಳ ವ್ಯವಸ್ಥೆ ಇಲ್ಲ ಎಂದು ನಿಲ್ದಾಣದ ಅಧಿಕಾರಿ ಬೇಸರ ವ್ಯಕ್ತಪಡಿಸಿದರು. ‘ನಿಲ್ದಾಣದಲ್ಲಿ ಭದ್ರತಾ ಸಿಬ್ಬಂದಿ ಸ್ವಚ್ಛತಾ ಸಿಬ್ಬಂದಿ ತಾಂತ್ರಿಕ ವರ್ಗ ಸೇರಿ 100ಕ್ಕೂ ಹೆಚ್ಚು ನೌಕರರು ಕೆಲಸ ಮಾಡುತ್ತಿದ್ದಾರೆ. ಕೆಲವರು ಬೈಕ್‌ಗಳನ್ನೇ ಅವಲಂಬಿಸಿದ್ದಾರೆ. ಕಲಬುರಗಿ– ಸೇಡಂ ರಸ್ತೆಯಲ್ಲಿ ರಾತ್ರಿ ವೇಳೆ ಟ್ರಕ್‌ ಲಾರಿಗಳು ಸಂಚರಿಸುತ್ತವೆ. ರಾತ್ರಿ ವೇಳೆ ಕಣ್ಣು ಕೊರೆಯುವ ಲೈಟ್ ಗಾಳಿ ಮಳೆಯಲ್ಲಿ ಜೀವ ಭಯದಲ್ಲಿ ಓಡಾಡುವಂತಾಗಿದೆ. ರಾತ್ರಿ ವಿಮಾನಕ್ಕೆ ಬರುವವರು ಸ್ವಂತ ವಾಹನವನ್ನೇ ಅವಲಂಬಿಸುತ್ತಾಗಿದೆ’ ಎನ್ನುತ್ತಾರೆ ಹೆಸರು ಬಹಿರಂಗಪಡಿಸಲು ಇಚ್ಛಿಸದ ನೌಕರ. ಈ ಬಗ್ಗೆ ‘ಪ್ರಜಾವಾಣಿ’ಗೆ ಪ್ರತಿಕ್ರಿಯಿಸಿದ ಕೆಕೆಆರ್‌ಟಿಸಿಯ ವ್ಯವಸ್ಥಾಪಕ ನಿರ್ದೇಶಕ ಎಂ.ರಾಚಪ್ಪ ‘ನಿಲ್ದಾಣದ ಅಧಿಕಾರಿಗಳು ವಿಮಾನಗಳ ಹಾರಾಟದ ಸಮಯದ ಮಾಹಿತಿಯನ್ನು ಸಂಸ್ಥೆಗೆ ನೀಡಿದರೆ ಅದಕ್ಕೆ ಅನುಗುಣವಾಗಿ ಬಸ್‌ಗಳ ವ್ಯವಸ್ಥೆ ಮಾಡುತ್ತೇವೆ. ಎರಡು ತಿಂಗಳವರೆಗೆ ಈಗಿರುವ ಸಾಧಾರಣ ಬಸ್‌ಗಳನ್ನು ಓಡಿಸಿ ಆ ಬಳಿಕ ಹೈಫೈ ಬಸ್‌ಗಳ ವ್ಯವಸ್ಥೆ ಮಾಡುತ್ತೇವೆ’ ಎಂದರು.
