ಕಮಲಾಪುರ: 122 ತರಗತಿ ಕೋಣೆ ಶಿಥಿಲ

ಕಮಲಾಪುರ ಕ್ಲಸ್ಟರ್ 20, ಮಹಾಗಾಂವ 20, ಕಲಮೂಡ 6, ಡೊಂಗರಗಾಂವ 13, ಸೊಂತ 2, ಓಕಳಿ 2, ನಾಗೂರ 1, ಜೀವಣಗಿ 6, ಅಂಕಲಗಿ 25, ಅವರಾದ 13, ಕಲ್ಲಹಂಗರಗಾ 14, ಹರಸೂರ 13 ಸೇರಿ ಒಟ್ಟು 122 ಕೋಣೆಗಳು ತರಗತಿ ನಡೆಸುವ ಸ್ಥಿತಿಯಲ್ಲಿಲ್ಲ. ಇವುಗಳನ್ನು ತೆರವುಗೊಳಿಸಬೇಕು ಎಂದು ಅಧಿಕಾರಿಗಳು ಈಚೆಗೆ ಇಲಾಖೆಗೆ ವರದಿ ನೀಡಿದ್ದಾರೆ.

ಇದರಲ್ಲಿ ದಸ್ತಾಪುರ ಹಿರಿಯ ಪ್ರಾಥಮಿಕ ಶಾಲೆ, ಕಮಲಾಪುರ ಬಾಲಕರ ಪ್ರೌಢಶಾಲೆ, ನಾವದಗಿ (ಬಿ) ಹಿರಿಯ ಪ್ರಾಥಮಿಕ ಶಾಲೆ ಸಂಪೂರ್ಣ ಶಿಥಿಲಗೊಂಡಿವೆ. ಸ್ವಲ್ಪ ಮಳೆಯಾದರೆ ಎಲ್ಲ ಕೋಣೆಗಳ ಚಾವಣಿಯಿಂದ ನೀರು ಜಿನುಗುತ್ತದೆ. ಈ ಕಟ್ಟಡಗಳನ್ನು ಸಂಪೂರ್ಣ ತೆರವುಗೊಳಿಸಿ ಹೊಸ ಕಟ್ಟಡ ನಿರ್ಮಾಣ ತುರ್ತಾಗಿ ಮಾಡಬೇಕಾಗಿದೆ.

ದಸ್ತಾಪುರ ಶಾಲೆಗೆ ವಿವೇಕ ಯೋಜನೆಯಡಿ 6 ಕೋಣೆ ಮಂಜೂರಾಗಿವೆ. ಹೊಸದಾಗಿ ಜಾಗ ಸಿಕ್ಕಿಲ್ಲ. ಹಳೆ ಕಟ್ಟಡ ಇರುವ ಜಾಗದಲ್ಲೇ ಕಟ್ಟಡ ನಿರ್ಮಿಸುವ ಅನಿವಾರ್ಯ ಇದೆ. ಆದರೆ ಕಟ್ಟಡ ತೆರವುಗೊಳಿಸುವುದು ಸವಾಲಿನ ಕೆಲಸವಾಗಿದೆ. ತೆರವುಗೊಳಿಸಿದರೆ ತರಗತಿ ನಡೆಸುವುದೆಲ್ಲಿ ಎಂಬ ಸಮಸ್ಯೆ ಕಾಡುತ್ತಿದೆ. ಹೀಗಾಗಿ ಕಟ್ಟಡ ಕಾರ್ಯ ವಿಳಂಬವಾಗುತ್ತಿದೆ.

ಕಮಲಾಪುರ ಬಾಲಕರ ಪ್ರೌಢಶಾಲೆ ಸುಮಾರು 70 ವರ್ಷ ಹಳೆಯ ಕಟ್ಟಡವಾಗಿದೆ. ಬುನಾದಿ ಕುಸಿದು ಭೂಮಿ ಸಮವಾಗಿದೆ. ಪಕ್ಕದಲ್ಲೇ ನಾಲೆ ಹರಿಯುತ್ತದೆ. ಸ್ವಲ್ಪ ಮಳೆಯಾದರೆ ನಾಲೆಯ ನೀರು, ಕೆಸರು ತರಗತಿ ಕೋಣೆಯೊಳಕ್ಕೆ ಸೇರಿಕೊಳ್ಳುತ್ತದೆ. ಮೊಣಕಾಲುವರೆಗೆ ನೀರು ನಿಲ್ಲುತ್ತದೆ. ಇದೆಲ್ಲವನ್ನೂ ಸ್ವಚ್ಛಗೊಳಿಸಲು ವಾರ ಕಳೆಯಬೇಕು. ಆವರಣದಲ್ಲಿ ನೀರು ನಿಂತು ಕೆರೆಯಂತೆ ಭಾಸವಾಗುತ್ತದೆ. ಈ ಶಾಲೆ ಕೆಪಿಎಸ್‌ಸಿ ಆಗಿದೆ. ಹೀಗಾಗಿ ಕೆಲವೇ ದಿನಗಳಲ್ಲಿ ಹೊಸ ಕಟ್ಟಡ ನಿರ್ಮಾಣ ಮಾಡಲಾಗುವುದು ಎಂದು ಅಧಿಕಾರಿಗಳು ಹೇಳುತ್ತಲೇ ಕಾಲ ಕಳೆಯುತ್ತಿದ್ದಾರೆ. ನಾವದಗಿ (ಬಿ)ಯಲ್ಲಿ ನಾಲ್ಕು ಕೋಣೆ ನಿರ್ಮಿಸಲು ಕೆಲ ದಿನಗಳ ಹಿಂದೆ ಪ್ರಸ್ತಾವ ಸಲ್ಲಿಸಲಾಗಿದೆ.

ಹರಸೂರ ಕನ್ಯಾ ಹಿರಿಯ ಪ್ರಾಥಮಿಕ ಶಾಲೆಗೆ ಕಟ್ಟಡವೇ ಇಲ್ಲ. ಈ ಹಿಂದೆ ಸರ್ಕಾರಿ ಬಾಲಕರ ಹಿರಿಯ ಪ್ರಾಥಮಿಕ ಶಾಲೆಯಲ್ಲಿ ತರಗತಿ ನಡೆಸಲಾಗುತ್ತಿತ್ತು. ಕಳೆದ ವರ್ಷದಿಂದ ಸರ್ಕಾರಿ ಪ್ರೌಢಶಾಲೆ ಕಟ್ಟಡದಲ್ಲಿ ತರಗತಿ ನಡೆಸಲಾಗುತ್ತಿದೆ. ಈ ಶಾಲೆಗೆ ಸೂಕ್ತ ಸ್ಥಳ ಗುರುತಿಸಿ ಸ್ವಂತ ಕಟ್ಟಡ ನಿರ್ಮಿಸುವ ಅಗತ್ಯ ಇದೆ.

ತಾಂಡಾಗಳಲ್ಲಿ ಮಕ್ಕಳ ಸಂಖ್ಯೆ ಕ್ಷೀಣ:

ಕೆಲವು ಗ್ರಾಮ ಸೇರಿದಂತೆ ತಾಂಡಾಗಳಲ್ಲಿ ಮಕ್ಕಳ ಸಂಖ್ಯೆ ಕ್ಷೀಣಿಸುತ್ತಿದೆ. ಮಕ್ಕಳ ಸಂಖ್ಯೆ ಕಡಿಮೆಯಾಗಿ ಪಟವಾದ ತಾಂಡಾ, ಡೋರ ಜಂಬಗಾ ತಾಂಡಾ, ಬಸವಣ ತಾಂಡಾ ಶಾಲೆ ಮುಚ್ಚಲಾಗಿದೆ. ಇದರಲ್ಲಿ ಪಟವಾದ ತಾಂಡಾ ಶಾಲೆ ಮರು ಆರಂಭಿಸಲಾಗುತ್ತಿದೆ. ತಾಲ್ಲೂಕಿನ ವಿವಿಧ 5 ಶಾಲೆಗಳಲ್ಲಿ ಒಬ್ಬರೇ ಶಿಕ್ಷಕರಿದ್ದಾರೆ. ಇಂತಹ ಕಡೆಗಳಲ್ಲಿ ಅತಿಥಿ ಶಿಕ್ಷಕರನ್ನು ನೇಮಿಸಲಾಗಿದೆ.

ಶೌಚಾಲಯ ನಿರುಪಯುಕ್ತ:

ಇಲಾಖೆ ದಾಖಲೆ ಪ್ರಕಾರ ಎಲ್ಲ ಶಾಲೆಗಳಲ್ಲಿ ಶೌಚಾಲಯ ನಿರ್ಮಾಣ ಮಾಡಲಾಗಿದೆ. ಕೆಲವು ಶಾಲೆಗಳಲ್ಲಿ ಶೌಚಾಲಯಗಳಿಲ್ಲ. ಶೌಚಾಲಯಗಳಿರುವ ಬಹುತೇಕ ಕಡೆಗಳಲ್ಲಿ ಬಳಸುವ ಸ್ಥಿತಿಯಲಿಲ್ಲ. ಕಳಪೆ ಕಾಮಗಾರಿ, ಸಮರ್ಪಕ ನೀರಿನ ಕೊರತೆ ಇದಕ್ಕೆ ಕಾರಣವಾಗಿದೆ.

ಅತಿ ಹೆಚ್ಚು ಖಾಸಗಿ ಶಾಲೆಗಳಿಗೆ ಅನುಮತಿ: ಕಮಲಾಪುರ, ಮಹಾಗಾಂವ ಕ್ರಾಸ್ ಸೇರಿದಂತೆ ತಾಲ್ಲೂಕಿನಲ್ಲಿ ಅತಿ ಹೆಚ್ಚು ಖಾಸಗಿ ಶಾಲೆಗಳಿಗೆ ಪರವಾನಗಿ ನೀಡಲಾಗಿದೆ. ಇದರಿಂದ ಸರ್ಕಾರಿ ಶಾಲೆಗಳಲ್ಲಿ ದಾಖಲಾತಿ ಕಡಿಮೆಯಾಗಿ ಮುಚ್ಚುವ ಪರಿಸ್ಥಿತಿಗೆ ತಲುಪಿವೆ. ಕೆಲವು ಶಾಲೆಗಳಲ್ಲಿ ಅನಧಿಕೃತವಾಗಿ ತರಗತಿಗಳನ್ನು ನಡೆಸಲಾಗುತ್ತಿದೆ. ಅಧಿಕಾರಿಗಳ ಗಮನದಲ್ಲಿದ್ದರೂ  ಸೂಕ್ತ ಕ್ರಮ ಕೈಗೊಳ್ಳುತ್ತಿಲ್ಲ ಎಂದು ಜನ ಆರೋಪಿಸುತ್ತಾರೆ.

70 ಕಿ.ಮೀ ಅಂತರದದಲ್ಲಿ ಬಿಇಒ ಕಚೇರಿ:

ಕ್ಷೇತ್ರ ಶಿಕ್ಷಣಾಧಿಕಾರಿ ಕಚೇರಿ ಜಿಲ್ಲಾ ಕೇಂದ್ರದಲ್ಲಿದೆ. ಕಮಲಾಪುರ ತಾಲ್ಲೂಕಿನ ಗಡಿ ಗ್ರಾಮಗಳಾದ ನೀಲಕೂಡ, ಗೊಬ್ಬರವಾಡಿ, ಕಾಳಂದರ್ಗಿ ಮತ್ತಿತರ ಗ್ರಾಮಗಳು ಸುಮಾರು 70 ಕಿ.ಮೀ ಅಂತರದಲ್ಲಿವೆ. ಕಚೇರಿ ಕೆಲಸವಿದ್ದರೆ ದಿನವಿಡೀ ಕಳೆಯಬೇಕು. ಒಬ್ಬರು, ಇಬ್ಬರು ಇರುವ ಶಾಲೆಗಳಲ್ಲಿ ಒಬ್ಬ ಶಿಕ್ಷಕ ಕಚೇರಿ ಕೆಲಸಕ್ಕೆ ತೆರಳಿದರೆ ಆ ದಿನ ಶಾಲೆ ಸಂಪೂರ್ಣ ರಜೆ ಇದ್ದಂತೆ ಆಗುತ್ತದೆ.