ಮಡಿಕೇರಿ ದಸರೆ | ಇರುವುದು ಒಂಬತ್ತೇ ದಿನ; ನಡೆದಿಲ್ಲ ಭರದ ಸಿದ್ಧತೆ

ಸ್ಪಷ್ಟವಾಗಿ ಅನುದಾನ ಘೋಷಣೆಯಾಗದೇ ಇರುವುದರಿಂದ ಸಹಜವಾಗಿಯೇ ಕಾರ್ಯಕ್ರಮಗಳನ್ನು ರೂಪಿಸಲು ಸಾಧ್ಯವಾಗುತ್ತಿಲ್ಲ. ಸಾಕಷ್ಟು ಮುಂಚಿತವಾಗಿಯೇ ಹೆಚ್ಚಿನ ಅನುದಾನ ನೀಡಬೇಕು ಎಂಬ ಒತ್ತಾಯ ದಸರಾ ಪೂರ್ವಸಿದ್ಧತಾ ಸಭೆಯಲ್ಲಿ ವ್ಯಕ್ತವಾದರೂ, ಸರ್ಕಾರ ಅನುದಾನ ಘೋಷಣೆಗೆ ಮೀನಾಮೇಷ ಎಣಿಸುತ್ತಿದೆ. ಇದರಿಂದ ಎಲ್ಲ ಪೂರ್ವಸಿದ್ಧತಾ ಕಾರ್ಯಗಳೂ ಅಂಬೆಗಾಲಿಡುತ್ತಿವೆ.

ಮುಖ್ಯವಾಗಿ, ಕರಗೋತ್ಸವ ಸಂಚರಿಸುವ ಎಲ್ಲಾ ಮಾರ್ಗಗಳು ಪರಿಪೂರ್ಣವಾಗಿ ಇನ್ನೂ ಸಿದ್ಧಗೊಂಡಿಲ್ಲ. ಬಹುತೇಕ ಎಲ್ಲ ಕಡೆ ಗುಂಡಿಗಳೇ ಇದ್ದು, ಗುಂಡಿ ಇಲ್ಲದ ರಸ್ತೆಯನ್ನು ಎಷ್ಟು ಹುಡುಕಿದರೂ, ಸಿಗದಂತಹ ಸ್ಥಿತಿ ನಗರದಲ್ಲಿದೆ. ಇದುವರೆಗೂ ಮಳೆ ಎಂಬ ಕಾರಣವನ್ನು ಜನಪ್ರತಿನಿಧಿಗಳು, ಅಧಿಕಾರಿಗಳು ನೀಡುತ್ತಿದ್ದರು. ಆದರೆ, ಮಳೆ ನಿಂತು ವಾರವಾದರೂ ಗುಂಡಿ ಮುಚ್ಚುವ ಕಾಮಗಾರಿ ಆಮೆಗತಿಯಲ್ಲಿದೆ. ಭರದ ಸಿದ್ಧತೆಗಳು ಎಲ್ಲೂ ಕಾಣುತ್ತಿಲ್ಲ.

ಈ ಬಾರಿ ಹೆಚ್ಚಿನ ಮಳೆ ಬಿದ್ದಿರುವುದರಿಂದ ಹಾಗೂ ಮಳೆ ಬಿರುಸೂ ಅಧಿಕಗೊಂಡಿದ್ದರಿಂದ ದಪ್ಪಗಾತ್ರದ ಕಲ್ಲುಗಳು ಹರಿಯುವ ನೀರಿನೊಂದಿಗೆ ಕೊಚ್ಚಿಕೊಂಡು ಬಂದು ರಸ್ತೆಯಲ್ಲೆಲ್ಲ ಆವರಿಸಿವೆ. ಕೆಲವೊಂದು ಕಡೆ ಇಂತಹ ಕಲ್ಲುಗಳ ಮೇಲೆ ದ್ವಿಚಕ್ರ ವಾಹನಗಳ ಚಕ್ರಗಳು ಹತ್ತಿ ಜಾರಿ ಬಿದ್ದ ಉದಾಹರಣೆಗಳೂ ಇವೆ. ಇಂತಹ ಕಲ್ಲುಗಳನ್ನು ಕರಗೋತ್ಸವಕ್ಕೆ ಅಡ್ಡಿ ಎಂದು ಯಾರೂ ಭಾವಿಸಿದಂತಿಲ್ಲ. ಉತ್ಸವಕ್ಕೆ ಇನ್ನು ಕೆಲವೇ ದಿನಗಳಿದ್ದರೂ ಇಂತಹ ಕಲ್ಲುಗಳೇ ಎಲ್ಲೆಡೆ ಕಾಣಿಸುತ್ತಿವೆ. ಇದನ್ನು ತೆಗೆಯುವ ಕಾರ್ಯಕ್ಕೆ ನಗರಸಭೆ ಇನ್ನೂ ಆಸಕ್ತಿ ತೋರಿಲ್ಲ.

ಕರಗೋತ್ಸವ ಆರಂಭವಾಗುವ ಪಂಪಿನಕೆರೆಯಿಂದ ಹಿಡಿದು ಕರಗಗಳು ಸಂಚರಿಸುವ ಮಾರ್ಗದಲ್ಲಿ ಗುಂಡಿ ಬೀಳದ ಹಾಗೆ ಶಾಶ್ವತ ಕಾಮಗಾರಿಗಳನ್ನು ಕೈಗೊಳ್ಳಬೇಕು ಎನ್ನುವ ಕನಿಷ್ಠ ಚಿಂತನೆಯೂ ಯಾರಿಗೂ ಬಂದಂತಿಲ್ಲ. ಕ್ಯಾನ್ಸರ್‌ನಂತೆ ಉಂಟಾಗುವ ಗುಂಡಿಗಳು ವರ್ಷಂಪ್ರತಿ ಹೆಚ್ಚುತ್ತಲೇ ಇದೆ. ಇದಕ್ಕಾಗಿ ಪ್ರತಿ ವರ್ಷ ಲಕ್ಷಾಂತರ ರೂಪಾಯಿಯನ್ನು ವ್ಯಯಿಸಲಾಗುತ್ತಿದೆ. ಒಮ್ಮೆ ಶಾಶ್ವತ ಕಾಮಗಾರಿ ನಡೆಸಿದರೆ ಪ್ರತಿ ವರ್ಷ ಗುಂಡಿ ಮುಚ್ಚುವುಕ್ಕೆ ಖರ್ಚಾಗುವ ಹಣವೂ ಉಳಿಯುತ್ತದೆ. ಆದರೂ ಈ ಕುರಿತು ಯಾರೊಬ್ಬರೂ ಗಂಭೀರ ಪ್ರಯತ್ನಕ್ಕೆ ಕೈ ಹಾಕಿಲ್ಲ.