ಅಳವಂಡಿ: ಯುವಕರು ಇತ್ತೀಚಿನ ದಿನಗಳಲ್ಲಿ ಸಾಮಾಜಿಕ ಜಾಲತಾಣದಲ್ಲಿ ಹೆಚ್ಚು ಸಮಯ ವ್ಯರ್ಥ ಮಾಡುತ್ತಿದ್ದು, ಅವುಗಳನ್ನು ದುರ್ಬಳಕೆ ಮಾಡಿಕೊಳ್ಳಬಾರದು. ಕೆಲವೊಂದು ಸೂಕ್ಷ್ಮ ವಿಷಯಗಳು ಆಶಾಂತಿಗೆ ಕಾರಣವಾಗುತ್ತಿವೆ. ಸಾಮಾಜಿಕ ಜಾಲತಾಣಕ್ಕೆ ಏನಾದರೂ ಹಾಕುವಾಗ ವಿಚಾರ ಮಾಡಬೇಕು ಎಂದು ಸಿಪಿಐ ಮಹಾಂತೇಶ ಸಜ್ಜನ ಹೇಳಿದರು.
ಗ್ರಾಮದ ಮರಿಯಮ್ಮ ದೇವಸ್ಥಾನದಲ್ಲಿ ಅಳವಂಡಿ ಪೋಲಿಸ ಠಾಣೆಯ ವತಿಯಿಂದ ನಡೆದ ಅಪರಾಧ ಪ್ರಕರಣ, ಕಳವು ಪ್ರಕರಣ ತಡೆಗಟ್ಟುವ ಹಾಗೂ ಸಾಮಾಜಿಕ ಜಾಲತಾಣದ ದುರ್ಭಳಕೆ ಹಾಗೂ ಇತರ ವಿಷಯದ ಕುರಿತು ನಡೆದ ಜಾಗೃತಿ ಕಾರ್ಯಕ್ರಮದಲ್ಲಿ ಶುಕ್ರವಾರ ಮಾತನಾಡಿದರು.
ಸಾರ್ವಜನಿಕರು ಮನೆ ಬಿಟ್ಟಿ ಬೇರೆ ಊರಿಗೆ ತೆರಳಿದಾಗ ಪಕ್ಕದ ಮನೆಯವರಿಗೆ ಮಾಹಿತಿ ನೀಡಬೇಕು. ಪೋಲಿಸ್‌ ಠಾಣೆಗೆ ಮಾಹಿತಿ ನೀಡಿದರೆ, ಕಳ್ಳತನದ ಪ್ರಕರಣವನ್ನು ತಡೆಗಟ್ಟಬಹುದು. ಮನೆಯಲ್ಲಿ ಬೆಳೆಬಾಳುವ ವಸ್ತು ನಗದು ಹಣ ಇಡಬೇಡಿ. ಇವುಗಳ ರಕ್ಷಣೆಗೆ ಬ್ಯಾಂಕ್ ಲಾಕರನ್ನು ಬಳಸಬೇಕು. ಗ್ರಾಮದಲ್ಲಿ ಕಳ್ಳತನ ಪ್ರಕರಣ ನಡೆದರೆ, ಸ್ಥಳದಲ್ಲಿ ಯಾರೂ ಅಡ್ಡಾಡಬಾರದು. ಅಲ್ಲಿ ಯಾವುದೇ ವಸ್ತುವನ್ನು ಮುಟ್ಟಬಾರದು. ಇದು ಪ್ರಕರಣ ಪತ್ತಗೆ ಸಹಕಾರಿಯಾಗಲಿದೆ. ಯಾವುದೇ ಸಣ್ಣ ಪುಟ್ಟ ಸಮಸ್ಯಗಳನ್ನು ದೊಡ್ಡದಾಗಿ ಬಿಂಬಿಸಬೇಡಿ. ಇದು ನಮ್ಮ ಒಗ್ಗಟ್ಟನ್ನು ಹಾಳು ಮಾಡಲಿದೆ. ಶಾಂತಿ ಸೌಹಾರ್ದದಿಂದ ಬಾಳಿದರೆ ಅಭಿವೃದ್ಧಿ ಸಾಧ್ಯವಾಗಲಿದೆ ಎಂದರು.
