ಕೊಪ್ಪಳ: ಅಕ್ಷರ ಪ್ರೀತಿ ಹಂಚುವ ಕಾಯಕಯೋಗಿಗಳು

ಇದು ಜಿಲ್ಲೆಯ ಕುಕನೂರು ತಾಲ್ಲೂಕಿನ ಭಾನಾಪುರದ ವೀರಣ್ಣ ಕೆ. ಪತ್ತಾರ ಹಾಗೂ ಕೊಪ್ಪಳದ ವಿರೂಪಾಕ್ಷಪ್ಪ ಮುರಳಿ ಅವರ ನೆನಪಿನ ಸುರಳಿಗಳು. 63 ವರ್ಷದ ವೀರಣ್ಣ ಹಾಗೂ 60 ವರ್ಷದ ವಿರೂಪಾಕ್ಷಪ್ಪ ಅವರು ಈಗಲೂ ಅದೇ ಹುಮ್ಮಸ್ಸಿನಿಂದ ಪತ್ರಿಕೆ ವಿತರಣೆ ಜವಾಬ್ದಾರಿ ನಿರ್ವಹಿಸುತ್ತಾರೆ.

ಇದೊಂದು ಉದಾಹರಣೆಯಷ್ಟೇ. ಬಹುತೇಕರು ಬೆಳಗಿನ ಜಾವದ ಸಕ್ಕರೆಯಂಥ ಸಿಹಿನಿದ್ದೆಯ ಸಮಯದಲ್ಲಿ ಆರಾಮವಾಗಿ ಮಲಗಿದ್ದರೆ, ಪತ್ರಿಕೆ ವಿತರಕರಿಗೆ ಅದು ದುಡಿಮೆಯ ಅಮೃತ ಕಾಲ. ನಾಲ್ಕು ಗಂಟೆಗೆಲ್ಲ ಎದ್ದು ಮುದ್ರಣಾಲಯಗಳಿಂದ ಬರುವ ಪತ್ರಿಕೆಯ ಬಂಡಲ್‌ಗಳನ್ನು ಮಟ್ಟಸವಾಗಿ ಜೋಡಿಸಿಕೊಂಡು ಮನೆಮನೆಗೆ ಹೋಗಿ ಹಂಚಿಕೆ ಮಾಡುತ್ತಾರೆ. ಗಾಳಿ, ಮಳೆ, ಚಳಿ ಇದ್ಯಾವುದನ್ನೂ ಲೆಕ್ಕಸದೇ ಅವಿರತವಾಗಿ ಪತ್ರಿಕೆಗಳು ಮತ್ತು ಓದುಗರ ನಡುವೆ ಸೇತುವೆಯಾಗಿ ಪತ್ರಿಕಾ ವಿತರಕರು ಕೆಲಸ ಮಾಡುತ್ತಿದ್ದಾರೆ. ಹೀಗಾಗಿ ಅವರನ್ನು ‘ಅಕ್ಷರ ಪ್ರೀತಿ ಹಂಚುವ ಕಾಯಕಯೋಗಿಗಳು’ ಎಂತಲೂ ಕರೆಯುತ್ತಾರೆ.

ಸಂಕಷ್ಟದಲ್ಲಿಯೂ ಕೆಲಸ: ಕೋವಿಡ್ ಸೋಂಕು ವ್ಯಾಪಕವಾಗಿದ್ದ ಸಮಯದಲ್ಲಿ ಜನ ಮನೆಬಿಟ್ಟು ಹೊರಗಡೆ ಬರಲು ಹಿಂದೇಟು ಹಾಕುತ್ತಿದ್ದರು. ಲಾಕ್‌ಡೌನ್‌ ಕಷ್ಟದ ಸಮಯದಲ್ಲಿ ಎಲ್ಲರೂ ಸುರಕ್ಷತೆಯ ಮೊರೆ ಹೋಗಿದ್ದರೆ ಪತ್ರಿಕಾ ವಿತರಕರು ಜೀವದ ಹಂಗು ತೊರೆದು ಕೆಲಸ ಮಾಡಿ ಮನೆಮನೆಗಳಿಗೆ ಹೋಗಿ ಪತ್ರಿಕೆಗಳನ್ನು ತಲುಪಿಸಿದ್ದಾರೆ. ವೈಯಕ್ತಿಕವಾಗಿ ಅವರ ಕುಟುಂಬ ಸಂಕಷ್ಟಕ್ಕೆ ಸಿಲುಕಿದಾಗಲೂ ಪತ್ರಿಕೆ ಹಂಚುವ ಕಾಯಕ ಮಾತ್ರ ಅವಿರತ.

ಪತ್ರಿಕೆಗಳನ್ನು ಹಂಚುವ ಸಮಯದಲ್ಲಿ ದುರ್ಗಮ ಹಾದಿ, ಪ್ರಾಣಿಗಳ ದಾಳಿಯ ಭೀತಿ, ಅನಾರೋಗ್ಯ, ಮಳೆ, ಪತ್ರಿಕೆ ಹಾಕಲು ಹುಡುಗರೇ ಸಿಗುತ್ತಿಲ್ಲ ಎನ್ನುವ ಸಮಸ್ಯೆಗಳ ನಡುವೆಯೂ ಪತ್ರಿಕಾ ವಿತರಕರು ತಮ್ಮ ವೃತ್ತಿಬದ್ಧತೆ ಮೆರೆದಿದ್ದಾರೆ. ಈ ಕಾಯಕವನ್ನು ಅನೇಕರು ಹಲವು ದಶಕಗಳಿಂದ ಸಮಾಜ ಸೇವೆ ಎನ್ನುವ ಮನೋಭಾವನೆಯಿಂದ ಮಾಡುತ್ತಿದ್ದಾರೆ.

ಬೆಳಗಿನ ಜಾವದಲ್ಲಿ ಎದ್ದು ಮನೆಮನೆಗೆ ಪತ್ರಿಕೆ ತಲುಪಿಸಿದ ಕೊಪ್ಪಳ ಜಿಲ್ಲೆಯ ಅನೇಕ ವಿದ್ಯಾರ್ಥಿಗಳು ಇಂದು ಉನ್ನತ ಹುದ್ದೆಗಳಲ್ಲಿದ್ದಾರೆ. ಕೆಲವರು ಉಪನ್ಯಾಸಕರು, ಪೊಲೀಸರು, ಪ್ರಾಧ್ಯಾಪಕರು, ಎಂಜಿನಿಯರ್‌ಗಳು ಹಾಗೂ ವೈದ್ಯರು ಆದ ಉದಾಹರಣೆಗಳು ಇವೆ. ಬೆಳಗಿನ ಜಾವ ಏಳುವ ಅಭ್ಯಾಸವನ್ನೂ ಈ ವೃತ್ತಿ ಕಲಿಸುತ್ತದೆ. ಇದು ಬದುಕಿಗೆ ಶಿಸ್ತಿನ ಚೌಕಟ್ಟು ತಂದುಕೊಡುತ್ತದೆ.

ಆದರೆ, ಈ ವೃತ್ತಿ ಮಾಡುವವರಿಗೆ ಭದ್ರತೆ ಎಂಬುದೇ ಇಲ್ಲದಂತಾಗಿದೆ. ಕಾರ್ಮಿಕರ ಸಂಘಟನೆಗಳ ಯಾವ ‘ಗುಂಪಿ’ನಲ್ಲಿಯೂ ಸ್ಥಾನವಿಲ್ಲದಂತಾಗಿದೆ. ಹೀಗಾಗಿ ಅವರು ಅಭದ್ರತೆಯಲ್ಲಿ ಕೆಲಸ ಮಾಡಬೇಕಾಗಿದೆ. ರಾಜ್ಯ ಸರ್ಕಾರ ಜನರ ಬದುಕು ಹಸನಾಗಿಸಲು ಅನೇಕ ಗ್ಯಾರಂಟಿ ಯೋಜನೆಗಳನ್ನು ಜಾರಿಗೊಳಿಸಿದೆ. ಅದೇ ರೀತಿ ಪತ್ರಿಕಾ ವಿತರಕರ ನೆಮ್ಮದಿಯ ಬದುಕಿಗೂ ಸರ್ಕಾರ ‘ಗ್ಯಾರಂಟಿ’ ಕೊಡಬೇಕಾಗಿದೆ ಎಂದು ಜಿಲ್ಲೆಯ ಪತ್ರಿಕಾ ವಿತರಕರು ಹೇಳುತ್ತಾರೆ.

Quote - ಉತ್ತಮ ಆರೋಗ್ಯ ಕಾಪಾಡಿಕೊಳ್ಳಲು ಬೆಳಿಗ್ಗೆ ಬೇಗನೆ ಏಳುವುದು ಉತ್ತಮ. ಇದಕ್ಕೆ ಪತ್ರಿಕಾ ವಿತರಕರ ಕೆಲಸ ಅನುಕೂಲವಾಗಿದೆ. ಸರ್ಕಾರ ನಮ್ಮ ಸಮಸ್ಯೆಗಳಿಗೆ ಸ್ಪಂದಿಸುವ ಕೆಲಸ ಮಾಡಬೇಕು. ನಮ್ಮ ಬದುಕಿಗೆ ಪೂರಕವಾಗುವ ಯೋಜನೆಗಳನ್ನು ಘೋಷಿಸಬೇಕು. ಬಸವರಾಜ ಎನ್‌. ನೋಟಗಾರ ಗಿಣಗೇರಿ

ಪತ್ರಿಕಾ ವಿತರಕರ ಬೇಡಿಕೆಗಳು * ನಮ್ಮನ್ನು ಕಾರ್ಮಿಕರು ಎಂದು ಸರ್ಕಾರ ಪರಿಗಣಿಸಬೇಕು. * ವಿತರಕರಿಗೆ ಹಾಗೂ ಕುಟುಂಬದವರಿಗೆ ಸರ್ಕಾರ ಆರೋಗ್ಯ ವಿಮೆ ಒದಗಿಸಬೇಕು. * ವಿತರಕರ ಮಕ್ಕಳಿಗೆ ವಿದ್ಯಾರ್ಥಿ ವೇತನ ಸೌಲಭ್ಯ ನೀಡಬೇಕು. * ಪತ್ರಿಕಾ ವಿತರಣೆಯ ಗುರುತಿನ ಚೀಟಿ ನೀಡಬೇಕು. * ಪತ್ರಿಕೆಗಳನ್ನು ಮಟ್ಟಸವಾಗಿ ಜೋಡಿಸಿಕೊಳ್ಳಲು ಸ್ಥಳೀಯ ಆಡಳಿತ ಒಂದೆಡೆ ಸ್ಥಳದ ಅವಕಾಶ ಒದಗಿಸಿಕೊಡಬೇಕು. * ಪತ್ರಿಕೆ ಹಂಚುವವರಲ್ಲಿ ಕಾಲೇಜು ವಿದ್ಯಾರ್ಥಿಗಳೇ ಹೆಚ್ಚು. ಅಂಥವರ ಬದುಕಿಗೆ ಸರ್ಕಾರ ವಿದ್ಯಾಭ್ಯಾಸಕ್ಕೆ ನೆರವಾಗಬೇಕು. * ಗುಂಪು ವಿಮೆ ಸೌಲಭ್ಯ ಕೊಡಬೇಕು. * 60 ವರ್ಷ ದಾಟಿದ ಪತ್ರಿಕಾ ವಿತರಕರಿಗೆ ಪಿಂಚಣಿ ಸೌಲಭ್ಯ ಒದಗಿಸಬೇಕು. * ಸರ್ಕಾರದ ನಾಲ್ಕನೇ ಅಂಗದ ಭಾಗವಾದ ಪತ್ರಿಕಾ ವಿತರಕರಿಗೆ ಬ್ಯಾಂಕ್‌ಗಳಲ್ಲಿ ಸಾಲ ಒದಗಿಸಬೇಕು. * ಅಂಗವಿಕಲ ಪತ್ರಿಕಾ ವಿತರಕರಿಗೆ ತ್ರಿಚಕ್ರ ವಾಹನ ಸೌಲಭ್ಯ ಒದಗಿಸಬೇಕು. * ಬೀದಿಬದಿ ವ್ಯಾಪಾರಿಗಳಿಗೆ ನೀಡುವಂತೆ ವಿತರಕರಿಗೂ ಸಾಲ ಒದಗಿಸಿಕೊಡಬೇಕು * ಸರ್ಕಾರ ನಮ್ಮ ಕೆಲಸವನ್ನು ಅಸಂಘಟಿತ ವಲಯದಲ್ಲಿ ಗುರುತಿಸಿ ಸೌಲಭ್ಯ ಕೊಡಬೇಕು.   * ನಿವೇಶನ ಹಾಗೂ ಮನೆ ನೀಡಬೇಕು. * ಸರ್ಕಾರಿ ಬಸ್‌ಗಳಲ್ಲಿ ಉಚಿತ ಬಸ್ ಪಾಸ್‌ ಸೌಲಭ್ಯ ನೀಡಬೇಕು. * ಪತ್ರಿಕೆ ಹಂಚುವ ಸಮಯದಲ್ಲಿ ಬೀದಿನಾಯಿಗಳ ದಾಳಿ ಎದುರಿಸಬೇಕಾಗುತ್ತದೆ. ಇಂಥ ಅಪಾಯಕಾರಿ ಸಂದರ್ಭಕ್ಕೆ ತುತ್ತಾದರೆ ಸರ್ಕಾರ ಉಚಿತವಾಗಿ ಚಿಕಿತ್ಸೆಗೆ ವ್ಯವಸ್ಥೆ ಮಾಡಬೇಕು.