ಕಡಿಮೆ ಗೆಲುವಿನ ಅಂತರದಲ್ಲೂ ಇದೆ ದಾಖಲೆ!
ಕೊಪ್ಪಳ ಲೋಕಸಭಾ ಕ್ಷೇತ್ರದಲ್ಲಿ 1962ರ ಚುನಾವಣೆಯಲ್ಲಿ ಶಿವಮೂರ್ತಿ ಸ್ವಾಮಿ ಅಳವಂಡಿ ಅವರು ಲೋಕಸೇವಕ ಸಂಘದಿಂದ ಸ್ಪರ್ಧಿಸಿ ಪಡೆದಿದ್ದ 4281 ಮತಗಳ ಅಂತರದ ಗೆಲುವು ಈಗಲೂ ಕಡಿಮೆ ಅಂತರದ ಜಯವೆನ್ನುವ ದಾಖಲೆಯಾಗಿ ಉಳಿದುಕೊಂಡಿದೆ. ಆ ಚುನಾವಣೆಯಲ್ಲಿ ಅವರು 125018 ಮತಗಳನ್ನು ಪಡೆದಿದ್ದರೆ ಸಮೀಪದ ಪ್ರತಿಸ್ಪರ್ಧಿಯಾಗಿದ್ದ ಭಾರತೀಯ ರಾಷ್ಟ್ರೀಯ ಕಾಂಗ್ರೆಸ್‌ನ ಸಂಗಣ್ಣ ಅಗಡಿ 120737 ಮತಗಳನ್ನು ಗಳಿಸಿದ್ದರು. ಇನ್ನುಳಿದಂತೆ 1957ರಲ್ಲಿ ಸಂಗಣ್ಣ ಅಗಡಿ 10467 1991ರಲ್ಲಿ ಬಸವರಾಜ ಪಾಟೀಲ ಅನ್ವರಿ 11197 ಮತ್ತು 1999ರಲ್ಲಿ ಎಚ್‌.ಜಿ. ರಾಮುಲು 12512 ಮತಗಳ ಅಂತರದಲ್ಲಿ ಗೆಲುವು ಪಡೆದಿದ್ದು ಕ್ರಮವಾಗಿ ಕಡಿಮೆ ಮತಗಳ ಅಂತರದ ಗೆಲುವಿನ ಪಟ್ಟಿಯಲ್ಲಿ ನಂತರದ ಮೂರು ಸ್ಥಾನಗಳನ್ನು ಹೊಂದಿವೆ.
