ಕುಷ್ಟಗಿ: ಅಂಗನವಾಡಿಗಳಿಗೆ ಕಳಪೆ ಬೆಲ್ಲ ಪೂರೈಕೆ

ತಿಂಗಳ ಹಿಂದೆ ತಾಲ್ಲೂಕಿನ 300ಕ್ಕೂ ಹೆಚ್ಚಿನ ಅಂಗನವಾಡಿಗಳಿಗೆ ಪಟ್ಟಣದಲ್ಲಿರುವ ಮಹಿಳಾ ಪೂರಕ ಪೌಷ್ಟಿಕ ಆಹಾರ ತಯಾರಿಕಾ ಕೇಂದ್ರ (ಎಂಎಸ್‌ಪಿಸಿ)ದ ಮೂಲಕ ಈ ಬೆಲ್ಲ ಸರಬರಾಜು ಮಾಡಲಾಗಿದೆ. ಸಾವಯವ ಬೆಲ್ಲ ಎಂದು ಹೇಳಲಾಗುತ್ತಿದ್ದರೂ ಬೆಲ್ಲ ಮಾತ್ರ ತೀರಾ ಕಳಪೆಯಾಗಿದೆ.

ಕಡುಕಪ್ಪು ಮತ್ತು ದುರ್ವಾಸನೆಯುಕ್ತವಾಗಿರುವ ಬೆಲ್ಲವನ್ನು ಕಂಡ ಅಂಗನವಾಡಿ ಕಾರ್ಯಕರ್ತೆಯರು ಗಾಬರಿಯಾಗಿದ್ದಾರೆ. ಮಕ್ಕಳಿಗೆ ಅದರಿಂದ ತಯಾರಿಸಿದ ಆಹಾರ ನೀಡಿದರೆ ಆರೋಗ್ಯ ಸಮಸ್ಯೆ ಉಂಟಾಗುವ ಆತಂಕ ಅವರಲ್ಲಿ ಮನೆ ಮಾಡಿದೆ. ಕಳಪೆ ಮಟ್ಟದಿಂದ ಕೂಡಿರುವುದರಿಂದ ಬೆಲ್ಲವನ್ನು ಯಾವ ಅಂಗನವಾಡಿಗಳಲ್ಲೂ ಬಳಕೆ ಮಾಡಿಲ್ಲ ಎಂದು ಮೂಲಗಳು ತಿಳಿಸಿವೆ.

ಕಳಪೆ ಬೆಲ್ಲದ ಬಗ್ಗೆ ಯಾರಿಗೂ ಮಾಹಿತಿ ನೀಡದಂತೆ ಮೇಲಧಿಕಾರಿಗಳು ಮೌಖಿಕವಾಗಿ ಸೂಚಿಸಿದ್ದಾರೆ ಎಂದು ಹೆಸರು ಬಹಿರಂಗಪಡಿಸಲು ಇಚ್ಛಿಸದ ಅಂಗನವಾಡಿ ಕಾರ್ಯಕರ್ತೆಯರು ತಿಳಿಸಿದ್ದಾರೆ.

ಕಳಪೆ ಬೆಲ್ಲ ವಿತರಣೆಯಾಗಿರುವ ಕುರಿತು ಮಾಹಿತಿ ನೀಡಿದ ತಾಲ್ಲೂಕು ಅಂಗನವಾಡಿ ನೌಕರರ ಸಂಘದ ಅಧ್ಯಕ್ಷೆ ಕಲಾವತಿ ಮೆಣೆದಾಳ, ‘ಬೆಲ್ಲದ ವಿಚಾರ ದೊಡ್ಡ ಸಮಸ್ಯೆಯಾಗಿದೆ. ಅದನ್ನು ತಿಂದರೆ ಮಕ್ಕಳ ಆರೋಗ್ಯ ಹದಗೆಡುವುದು ಖಾತರಿ. ಪೂರೈಕೆಯಾಗಿರುವ ಬೆಲ್ಲವನ್ನು ಮರಳಿ ಪಡೆದಿಲ್ಲ. ಬೇರೆ ಬೆಲ್ಲವನ್ನೂ ನೀಡಿಲ್ಲ. ಆ ತಿಂಗಳಿನ ಕಂತಿನ ಬೆಲ್ಲದಿಂದ ಮಕ್ಕಳು ವಂಚಿತರಾಗುವಂತಾಗಿದೆ’ ಎಂದರು.

‘ಬೆಲ್ಲ ಡಾಂಬರಿನಂತೆ ಕಾಣಿಸುತ್ತಿದೆ. ಈ ಬೆಲ್ಲ ಕಬ್ಬಿನಿಂದ ತಯಾರಿಸಿದ್ದು ಅಲ್ಲವೇ ಅಲ್ಲ. ಕಳಪೆ ಸಕ್ಕರೆಗೆ ರಾಸಾಯನಿಕಗಳನ್ನು ಮಿಶ್ರಣಮಾಡಿ ಬೆಲ್ಲ ತಯಾರಿಸಿ ಕಳಿಸಲಾಗುತ್ತಿದೆ. ಕಳಪೆ ಬೆಲ್ಲ ಸರಬರಾಜು ಮಾಡುವುದರ ಹಿಂದೆ ದೊಡ್ಡ ಅಕ್ರಮ ಜಾಲವೇ ಇದ್ದಂತಿದೆ’ ಎಂದು ಆರೋಪಿಸಿದರು.