ಮೈಸೂರು: 38,848 ಜನರಿಗೆ ಕೋವಿಡ್‌ ಲಸಿಕೆ

18 ವರ್ಷ ಮೇಲ್ಪಟ್ಟ 16,584 ಯುವಕ–ಯುವತಿಯರು ಮೊದಲ ಡೋಸ್‌ ಕೋವಿಡ್‌ ಲಸಿಕೆ ಪಡೆದರು. ಮೈಸೂರು ನಗರದ ಸರ್ಕಾರಿ ಲಸಿಕಾ ಕೇಂದ್ರಗಳಲ್ಲಿ 8442 ಯುವ ಜನರು ಮೊದಲ ಡೋಸ್‌ ಲಸಿಕೆ ಪಡೆದರೆ, ಖಾಸಗಿ ಆಸ್ಪತ್ರೆಗಳಲ್ಲಿ 1952 ಜನರು ಲಸಿಕೆ ಪಡೆದುಕೊಂಡರು.

ಮೈಸೂರು ತಾಲ್ಲೂಕಿನ ವಿವಿಧ ಹಳ್ಳಿಗಳಲ್ಲಿ 3379 ಯುವಕ–ಯುವತಿಯರು ಲಸಿಕೆ ಪಡೆದರೆ, ಹುಣಸೂರು ತಾಲ್ಲೂಕಿನಲ್ಲಿ 2811 ಯುವ ಜನರು ಲಸಿಕೆ ಪಡೆದಿದ್ದಾರೆ. ಉಳಿದ ತಾಲ್ಲೂಕಿನಲ್ಲಿ ಯಾರೊಬ್ಬರೂ ಲಸಿಕೆ ಪಡೆದಿಲ್ಲ ಎಂಬುದನ್ನು ಆರೋಗ್ಯ ಇಲಾಖೆಯ ಅಂಕಿ–ಅಂಶದ ಮಾಹಿತಿಯಿಂದ ಗೊತ್ತಾಗಿದೆ.

ರಾಜ್ಯ ಸರ್ಕಾರ ಗುರುತಿಸಿರುವ ಆದ್ಯತಾ ವರ್ಗದಡಿ ಎಲ್ಲೆಡೆಯೂ 15,227 ಜನರು ಮೊದಲ ಡೋಸ್‌ ಲಸಿಕೆ ಪಡೆದಿದ್ದಾರೆ.

ಮೈಸೂರು ನಗರದ ಸರ್ಕಾರಿ ಲಸಿಕಾ ಕೇಂದ್ರಗಳಲ್ಲಿ 16,200 ಜನರು ಉಚಿತವಾಗಿ ಲಸಿಕೆ ಪಡೆದರೆ; ಖಾಸಗಿ ಆಸ್ಪತ್ರೆಗಳಲ್ಲಿ 2287 ಜನರು ಕೋವಿಡ್‌ ಲಸಿಕೆ ಪಡೆದಿದ್ದಾರೆ. ಮೈಸೂರು ತಾಲ್ಲೂಕಿನಲ್ಲಿ 4161 ಜನರು ಕೋವಿಡ್‌ ಲಸಿಕೆ ಹಾಕಿಸಿಕೊಂಡಿದ್ದಾರೆ.

ತಿ.ನರಸೀಪುರ ತಾಲ್ಲೂಕಿನಲ್ಲಿ 3,543, ನಂಜನಗೂಡು–3,746, ಹುಣಸೂರು–3,246, ಎಚ್‌.ಡಿ.ಕೋಟೆ–3,167 ಜನರು ಕೋವಿಡ್‌ ಲಸಿಕೆ ಪಡೆದಿದ್ದರೆ, ಪಿರಿಯಾಪಟ್ಟಣ ತಾಲ್ಲೂಕಿನಲ್ಲಿ 1149 ಹಾಗೂ ಕೆ.ಆರ್.ನಗರ ತಾಲ್ಲೂಕಿನಲ್ಲಿ 1,349 ಜನರಷ್ಟೇ ಲಸಿಕೆ ಹಾಕಿಸಿಕೊಂಡಿದ್ದಾರೆ.

ಸರತಿ ಸಾಲು: ವಿಶೇಷ ಅಭಿಯಾನದಲ್ಲಿ ಲಸಿಕೆ ಪ‍ಡೆಯಲು ಎಲ್ಲ ಕೇಂದ್ರಗಳ ಮುಂಭಾಗ ಯುವ ಜನರ ಸರತಿ ಸಾಲು ಗೋಚರಿಸಿತು. ಹಲವರು ಸೋಮವಾರ ನಸುಕಿನಿಂದಲೇ ತಮ್ಮ ಸರದಿಗಾಗಿ ಸರತಿಯಲ್ಲಿ ನಿಂತಿದ್ದು ಕಂಡು ಬಂದಿತು.

ಮೈಸೂರು ತಾಲ್ಲೂಕಿನ ಕೀಳನಪುರ ಪ್ರಾಥಮಿಕ ಆರೋಗ್ಯ ಕೇಂದ್ರದಲ್ಲಿ ಮಹಾತ್ಮ ಗಾಂಧಿ ರಾಷ್ಟ್ರೀಯ ಗ್ರಾಮೀಣ ಉದ್ಯೋಗ ಖಾತ್ರಿ ಯೋಜನೆಯ ಕೂಲಿ ಕಾರ್ಮಿಕರಿಗೆ ಕೋವಿಡ್ ಲಸಿಕೆ ಹಾಕಿಸಲಾಯಿತು.

ಕೆ.ಆರ್.ನಗರ ತಾಲ್ಲೂಕಿನ ನರನಚನಹಳ್ಳಿ ಗ್ರಾಮ ಪಂಚಾಯಿತಿ ವ್ಯಾಪ್ತಿಯ ಹನುಮನಹಳ್ಳಿ ಗ್ರಾಮದಲ್ಲಿನ ಕೆರೆಯ ಅಭಿವೃದ್ಧಿ ಕಾಮಗಾರಿ ಸ್ಥಳದಲ್ಲೇ ಕೂಲಿಕಾರ್ಮಿಕರಿಗೆ ಕೋವಿಡ್‌ ಲಸಿಕೆ ನೀಡಲಾಯಿತು.