ಮೈಸೂರು: 24 ವರ್ಷ ಪೂರೈಸಿದ ‘ಭಾರತೀ ಯೋಗಧಾಮ’

ಇದೆಲ್ಲವೂ ನೋಡ ಸಿಗುವುದು ಇಲ್ಲಿನ ಉತ್ತನಹಳ್ಳಿಯ ವಿಜಯಗಿರಿಯ ಭಾರತೀ ಯೋಗಧಾಮದಲ್ಲಿ.

ದೇಶದ ಇತಿಹಾಸ, ಕಲೆ, ವೇದ ಕಾಲದ ಜ್ಞಾನ, ವಿಜ್ಞಾನವನ್ನು ಆಧುನಿಕ ಜ್ಞಾನದೊಂದಿಗೆ ಹರಡಲು ಸಿದ್ಧವಾಗುತ್ತಿರುವ ಯೋಗಧಾಮಕ್ಕೆ ಇಂದು 24 ಸಂವತ್ಸರಗಳ ಪ್ರಾಯ. ಏಕಕಾಲದಲ್ಲಿಯೇ ಪ್ರಕೃತಿ ಚಿಕಿತ್ಸಾ ತಾಣ, ಖಗೋಳ ಅಧ್ಯಯನ ಕೇಂದ್ರ, ಯೋಗ ಶಾಲೆ, ಗೋ ಶಾಲೆ, ಗುರುಕುಲವಾಗಿ ಕಾರ್ಯಾಚರಿಸಲು ಹಂತಹಂತವಾಗಿ ಸನ್ನದ್ಧವಾಗುತ್ತಿದೆ.

‘ಕೆ.ಎಲ್.ಶಂಕರನಾರಾಯಣ ಜೋಯ್ಸ್‌ ಅವರಿಂದ 1999ರಲ್ಲಿ ಸಂಸ್ಥೆ ಆರಂಭವಾಯಿತು. ಅವರ ಗುರುಗಳಾದ ಎನ್‌.ಎಸ್. ರಾಮಭದ್ರಾಚಾರ್ಯರು ಅಪಾರ ಸಹಕಾರ ನೀಡಿದ್ದರು. ಭಾರತದ ವಿದ್ಯೆ ಕಲೆ, ಸಂಸ್ಕೃತಿ, ಪರಂಪರೆಗಳನ್ನು ಉಳಿಸಿ– ಬೆಳೆಸುವ ಉದ್ದೇಶ ಸಂಸ್ಥೆಯದು’ ಎಂದು ಯೋಗಧಾಮದ ಕಾರ್ಯದರ್ಶಿ ಆದರ್ಶ ‘ಪ್ರಜಾವಾಣಿ’ಗೆ ತಿಳಿಸಿದರು.‌

‘ಯೋಗ– ಆಯುರ್ವೇದ– ಜ್ಯೋತಿಷದಂಥ ‌ಭಾರತೀಯ ವಿದ್ಯೆಗಳಲ್ಲಿ ಅಡಗಿರುವ ವಿಜ್ಞಾನದ ಕುರಿತ ಅಧ್ಯಯನ, ಅಧ್ಯಾಪನ ಹಾಗೂ ಸಂಶೋಧನೆಯು ಸಂಸ್ಥೆಯ ಪ್ರಧಾನ ಕಾರ್ಯ. ಆರ್ಷ ವಿದ್ಯಾ ಪ್ರತಿಷ್ಠಾನ, ಸದ್ವಿದ್ಯಾ ಪ್ರತಿಷ್ಠಾನ, ವಿದ್ಯಾನಂದಿನೀ ಗುರುಕುಲಗಳ ಮೂಲಕ ಜ್ಞಾನ ಪ್ರಸಾರಕ್ಕೆ ಆದ್ಯತೆ ನೀಡಿದ್ದೇವೆ. ವಾಸ್ತು, ಯೋಗ ಕಾರ್ಯಾಗಾರಗಳೂ ನಡೆಯುತ್ತವೆ’ ಎಂದರು.

35 ವಿದ್ಯಾರ್ಥಿಗಳು: ‘ಎರಡು ವರ್ಷದ ಹಿಂದೆ ಆರಂಭವಾದ ವಿದ್ಯಾನಂದಿನೀ ಗುರುಕುಲದಲ್ಲಿ 1ರಿಂದ 8ನೇ ತರಗತಿವರೆಗೂ ಕಲಿಕೆ ನಡೆಯುತ್ತಿದೆ. 35 ವಿದ್ಯಾರ್ಥಿಗಳಿದ್ದು, ಭಾರತೀಯ ಜ್ಞಾನದೊಂದಿಗೆ ಪಾಶ್ಚಾತ್ಯ ಜ್ಞಾನವನ್ನು ಕಲಿಸಲಾಗುತ್ತಿದೆ. ಉತ್ತಮ ಸ್ಪಂದನೆ ವ್ಯಕ್ತವಾಗಿದೆ. ಇದು ಮಾನ್ಯತೆ ಹೊಂದಿದ ಶಾಲೆ. ಪೋಷಕರು ಮಕ್ಕಳನ್ನು ಕಳುಹಿಸಲು ಉತ್ಸಾಹ ತೋರಬೇಕು. ಯೋಗ, ಜ್ಯೋತಿಷ, ಆಯುರ್ವೇದ ವಿಷಯವುಳ್ಳ ‘ತ್ರಯೀ ಯೋಗ’ ತರಗತಿಗಳು ಆರಂಭವಾಗಲಿವೆ. ಮಾಹಿತಿಗೆ ಮೊ.ಸಂ. 82771 36950 ಸಂಪರ್ಕಿಸಬಹುದು’ ಎಂದು ಮನವಿ ಮಾಡಿದರು.