ಅದಕ್ಕಾಗಿಯೇ ನಾನು ಪ್ರತಿ ಚುನಾವಣೆಯಲ್ಲೂ ಮತದಾನವನ್ನು ಕಡ್ಡಾಯವಾಗಿ ಮಾಡುತ್ತಾ ಬಂದಿದ್ದೇನೆ. ನಾನೂ ಈ ದೇಶದ ಅತ್ಯಂತ ಪ್ರಮುಖ ಪ್ರಜೆ ಎಂದು ಹೇಳಿಕೊಳ್ಳಲು ಸಾಧ್ಯವಾಗುವುದು ನಾವು ಹಕ್ಕು ಚಲಾಯಿಸಿದಾಗಲೆ. ಯುವಜನರು ಮತದಾನದಿಂದ ದೂರಾಗಬಾರದು. ರಸ್ತೆ ಮೂಲಸೌಲಭ್ಯ ಕಲ್ಪಿಸಲಿಲ್ಲವೇಕೆ ಎಂದು ಕೇಳುವುದಕ್ಕೆ ನಾವು ಮತದಾನ ಮಾಡಿರಬೇಕಾಗುತ್ತದೆ. ಇದರ ಮಹತ್ವವನ್ನು ಪ್ರಾಥಮಿಕ ಶಾಲೆಯಿಂದಲೇ ಹೇಳಿಕೊಡಬೇಕು. ಈ ಹಕ್ಕು ಚಲಾಯಿಸಿಲ್ಲದವರಿಗೆ ಸರ್ಕಾರಿ ಹಾಗೂ ಖಾಸಗಿಯ ಯಾವುದೇ ಸೌಲಭ್ಯಗಳನ್ನು ಕೊಡುವುದಿಲ್ಲ ಎಂಬ ನಿಯಮ ಜಾರಿಗೊಳಿಸಬೇಕು. ಆಗ, ಎಲ್ಲರೂ ಕಡ್ಡಾಯವಾಗಿ ಮತದಾನ ಮಾಡುತ್ತಾರೆ. ಮತದ ಮಹತ್ವ, ಶ್ರೇಷ್ಠತೆ ಹಾಗೂ ಘನತೆಯನ್ನು ಮನವರಿಕೆ ಮಾಡಿಕೊಡಬೇಕಾದ ಅವಶ್ಯಕತೆ ಇದೆ. ಅಂತೆಯೇ ಎಲ್ಲರೂ ಸಂವಿಧಾನವನ್ನೂ ತಿಳಿದುಕೊಳ್ಳಬೇಕು.