ಮೈಸೂರು: ಕ್ರಿಸ್‌ಮಸ್‌ ಹಬ್ಬದ ಸಡಗರದಲ್ಲಿ ಸೇಂಟ್‌ ಫಿಲೋಮಿನಾ ಚರ್ಚ್‌

‘ಗೋದಲಿ ನಿರ್ಮಾಣ ಸಂಸ್ಕೃತಿ ಉಳಿಸಲು ಕೆಲ ಚರ್ಚ್‌ಗಳು ಗೋದಲಿ ನಿರ್ಮಾಣ ಸ್ಪರ್ಧೆ ಏರ್ಪಡಿಸಿ ಮಕ್ಕಳು– ಯುವಜನತೆಯನ್ನು ಹುರಿದುಂಬಿಸುತ್ತವೆ. ಸಾಕಷ್ಟು ಮಂದಿ ಈ ಸ್ಪರ್ಧೆಯಲ್ಲಿ ಭಾಗವಹಿಸುತ್ತಾರೆ’ ಎಂದು ಮೇಟಗಳ್ಳಿ ಕ್ಲಿಂಟನ್ ತಿಳಿಸಿದರು. ‘ಹಿಂದೆಲ್ಲ ಗೋದಲಿ ನಿರ್ಮಿಸಲು ಕುಟುಂಬದವರೆಲ್ಲಾ ಸಹಕರಿಸುತ್ತಿದ್ದರು. ಇಂದು ಎಲ್ಲೆಡೆ ಚಿಕ್ಕ ಕುಟುಂಬಗಳಿದ್ದು ಶ್ರಮ ವಹಿಸಿ ಯಾರೂ ಗೋದಲಿ ನಿರ್ಮಿಸುತ್ತಿಲ್ಲ. ಮಾರುಕಟ್ಟೆಯಲ್ಲಿ ಸಿಗುವ ರೆಡಿಮೇಡ್‌ ಗೋದಲಿ ತರುತ್ತಾರೆ. ಇಲ್ಲವೇ ಚರ್ಚ್‌ನಲ್ಲಿ ನೋಡಿ ಸುಮ್ಮನಾಗುತ್ತಾರೆ’ ಎಂದರು.

‘ಗೋದಲಿ ನಿರ್ಮಿಸಿದ ಎಲ್ಲರ ಮನೆಯಲ್ಲೂ ಯೇಸು ಹುಟ್ಟುತ್ತಾನೆ ಎಂಬ ನಂಬಿಕೆ ಬಲವಾಗಿದೆ’ ಎಂದು ಗೋಕುಲಂನ ಮ್ಯಾಕ್ಸಿಮ್‌ ಹೇಳಿದರು. ‘ಮನೆ ಆವರಣದಲ್ಲಿ ಸೂಕ್ತ ಸ್ಥಳ ಗುರುತಿಸಿ ಮರದ ಕಂಬಗಳಿಂದ ಸಣ್ಣ ಮಂಟಪ ನಿರ್ಮಿಸಿ ಹೆಣೆದ ತೆಂಗಿನ ಗರಿ ಅಥವಾ ಹುಲ್ಲಿನಿಂದ ಚಾವಣಿಯನ್ನು ಮಾಡಿ ಒಳಗೆ ಹುಲ್ಲನ್ನು ಹಾಸಿದರೆ ಆಯ್ತು. ಗೋದಲಿ ಸಿದ್ಧ. ಈಗೆಲ್ಲಾ ಬೇಕಾದಷ್ಟು ಅಲಂಕಾರ ವಸ್ತುಗಳು ಸಿಗುತ್ತವೆ. ಡಿ.24ರ ರಾತ್ರಿ 12ರ ಬಳಿಕ ಅಲ್ಲಿ ಬಾಲ ಯೇಸುವನ್ನು ಇರಿಸಲಾಗುತ್ತದೆ’ ಎಂದರು.