ಲಿಂಗಸುಗೂರು: ಪವರ್ ಸ್ಟಾರ್ ಡಾ.ಪುನೀತ್‍ ರಾಜ್‌ಕುಮಾರ ಜನ್ಮದಿನವಾದ ಭಾನುವಾರ ಚಿಕ್ಕ ಮಕ್ಕಳು ಅಪ್ಪು ಪೋಸ್ಟರ್ ಹಿಡಿದು ಹಾಡಿಗೆ ಹೆಜ್ಜೆ ಹಾಕಿರುವ ಚಿತ್ರಣ ಪಟ್ಟಣದ ನಾಗರಿಕರ ಗಮನ ಸೆಳೆಯಿತು.
ಭಾನುವಾರ ಕ್ಷೇತ್ರ ಶಿಕ್ಷಣಾಧಿಕಾರಿ ಕಚೇರಿ ಆವರಣದಲ್ಲಿ ಬೈಸಿಕಲ್‍ ಹಿಂದುಗಡೆ ಸಣ್ಣ ಸೌಂಡ್‍ ಬಾಕ್ಸ್ ಮೇಲೆ ಪುನೀತ್‍ ಅವರ ಭಾವಚಿತ್ರ ಇರಿಸಿ ಹೂವಿನ ಹಾರ ಹಾಕಿ ಪೂಜೆ ಸಲ್ಲಿಸಿದರು. ಎರಡು ಕಟ್ಟಿಗೆಗಳಿಗೆ ಪೋಸ್ಟರ್ ಅಂಟಿಸಿ ಮೊಬೈಲ್‍ ಹಾಡಿನ ಸೌಂಡ್‍ಗೆ ಕುಣಿದು ಕುಪ್ಪಳಿಸಿದ ಮಕ್ಕಳು ಜಯಘೋಷ ಹಾಕಿದರು.
ಹಳೆ ಬಸ್‍ ನಿಲ್ದಾಣ, ಹೊಸ ಬಸ್‍ ನಿಲ್ದಾಣ, ಶಾರದಾ ವಿಜ್ಞಾನ ಕಾಲೇಜು ಸೇರಿದಂತೆ ಬಹುತೇಕ ಬೀದಿಗಳಲ್ಲಿ, ವೃತ್ತಗಳಲ್ಲಿ ಯುವಕರು ತಂಡೋಪ ತಂಡವಾಗಿ ಜಮಾವಣೆಗೊಂಡು ಅಪ್ಪು ಜನ್ಮ ದಿನ ಆಚರಿಸಿದ್ದು ಕಂಡುಬಂತು. ಗ್ರಾಮೀಣ ಪ್ರದೇಶಗಳಲ್ಲೂ ಕೂಡ ಪುನೀತ್‍ ಜನ್ಮದಿನ ಆಚರಣೆ ಮಾಡಿರುವುದು ವಿಶೇಷವಾಗಿದೆ.
