ರಾಯಚೂರು: ಪರಿಷತ್ ರಾಯಚೂರು ಹಾಗೂ ಕೊಪ್ಪಳ ಸ್ಥಳೀಯ ಸಂಸ್ಥೆಗಳ ಮತಕ್ಷೇತ್ರದ ಚುನಾವಣೆಗೆ ಕಾಂಗ್ರೆಸ್ ಅಭ್ಯರ್ಥಿ ಶರಣಗೌಡ ಬಯ್ಯಾಪೂರ ಅವರುಜಿಲ್ಲಾ ಚುನಾವಣಾಧಿಕಾರಿ ಅವಿನಾಶ ಮೆನನ್‌ ಅವರಿಗೆ ಶುಕ್ರವಾರ ನಾಮಪತ್ರ ಸಲ್ಲಿಸಿದರು.
ಜಿಲ್ಲಾ ಕಾಂಗ್ರೆಸ್ ಸಮಿತಿಯ ಅಧ್ಯಕ್ಷ ಬಿ.ವಿ.ನಾಯಕ, ಶಾಸಕರಾದ ಡಿ.ಎಸ್.ಹುಲಿಗೇರಿ, ಬಸವನಗೌಡ ತುರ್ವಿಹಾಳ ಅವರು ಜೊತೆಯಲ್ಲಿದ್ದರು.
ಇದಕ್ಕೂ ಮೊದಲು ಅವರು ನಾಮಪತ್ರ ಸಲ್ಲಿಸಲು ಕಚೇರಿಯ ಒಳಹೋಗುವಾಗ ಮುಖಕ್ಕೆ ಮಾಸ್ಕ್ ಧರಿಸದ ಕಾರಣ ಉಪ ವಿಭಾಗೀಯ ಆಯುಕ್ತ ಸಂತೋಶ ಕಾಮಗಾಗೌಡ ಮಾಸ್ಕ್ ಧರಿಸಿಯೇ ಒಳ ಬರುವಂತೆ ಸೂಚಿಸಿದರು. ಕಾರ್ಯಕರ್ತರು ಮಾಸ್ಕ್ ತರುವವರೆಗೆ ಸಿಬ್ಬಂದಿಯ ಕೊಠಡಿಯಲ್ಲಿ ದಾಖಲೆಪತ್ರಗಳ ಪರಿಶೀಲನೆ ಮಾಡಿಕೊಂಡ ತಯಾರಿ ನಡೆಸಿಕೊಂಡರು. ಮಾಸ್ಕ್ ತಂದ ಬಳಿಕ ನಾಮಪತ್ರ ಸಲ್ಲಿಸಿದರು.
ನಾಮಪತ್ರ ಸಲ್ಲಿಸಲು 3 ಜನರಿಗೆ ಮಾತ್ರ ಅವಕಾಶ ನೀಡಲಾಗಿತ್ತು. ಎಐಸಿಸಿ ಕಾರ್ಯದರ್ಶಿ ಎನ್.ಎಸ್. ಬೋಸರಾಜು ಹಾಗೂ ಕಾರ್ಯಕರ್ತರು ಕಚೇರಿಯ ಹೊರಗೆ ಉಳಿದರು.
ಪೂಜೆ ಸಲ್ಲಿಕೆ: ಲಿಂಗಸುಗೂರಿನಲ್ಲಿ ವಿಧಾನ ಪರಿಷತ್ ಕ್ಷೇತ್ರದ ಕಾಂಗ್ರೆಸ್ ಅಭ್ಯರ್ಥಿಯಾಗಿ ನಾಮಪತ್ರ ಸಲ್ಲಿಸಲು ತೆರಳುವ ಮುಂಚೆ ಶರಣಗೌಡ ಪಾಟೀಲ ಬಯ್ಯಾಪುರ ಮನೆಯಲ್ಲಿ ದೇವರಿಗೆ ಪೂಜೆ ಸಲ್ಲಿಸಿತೆರಳಿದರು. ಶಾಸಕ ಡಿ.ಎಸ್ ಹೂಲಗೇರಿ ಅಮರೇಗೌಡ ಪಾಟೀಲ ಬಯ್ಯಾಪುರ, ಬ್ಲಾಕ್‍ ಕಾಂಗ್ರೆಸ್ ಅಧ್ಯಕ್ಷ ಭೂಪನಗೌಡ ಕರಡಕಲ್ಲ ಇದ್ದರು.
