ಮೂರನೇ ದಿನ 604 ಜನರಿಗೆ ಲಸಿಕೆ

ರಾಮನಗರ: ಕೋವಿಡ್ ಲಸಿಕೆ ಕಾರ್ಯಕ್ರಮದ ಮೂರನೇ ದಿನವಾದ ಮಂಗಳವಾರ 604 ಜನರು ಲಸಿಕೆ ಪಡೆದರು.

ಜಿಲ್ಲೆಯ 10 ಲಸಿಕಾ ಕೇಂದ್ರದಲ್ಲಿ ಒಟ್ಟು 973 ಜನರಿಗೆ ಲಸಿಕೆ ನೀಡಲು ಉದ್ದೇಶಿಸಲಾಗಿತ್ತು. ಇದರಲ್ಲಿ ಶೇ 62 ರಷ್ಟು ಮಂದಿ ಪಾಲ್ಗೊಂಡರು.

ಚನ್ನಪಟ್ಟಣ ತಾಲ್ಲೂಕಿನ 2 ಕೇಂದ್ರದಲ್ಲಿ 159 ಜನರು, ಕನಕಪುರ ತಾಲ್ಲೂಕಿನ 3 ಲಸಿಕಾ ಕೇಂದ್ರದಲ್ಲಿ 101 ಜನರು, ಮಾಗಡಿ ತಾಲ್ಲೂಕಿನ 2 ಕೇಂದ್ರದಲ್ಲಿ 95 ಜನರು ಹಾಗೂ ರಾಮನಗರ ತಾಲ್ಲೂಕಿನ 3 ಲಸಿಕಾ ಕೇಂದ್ರದಲ್ಲಿ ಒಟ್ಟು 249 ಜನರು ಲಸಿಕೆ ಪಡೆದುಕೊಂಡರು. ಈವರೆಗೆ 3089 ಜನರಿಗೆ ಲಸಿಕೆ ನೀಡಲು ಉದ್ದೇಶಿಸಲಾಗಿತ್ತು. ಇದರಲ್ಲಿ 1811 ಜನರು ಲಸಿಕೆ ಪಡೆದಿದ್ದು, ಶೇ 59 ರಷ್ಟು ಗುರಿ ಸಾಧಿಸಲಾಗಿದೆ ಎಂದು ಜಿಲ್ಲಾ ಆರ್‌ಸಿಎಚ್‌ ಅಧಿಕಾರಿ ಪದ್ಮಾ ತಿಳಿಸಿದರು.

ವಿದ್ಯಾರ್ಥಿಗಳಿಗೆ ಲಸಿಕೆ: ಜಿಲ್ಲಾಸ್ಪತ್ರೆಯಲ್ಲಿ ಮಂಗಳವಾರ ಪ್ಯಾರಾ ಮೆಡಿಕಲ್ ವಿದ್ಯಾರ್ಥಿಗಳಿಗೆ ಕೋವಿಡ್ ಲಸಿಕೆ ನೀಡಲಾಯಿತು.

ಈ ಕುರಿತು ಜಿಲ್ಲಾ ಶಸ್ತ್ರಚಿಕಿತ್ಸಕ ಡಾ. ಶಶಿಧರ್ ಮಾಹಿತಿ ನೀಡಿ ತರಬೇತಿ ಕೇಂದ್ರದಲ್ಲಿ ವಿವಿಧ ವಿಭಾಗದಲ್ಲಿ 300ಕ್ಕೂ ಹೆಚ್ಚು ವಿದ್ಯಾರ್ಥಿಗಳು ಓದುತ್ತಿದ್ದಾರೆ. ಇವರಿಗೆ ಲಸಿಕೆ ಪಡೆಯುವ ಕಾರ್ಯ ಆರಂಭವಾಗಿದೆ. ಲಸಿಕೆ ಪಡೆದ ವಿದ್ಯಾರ್ಥಿಗಳ ಆರೋಗ್ಯದಲ್ಲಿ ಯಾವುದೇ ರೀತಿಯ ಬದಲಾವಣೆಗಳು ಕಂಡು ಬಂದಿಲ್ಲ. ಎಲ್ಲರೂ ಆರೋಗ್ಯವಾಗಿಯೇ ಇದ್ದಾರೆ ಎಂದು ತಿಳಿಸಿದರು.

ಜಿಲ್ಲಾಸ್ಪತ್ರೆಯ ಮಕ್ಕಳ ತಜ್ಞೆ ಡಾ.ಶಶಿಕಲಾ ಹಾಗೂ ಆಸ್ಪತ್ರೆಯ ವೈದ್ಯಕೀಯ ಸಿಬ್ಬಂದಿ ಹಾಜರಿದ್ದರು.