ಚನ್ನಪಟ್ಟಣ | ಮಗುವನ್ನು ನದಿಗೆ ಎಸೆದು ಕೊಂದ ತಾಯಿ

ಪತಿ ಅಂಬಾಡಹಳ್ಳಿ ಗ್ರಾಮದ ಶ್ರೀನಿವಾಸ ನೀಡಿದ ದೂರಿನ ಮೇರೆಗೆ ಅಕ್ಕೂರು ಠಾಣೆ ಪೊಲೀಸರು ಬುಧವಾರ ಮಗುವಿನ ತಾಯಿ ಭಾಗ್ಯ ಎಂಬಾಕೆಯನ್ನು ಬಂಧಿಸಿದ್ದಾರೆ. 

ತಾಲ್ಲೂಕಿನ ಬಾಣಗಹಳ್ಳಿ–ಕೊಂಡಾಪುರ ನಡುವೆ ಇರುವ ಕಣ್ವ ನದಿಗೆ ಭಾಗ್ಯ ತನ್ನ ಮಗು ದೇವರಾಜುನನ್ನು ಎಸೆದು ಕೊಲೆ ಮಾಡಿದ್ದಾಳೆ. ನದಿಯಲ್ಲಿ ಮಗುವಿನ ದೇಹ ತೇಲುತ್ತಿರುವುದನ್ನು ಗಮನಿಸಿದ ಸ್ಥಳೀಯರು ಪೊಲೀಸರಿಗೆ ವಿಷಯ ತಿಳಿಸಿದ್ದಾರೆ. ಪೊಲೀಸರ ತನಿಖೆ ವೇಳೆ  ಕೊಲೆ ವಿಷಯ ಬೆಳಕಿಗೆ ಬಂದಿದೆ.

ಕೆಲವು ದಿನಗಳಿಂದ ಗಂಡನಿಂದ ದೂರವಿರುವ ಭಾಗ್ಯ ಕಾಲಿಕೆರೆ ಗ್ರಾಮದ ತನ್ನ ತವರು ಮನೆಯಲ್ಲಿದ್ದಳು. ಪತಿ ನೀಡಿದ ದೂರಿನ ಮೇರೆಗೆ ಭಾಗ್ಯ ಸ್ನೇಹಿತ ಮಾದಾಪುರ ಗ್ರಾಮದ ರಾಜು ಬಿನ್ ಹೇದಗಿರಿ ಎಂಬಾತನ ವಿರುದ್ಧ ಪ್ರಕರಣ ದಾಖಲಿಸಿದ್ದಾರೆ. ತಾಲ್ಲೂಕಿನ ಅಕ್ಕೂರು ಪೊಲೀಸ್ ಠಾಣೆಯಲ್ಲಿ ಪ್ರಕರಣ ದಾಖಲಾಗಿದೆ.