ರಾಮನಗರ: ಪ್ರವಾಸ ತಾಣ ಅಭಿವೃದ್ಧಿಗೆ ವೋಟಿಂಗ್ ಅಭಿಯಾನ

ದೇಶದಾದ್ಯಂತ ಕೈಗೊಂಡಿರುವ ಈ ಅಭಿಯಾನದಡಿ, ಜಿಲ್ಲಾವಾರು ಪ್ರವಾಸ ತಾಣಗಳ ಅಭಿವೃದ್ಧಿಗೆ ಸಚಿವಾಲಯ ಮುಂದಾಗಿದೆ. ಆಗಸ್ಟ್ 7ರಿಂದ ಶುರುವಾಗಿರುವ ಅಭಿಯಾನವು ಸೆ. 15ರವರೆಗೆ ನಡೆಯಲಿದೆ. ಪ್ರವಾಸಿಗರು ತಾವು ಭೇಟಿ ಮಾಡಿದ ಹಾಗೂ ಮಾಡಲು ಇಚ್ಛಿಸುವ ತಮ್ಮ ಜಿಲ್ಲೆ ವ್ಯಾಪ್ತಿಯ ಸ್ಥಳಗಳ ಕುರಿತು ವೋಟಿಂಗ್ ಮಾಡಿ, ಅಲ್ಲಿ ಆಗಬೇಕಾದ ಸುಧಾರಣೆ ಕುರಿತು ಅಭಿಪ್ರಾಯ ನಮೂದಿಸಬೇಕು.

ಜಿಲ್ಲೆಯ 16 ಸ್ಥಳಗಳಿವೆ: ‘ರಾಜ್ಯ ಸರ್ಕಾರವು ರಾಮನಗರ ಜಿಲ್ಲೆಯಲ್ಲಿ 30 ಪ್ರವಾಸ ತಾಣಗಳನ್ನು ಗುರುತಿಸಿದೆ. ಪ್ರವಾಸೋದ್ಯಮ ಸಚಿವಾಲಯದ ಅಭಿಯಾನಕ್ಕೆ ಅಷ್ಟೂ ಸ್ಥಳಗಳ ಹೆಸರುಗಳನ್ನು ಕಳಿಸಲಾಗಿತ್ತು. ಅದರಲ್ಲಿ ಅಂತಿಮವಾಗಿ 16 ಸ್ಥಳಗಳನ್ನು ಸಚಿವಾಲಯವು ಅಭಿಯಾನಕ್ಕೆ ಆಯ್ಕೆ ಮಾಡಿದೆ’ ಎಂದು ಪ್ರವಾಸೋದ್ಯಮ ಇಲಾಖೆಯ ಸಹಾಯಕ ನಿರ್ದೇಶಕ ರವಿಕುಮಾರ್ ಎಚ್‌.ಡಿ. ‘ಪ್ರಜಾವಾಣಿ’ಗೆ ತಿಳಿಸಿದರು.

‘ಆಧ್ಯಾತ್ಮಿಕ, ಸಾಂಸ್ಕೃತಿಕ ಮತ್ತು ಪರಂಪರೆ, ಪ್ರಕೃತಿ ಮತ್ತು ವನ್ಯಜೀವಿ, ಸಾಹಸ ಹಾಗೂ ಇತರೆ ಸೇರಿದಂತೆ 5 ಬಗೆಯ ಪ್ರವಾಸ ತಾಣಗಳನ್ನು ಅಭಿಯಾನಕ್ಕೆ ಗುರುತಿಸಲಾಗಿದೆ. ಅಭಿಯಾನದಲ್ಲಿ ಭಾಗವಹಿಸುವವರು ಈ ಪೈಕಿ, ಕನಿಷ್ಠ 1ರಿಂದ 3 ತಾಣಗಳಿಗೆ ವೋಟ್ ಮಾಡಬೇಕು. ಎಲ್ಲಾ ಪ್ರಕ್ರಿಯೆ ಮುಗಿದ ಅವರ ಹೆಸರಿನಲ್ಲಿ ಸಚಿವಾಲಯದಿಂದ ಜನರೇಟ್ ಆಗುವ ಪ್ರಮಾಣಪತ್ರ ಡೌನ್‌ಲೋಡ್ ಮಾಡಿಕೊಳ್ಳಬೇಕು’ ಎಂದು ಹೇಳಿದರು.

ಪ್ರತಿಕ್ರಿಯೆ ನೀಡಬೇಕು: ‘ಅಭಿಯಾನದಲ್ಲಿ ಭಾಗವಹಿಸುವವರು ವೋಟಿಂಗ್ ಸಂದರ್ಭದಲ್ಲಿ ಈಗಾಗಲೇ ತಾವು ಭೇಟಿ ನೀಡಿದ ಪ್ರವಾಸ ತಾಣ ಮತ್ತು ಭೇಟಿ ನೀಡಲು ಬಯಸುವ ತಾಣದ ಕುರಿತ ಎರಡು ಪ್ರಶ್ನೆಗಳಿಗೆ ಪ್ರತಿಕ್ರಿಯಿಸಬೇಕು. ಮೊದಲನೆಯದಾಗಿ, ತಾವು ಭೇಟಿ ನೀಡಿರುವ ಸ್ಥಳದ ಆಕರ್ಷಣೆ ಏನಾಗಿತ್ತು? ಮತ್ತೆ ಅಲ್ಲಿಗೆ ಭೇಟಿ ನೀಡಬೇಕೆನಿಸಿದರೆ ಏನು ಸುಧಾರಣೆಯಾಗಬೇಕು ಎಂದು ಬಯಸುತ್ತೀರಿ? ಹಾಗೂ ಎರಡನೆಯದಾಗಿ, ಪ್ರವಾಸಿಗರು ಭೇಟಿ ನೀಡಲು ಬಯಸುವ ಪ್ರವಾಸಿ ತಾಣದಲ್ಲಿ ಇರಬೇಕಾದ ಆಕರ್ಷಣೆಗಳೇನು? ಎಂಬ ಪ್ರಶ್ನೆಗಳಿಗೆ ಪ್ರತಿಕ್ರಿಯಿಸಬೇಕು’ ಎಂದು ಮಾಹಿತಿ ನೀಡಿದರು.

‘ಆನ್‌ಲೈನ್ ವೋಟಿಂಗ್ ಕುರಿತು ಈಗಾಗಲೇ ಜಿಲ್ಲೆಯ ಪ್ರವಾಸ ತಾಣಗಳಲ್ಲಿ ಜಾಗೃತಿ ಮೂಡಿಸಲಾಗುತ್ತಿದೆ. ಪ್ರವಾಸಿ ಮಿತ್ರರಿಗೂ ಈ ಕುರಿತು ಅರಿವು ಮೂಡಿಸಲಾಗಿದೆ. ಸಾರ್ವಜನಿಕರು ಅಭಿಯಾನದಲ್ಲಿ ಪಾಲ್ಗೊಳ್ಳಲು ಅನುಕೂಲವಾಗುವಂತೆ ಪ್ರವಾಸ ಸ್ಥಳಗಳು ಸೇರಿದಂತೆ ಹಲವೆಡೆ ಬ್ಯಾನರ್ ಹಾಕಲಾಗಿದೆ. ಅದರಲ್ಲಿರುವ ಕ್ಯೂ ಆರ್ ಕೋಡ್ ಸ್ಕ್ಯಾನ್ ಮಾಡಿಯೂ ವೋಟ್ ಮಾಡಬಹುದಾಗಿದೆ’ ಎಂದು ಹೇಳಿದರು.

ಜಿಲ್ಲೆಯ 16 ಪ್ರವಾಸ ತಾಣಗಳು

• ರಾಮನಗರದ ರಾಮದೇವರ ಬೆಟ್ಟ ಹಾಗೂ ದೇವಸ್ಥಾನ ರಣಹದ್ದು ವನ್ಯಜೀವಿ ಧಾಮ ಅಚ್ಚಲು ಬೆಟ್ಟ ಕೂಟಗಲ್ ಬೆಟ್ಟ ಹಂದಿಗುಂದಿ ಬೆಟ್ಟ ಜಾನಪದ ಲೋಕ ಜಲಸಿದ್ದೇಶ್ವರ ಬೆಟ್ಟ

• ಚನ್ನಪಟ್ಟಣದ ಅಪ್ರಮೇಯ ಸ್ವಾಮಿ ದೇವಸ್ಥಾನ ಕಣ್ವ ಅಣಕಟ್ಟೆ

• ಮಾಗಡಿಯ ಕೋಟೆ ಸಾವನದುರ್ಗ ಬೆಟ್ಟ ಹಾಗೂ ದೇವಸ್ಥಾನ

• ಕನಕಪುರದ ಮೇಕೆದಾಟು

• ಹಾರೋಹಳ್ಳಿ ಬುದ್ಧ ಪಿರಾಮಿಡ್ ಚತುರ್ಭುಜ ಬೆಟ್ಟ