ಕಾರ್ಗಲ್: ನಾಡಿಗೆ ಬೆಳಕು ನೀಡುವಲ್ಲಿ ಪ್ರಮುಖ ಪಾತ್ರ ವಹಿಸುವ ಲಿಂಗನಮಕ್ಕಿ ಜಲಾಶಯದಲ್ಲಿ ಸೋಮವಾರ 1815.50 ಅಡಿ ನೀರು ಸಂಗ್ರಹವಾಗಿದ್ದು, 1816 ಅಡಿ ತಲುಪುತ್ತಿದ್ದಂತೆ ನೀರಿನ ಒಳಹರಿವನ್ನು ಗಮನಿಸಿ ರೇಡಿಯಲ್ ಗೇಟಿನ ಮೂಲಕ ಹೆಚ್ಚುವರಿ ನೀರನ್ನು ಹೊರ ಹರಿಸುವ ಸಾಧ್ಯತೆಯಿದೆ ಎಂದು ಕೆಪಿಸಿ ಮೂಲಗಳು ತಿಳಿಸಿವೆ.
ಅಣೆಕಟ್ಟೆಯಲ್ಲಿ ನೀರಿನ ಸಂಗ್ರಹ ಸಾಮರ್ಥ್ಯ 1819 ಅಡಿ ಆಗಿದ್ದರೂ, ಅಣೆಕಟ್ಟೆಯ ಸುರಕ್ಷತೆ ಮತ್ತು ನದಿಪಾತ್ರದ ನಿವಾಸಿಗಳಿಗೆ ನೆರೆ ಸಮಸ್ಯೆ ಉಂಟಾಗದಂತೆ ಎಚ್ಚರ ವಹಿಸಿ ಹಂತ ಹಂತವಾಗಿ ನೀರು ಹರಿಸಲು ಕೆಪಿಸಿ ಆಡಳಿತ ನಿಯಮ ರೂಪಿಸಿದೆ.
‘ನಿಗಮ ನಿಯಮಾನುಸಾರ ಈಗಾಗಲೇ 3 ಸುತ್ತಿನ ಎಚ್ಚರಿಕೆಯ ಸಂದೇಶವನ್ನು ಲಿಂಗನಮಕ್ಕಿ ಕೆಳದಂಡೆಯ ನಿವಾಸಿಗಳಿಗೆ ನೀಡಲಾಗಿದೆ. ಜಲಾನಯನದ ಹಿನ್ನೀರ ಪ್ರದೇಶಗಳಲ್ಲಿ ಉತ್ತಮ ಮಳೆಯಾಗುತ್ತಿರುವ ಕಾರಣ ನೀರಿನ ಒಳಹರಿವು ಹೆಚ್ಚುತ್ತಿದ್ದು, ಶೀಘ್ರವೇ ಲಿಂಗನಮಕ್ಕಿ ಅಣೆಕಟ್ಟೆಯಿಂದ ನೀರು ಹೊರ ಹರಿಸಲಾಗುವುದು’ ಎಂದು ನಿಗಮದ ಅಧಿಕಾರಿಗಳು ತಿಳಿಸಿದ್ದಾರೆ.
