ರೈಲಿನ ಮುಂದೆ ಟಿಕ್‌ ಟಾಕ್: ಇಬ್ಬರ ಬಂಧನ, ಬಿಡುಗಡೆ

ಉಡುಪಿ: ಇಂದ್ರಾಳಿಯಲ್ಲಿರುವ ರೈಲು ನಿಲ್ದಾಣದಲ್ಲಿ ಚಲಿಸುತ್ತಿದ್ದ ರೈಲಿನ ಮುಂದೆ ಟಿಕ್‌ ಟಾಕ್ ವಿಡಿಯೋಗೆ ನೃತ್ಯ ಮಾಡುತ್ತಿದ್ದ ಇಬ್ಬರು ಯುವಕರನ್ನು ರೈಲ್ವೆ ಪೊಲೀಸರು ಬಂಧಿಸಿದ್ದಾರೆ.

ಭಾನುವಾರ ಫ್ಲಾಟ್‌ಪಾರಂಗೆ ರೈಲು ಬರುತ್ತಿದ್ದಂತೆ ಯುವಕರು ರೈಲಿನ ಜತೆಗೆ ಸಾಗುತ್ತಾ ವಿಡಿಯೋ ಚಿತ್ರೀಕರಣ ಮಾಡಲು ಶುರುಮಾಡಿದರು. ಜತೆಗೆ, ರೈಲಿನ ಪಕ್ಕ ನಿಂತು ಸೆಲ್ಫಿ ತೆಗೆದುಕೊಂಡರು. ಈ ಸಂದರ್ಭ ಅವರನ್ನು ವಶಕ್ಕೆ ತೆಗೆದುಕೊಂಡು ವಿಚಾರಣೆಗೊಳಪಡಿಸಿ, ಸೋಮವಾರ ಜೆಎಂಎಫ್‌ಸಿ ನ್ಯಾಯಾಲಯದ ಮುಂದೆ ಹಾಜರುಪಡಿಸಲಾಯಿತು.

ಯುವಕರಿಗೆ ದಂಡ ವಿಧಿಸಿದ ನ್ಯಾಯಾಧೀಶರು, ಮುಂದೆ ಹುಡುಗಾಟಿಕೆಯ ಕೆಲಸಗಳನ್ನು ಮಾಡದಂತೆ ಎಚ್ಚರಿಕೆ ನೀಡಿ ಬಿಡುಗಡೆಗೊಳಿಸಿದರು ಎಂದು ರೈಲ್ವೆ ಪೊಲಿಸರು ತಿಳಿಸಿದ್ದಾರೆ.

ರೈಲು ಚಲಿಸುತ್ತಿದ್ದಾಗ ಸೆಲ್ಫಿ ಕ್ಲಿಕ್ಕಿಸಿಕೊಳ್ಳುವುದು, ನೃತ್ಯ ಮಾಡುವುದು ಕಾನೂನಿಗೆ ವಿರುದ್ಧ. ಪ್ರಾಣಕ್ಕೆ ಕುತ್ತು ತರುವಂತಹ ಇಂತಹ ಕೆಲಸಗಳನ್ನು ಮಾಡಬಾರದು ಎಂದು ರೈಲ್ವೆ ಪೊಲೀಸರು ಮನವಿ ಮಾಡಿದ್ದಾರೆ.