ಈ ಮೂರೂ ಸ್ಥಳೀಯ ಸಂಸ್ಥೆಗಳ ಆಡಳಿತಾವಧಿ ಮುಕ್ತಾಯವಾಗಿದೆ. ಈ ಹಿನ್ನೆಲೆಯಲ್ಲಿ ರಾಜ್ಯ ಚುನಾವಣಾ ಆಯೋಗವು ಹೊಸದಾಗಿ ಜನಪ್ರತಿನಿಧಿಗಳ ಆಯ್ಕೆಗೆ ದಿನಾಂಕ ನಿಗದಿ ಮಾಡಿದ್ದಾರೆ. ಮೇ 9ರಂದು ಚುನಾವಣಾಧಿಕಾರಿ ಅಧಿಸೂಚನೆ ಹೊರಡಿಸಲಿದ್ದು, ಮೇ 16ವರೆಗೆ ಉಮೇದುವಾರಿಕೆಸಲ್ಲಿಸಲು ಅವಕಾಶವಿದೆ. ಮೇ 17ರಂದು ನಾಮಪತ್ರ ಪರಿಶೀಲನೆ ಹಾಗೂ 20ರಂದು ನಾಮಪತ್ರ ವಾಪಸ್ ಪಡೆಯಲು ಕೊನೆಯ ದಿನವಾಗಿದೆ.

ಮೂರು ಸ್ಥಳೀಯ ಸಂಸ್ಥೆಗಳ ಒಟ್ಟು 58 ವಾರ್ಡ್‌ಗಳಲ್ಲಿ ಮತದಾನ ನಡೆಯಲಿದೆ. ಭಟ್ಕಳ ಪುರಸಭೆಯ 23 ವಾರ್ಡ್‌ಗಳು, ಹೊನ್ನಾವರ ಪಟ್ಟಣ ಪಂಚಾಯ್ತಿಯ 20 ಹಾಗೂ ಸಿದ್ದಾಪುರ ಪಟ್ಟಣ ಪಂಚಾಯ್ತಿಯ 15 ವಾರ್ಡ್‌ಗಳು ಇದರಲ್ಲಿ ಸೇರಿವೆ.ಈ ಸಂಬಂಧ ಭಟ್ಕಳದಲ್ಲಿ 27, ಹೊನ್ನಾವರದಲ್ಲಿ 20 ಮತ್ತು ಸಿದ್ದಾಪುರದಲ್ಲಿ 15 ಮತಗಟ್ಟೆಗಳನ್ನು ತೆರೆಯಲಾಗುವುದು ಎಂದು ಅಧಿಕಾರಿಗಳು ತಿಳಿಸಿದ್ದಾರೆ.

ಜಿಲ್ಲೆಯ ಮೂರು ನಗರಸಭೆಗಳು, ಮೂರು ಪುರಸಭೆಗಳು ಮತ್ತು ಎರಡು ಪಟ್ಟಣ ಪಂಚಾಯ್ತಿಗಳಿಗೆ ಆ.3ರಂದು ಚುನಾವಣೆ ನಡೆದಿತ್ತು. ಸೆ.3ರಂದು ಮತ ಎಣಿಕೆಯೂ ಆಗಿತ್ತು. ಆದರೆ, ಅಧ್ಯಕ್ಷ, ಉಪಾಧ್ಯಕ್ಷ ಮೀಸಲಾತಿ ವಿಚಾರದಲ್ಲಿ ಆದ ಗೊಂದಲಗಳಿಂದ ಇದುವರೆಗೂ ಅಧಿಕಾರ‍‍ಪದಗ್ರಹಣವಾಗಿಲ್ಲ. ಎಲ್ಲ ಕಡೆಯೂ ಆಡಳಿತಾಧಿಕಾರಿಗಳೇ ಅಧಿಕಾರ ನಡೆಸುತ್ತಿದ್ದಾರೆ. ಈಗ ಚುನಾವಣೆ ಘೋಷಣೆಯಾಗಿರುವ ಮೂರು ಸ್ಥಳೀಯ ಸಂಸ್ಥೆಗಳಿಗೂ ಆಡಳಿತಾವಧಿ ಮುಗಿದು ಎರಡು ತಿಂಗಳೇ ಕಳೆದಿದ್ದು, ಅಲ್ಲೂ ಆಡಳಿತಾಧಿಕಾರಿಗಳೇ ಪ್ರಮುಖರಾಗಿದ್ದಾರೆ.

ಮೂರು ಸಂಸ್ಥೆಗಳ ಮತದಾರರು

ಸ್ಥಳೀಯ ಸಂಸ್ಥೆ; ಪುರುಷ; ಮಹಿಳೆ; ಒಟ್ಟು

ಭಟ್ಕಳ; 11,862; 11,438; 23,300

ಹೊನ್ನಾವರ; 7,516; 7,679; 15,195

ಸಿದ್ದಾಪುರ; 5,537; 5,355; 10,892

ಒಟ್ಟು; 24,915; 24,472; 49,397