ಅಡುಗೆ ಎಣ್ಣೆ ದುಬಾರಿ: ಈರುಳ್ಳಿಗೆ ₹ 80

ಕಾರವಾರ: ಮಾರುಕಟ್ಟೆಯಲ್ಲಿ ದಿನಸಿ ದರ ಸ್ಥಿರವಾಗಿದ್ದು, ಅಡುಗೆ ಎಣ್ಣೆಯಲ್ಲಿ ದರ ಏರಿಕೆ ಕಂಡುಬಂದಿದೆ. ಎರಡು ವಾರದ ಹಿಂದೆ ಲೀಟರ್‌ಗೆ ₹ 80ರ ದರ ಹೊಂದಿದ್ದ ಪಾಮ್ ಆಯಿಲ್ ಹಿಂದಿನ ವಾರ ₹ 90ಕ್ಕೆ ಏರಿಕೆಯಾಗಿತ್ತು. ಸದ್ಯ ₹ 95ರಲ್ಲಿ ಬಿಕರಿಯಾಗುತ್ತಿದೆ.

ತೊಗರಿಬೇಳೆ ಪ್ರತಿ ಕೆ.ಜಿ.ಗೆ ₹ 100ರಲ್ಲಿ ಬಿಕರಿಯಾಗುತ್ತಿದೆ. ಹೆಸರು ಬೇಳೆಗೆ ₹ 120, ಬ್ಯಾಡಗಿ ಮೆಣಸು ₹ 220, ಬಿಳಿ ಬಟಾಣಿ ₹ 80, ಹಸಿರು ಬಟಾಣಿ ₹ 140ರ ದರ ಹೊಂದಿದೆ. ಕೊತ್ತುಂಬರಿ ₹ 160, ಗೋಧಿ ₹36ರಲ್ಲಿ ಗ್ರಾಹಕರಿಗೆ ಸಿಗುತ್ತಿದೆ.

ಈರುಳ್ಳಿ ದರ ಇಳಿಕೆ: ತರಕಾರಿ ಮಾರುಕಟ್ಟೆಯಲ್ಲಿ ₹ 100ರಲ್ಲಿ ಮಾರಾಟವಾಗುತ್ತಿದ್ದ ಈರುಳ್ಳಿ ಸದ್ಯ ₹ 80ಕ್ಕೆ ಇಳಿಕೆಯಾಗಿದೆ. ಅಂದರೆ ಪ್ರತಿ ಕೆ.ಜಿ.ಗೆ ₹ 20ರಷ್ಟು ಕಡಿಮೆ ಆದಂತಾಗಿದೆ. ಕಳಪೆ ಗುಣಮಟ್ಟದ ಈರುಳ್ಳಿಯನ್ನು ₹ 60ರಲ್ಲಿ ವ್ಯಾಪಾರ ಮಾಡಲಾಗುತ್ತಿದೆ.

ಪ್ರತಿ ಕೆ.ಜಿ.ಗೆ ₹ 25ರ ದರ ಹೊಂದಿದ್ದ ಆಲೂಗಡ್ಡೆ ₹ 15ರಷ್ಟು ಜಾಸ್ತಿಯಾಗಿದ್ದು, ₹ 40ರಲ್ಲಿ ಬಿಕರಿಯಾಗುತ್ತಿದೆ. ಟೊಮೆಟೊ ₹ 20, ಕ್ಯಾರೆಟ್ ₹ 80ರ ದರದಲ್ಲಿ ಸ್ಥಿರವಾಗಿದೆ. ಹೂಕೋಸು ₹ 30, ಬೆಳ್ಳುಳ್ಳಿ ₹ 200, ಬೀನ್ಸ್ ₹ 60ರ ದರವನ್ನು ಹೊಂದಿದೆ. 

ಸೇವಂತಿಗೆ ಹೂವು ಮತ್ತು ಕಾಕಡ ಮಲ್ಲಿಗೆಯು ಒಂದು ಮಾರಿಗೆ ₹ 50, ಕನಕಾಂಬರ ₹ 60, ಗೊಂಡೆ ಹೂವು ₹ 40, ಡೇರೆ ಹೂವು ₹ 60ರ ದರ ಹೊಂದಿವೆ. ಹೂವಿನ ಹಾರ ಒಂದಕ್ಕೆ ₹ 60ರಂತೆ ಮಾರಾಟವಾಗುತ್ತಿದೆ.

ಹಣ್ಣಿನ ಮಾರುಕಟ್ಟೆಯಲ್ಲಿ ಸೇಬು ಪ್ರತಿ ಕೆ.ಜಿ.ಗೆ ₹ 120, ₹ 140, ₹ 200ರವರೆಗೂ ಇದೆ. ಸೀತಾಫಲ ₹ 200ರ ದರ ಹೊಂದಿದೆ. ಕಿತ್ತಳೆ ₹ 80ರಿಂದ ₹ 90ರವರೆಗಿನ ದರದಲ್ಲಿ ವಹಿವಾಟು ಕಾಣುತ್ತಿದೆ. ದ್ರಾಕ್ಷಿ ₹ 160, ದಾಳಿಂಬೆ ₹ 120, ಮೂಸಂಬಿ ₹ 120, ಪಪ್ಪಾಯಿ ₹ 50ರ ದರದಲ್ಲಿ ಬಿಕರಿಯಾಗುತ್ತಿದೆ.

ಮೀನು ಮಾರುಕಟ್ಟೆಯಲ್ಲಿ ಪಾಂಫ್ರೆಟ್‌ಗೆ ₹ 800ರಿಂದ ₹ 900, ಕಿಂಗ್‌ಫಿಶ್‌ಗೆ ₹ 1,200, ಬಂಗಡೆ ಒಂದು ಪಾಲಿಗೆ ₹ 200, ಲೆಪ್ಪೆ ಪಾಲಿಗೆ ₹ 50, ಬೆಳುಂಜೆ ಪಾಲಿಗೆ ₹ 100 ರಿಂದ ₹ 150ರವರೆಗೆ ದರವಿದೆ. ₹ 5ಕ್ಕೆ ಒಂದು ಮೊಟ್ಟೆ ಸಿಗುತ್ತಿದೆ. ಬೇಯಿಸಿದ ಮೊಟ್ಟೆಗೆ ₹ 10 ಇದೆ.

ಮಾರುಕಟ್ಟೆಗೆ ಮಾವಿನಕಾಯಿ: ಕಾರವಾರದಲ್ಲಿ ಇದೇ ಮೊದಲ ಬಾರಿಗೆ ಮಾರುಕಟ್ಟೆಯಲ್ಲಿ ಮಾವಿನಕಾಯಿ ಪ್ರವೇಶ ಮಾಡಿತ್ತು. ಭಾನುವಾರದ ಸಂತೆಯಲ್ಲಿ ಒಂದು ಕಡೆ ಮಾತ್ರ ಇದು ಮಾರಾಟಗೊಂಡಿತು. ಅಪರೂಪದ ಮಾವಿನಕಾಯಿಯನ್ನು ತುಟ್ಟಿಯಾದರೂ ಜನ ಖರೀದಿ ಮಾಡಿದರು. ₹ 100ಕ್ಕೆ ಕೇವಲ ಎರಡು ಮಾವಿನಕಾಯಿಯನ್ನು ನೀಡಲಾಗುತ್ತಿತ್ತು.

––––––––––ಅಂಕಿಅಂಶ––––––––––

ಕಾರವಾರ ಮಾರುಕಟ್ಟೆ

ತರಕಾರಿ;ದರ (₹ಗಳಲ್ಲಿ)

ಆಲೂಗಡ್ಡೆ;40

ಟೊಮೆಟೊ;20

ಕ್ಯಾರೆಟ್;80

ಬೀಟ್‌ರೂಟ್;60

ಕ್ಯಾಪ್ಸಿಕಂ;60

ಮೆಣಸಿನಕಾಯಿ;60

ಶುಂಠಿ;100