ಕಾರವಾರ: ಹೊಸ ಪುಸ್ತಕಗಳಿಲ್ಲದ ಗ್ರಾಮೀಣ ಗ್ರಂಥಾಲಯ

ಹಳಿಯಾಳ ಪಟ್ಟಣದಲ್ಲಿರುವ ಗ್ರಂಥಾಲಯ ಸ್ವಂತ ಸುಸಜ್ಜಿತ ಕಟ್ಟಡ ಹೊಂದಿದೆ. 1700ಕ್ಕೂ ಹೆಚ್ಚು ಓದುಗ ಸದಸ್ಯರು ನೋಂದಣಿ ಮಾಡಿಕೊಂಡಿದ್ದಾರೆ. ವಿಶೇಷವಾಗಿ ಮಕ್ಕಳಿಗಾಗಿಯೇ ಅಂದಾಜು ₹20 ಲಕ್ಷ ವೆಚ್ಚದಿಂದ ಮಕ್ಕಳ ಗ್ರಂಥಾಲಯವನ್ನು ನಿರ್ಮಿಸಲಾಗಿದೆ. ‘ಪುರಸಭೆಯಿಂದ ಸ್ಪರ್ಧಾತ್ಮಕ ಪರೀಕ್ಷೆಗೆ ಸಿದ್ಧತೆಗೆ ಅಗತ್ಯವಿರುವ ಪುಸ್ತಕಗಳನ್ನು ಶಾಸಕ ಆರ್‌.ವಿ.ದೇಶಪಾಂಡೆ ಅವರ ವಿ.ಆರ್.ಡಿ.ಎಂ ಟ್ರಸ್ಟ್ ವತಿಯಿಂದ 12 ರ‍್ಯಾಕ್‍ಗಳನ್ನು ದೇಣಿಗೆಯಾಗಿ ನೀಡಲಾಗಿದೆ’ ಎಂದು ಗ್ರಂಥಾಲಯದ ಸಿಬ್ಬಂದಿ ವಿಷ್ಣು ಮಾಚಕ್ ಹೇಳುತ್ತಾರೆ. ‘ತಾಲ್ಲೂಕು ಕೇಂದ್ರದ ಗ್ರಂಥಾಲಯದಲ್ಲಿ ಸಿಬ್ಬಂದಿ ಕೊರತೆ ಇದ್ದು ಈಗಾಗಲೇ ನಿಯೋಜನೆಗೊಂಡ ಸಿಬ್ಬಂದಿ ತಾತ್ಕಾಲಿಕ ನಿಯೋಜನೆ ಮೇರೆಗೆ ಇದ್ದಾರೆ’ ಎಂದು ಗ್ರಂಥಾಲಯದ ಸಲಹಾ ಸಮಿತಿ ಸದಸ್ಯ ಸತ್ಯಜಿತ ಗಿರಿ ಹೇಳುತ್ತಾರೆ.

ಜೊಯಿಡಾ ತಾಲ್ಲೂಕಿನ ನಾಗೋಡಾ ಅಣಶಿ ಆಖೇತಿಯಲ್ಲಿ ಗ್ರಂಥಾಲಯಕ್ಕೆ ಪ್ರತ್ಯೇಕ ಕಟ್ಟಡಗಳಿಲ್ಲದೆ ಗ್ರಾಮ ಪಂಚಾಯಿತಿ ಕಚೇರಿಯಲ್ಲಿ ಗ್ರಂಥಾಲಯವನ್ನು ನಡೆಸಲಾಗುತ್ತಿದೆ. ನಂದಿಗದ್ದಾ ಅಣಶಿ ನಾಗೋಡಾ ಕಾತೇಲಿ ಗಾಂಗೋಡಾ ಆಖೇತಿ ಬಜಾರಕುಣಂಗ ಗ್ರಾಮ ಪಂಚಾಯಿತಿ ವ್ಯಾಪ್ತಿಯಲ್ಲಿ ನೆಟ್‍ವರ್ಕ್ ಸಮಸ್ಯೆ ಇರುವುದರಿಂದ ಡಿಜಿಟಲ್ ಗ್ರಂಥಾಲಯ ವ್ಯವಸ್ಥೆ ಇಲ್ಲ. ನಾಗೋಡಾ ಗ್ರಂಥಾಲಯವನ್ನು ಬಾಪೇಲಿ ಕ್ರಾಸ್ ಆಖೇತಿ ಗ್ರಂಥಾಲಯವನ್ನು ಅನಮೋಡ ಮತ್ತು ಆವೇಡಾ ಗ್ರಂಥಾಲಯವನ್ನು ಗಣೇಶಗುಡಿ ಕೆಪಿಸಿ ಶಾಲೆಗಳಿಗೆ ಸ್ಥಳಾಂತರಿಸಿ ನಡೆಸಲಾಗುತ್ತಿದೆ. ‘ರಾಮನಗರದಲ್ಲಿ ಅಂಗವಿಕಲ ಸ್ನೇಹಿ ಗ್ರಂಥಾಲಯ ಪ್ರಾರಂಭಿಸಲಾಗಿದೆ’ ಎಂದು ತಾಲ್ಲೂಕು ಪಂಚಾಯಿತಿ ಸಹಾಯಕ ನಿರ್ದೇಶಕ ನಜೀರ್ ಸಾಬ್ ಅಕ್ಕಿ ಹೇಳುತ್ತಾರೆ.