ಉತ್ತರ ಕನ್ನಡ: ‘ಬೆಳಕು’ ನೀಡುವ ಜಿಲ್ಲೆಯಲ್ಲಿ ಕತ್ತಲು

ಜೊಯಿಡಾ ತಾಲ್ಲೂಕಿನ ಗುಂದ ಅಣಶಿ ಬಜಾರಕುಣಂಗ ಕುಂಡಲ ಕಾರ್ಟೋಳಿ ಉಳವಿ ತೇರಾಳಿ ಸೇರಿದಂತೆ 50ಕ್ಕೂ ಹೆಚ್ಚು ಹಳ್ಳಿಗಳ ಜನರು ವಾರಗಟ್ಟಲೆ ವಿದ್ಯುತ್ ಇಲ್ಲದೆ ಕತ್ತಲೆಯಲ್ಲಿ ಕಾಲ ಕಳೆಯುವಂತಾಗುತ್ತಿದೆ. ತಾಲ್ಲೂಕು ಕೇಂದ್ರದಲ್ಲಿಯೂ ಮಳೆಗಾಲದಲ್ಲಿ ನಿರಂತರವಾಗಿ ವಿದ್ಯುತ್ ವ್ಯತ್ಯಯ ಉಂಟಾಗುವುದರಿಂದ ಗ್ರಾಮೀಣ ಪ್ರದೇಶಗಳಿಂದ ನೂರಾರು ರೂಪಾಯಿ ಖರ್ಚು ಮಾಡಿ ಕಚೇರಿ ಕಾರ್ಯಗಳಿಗೆ ಬರುವ ಜನರು ನಿತ್ಯ ಅಲೆದಾಡುವ ಸ್ಥಿತಿ ನಿರ್ಮಾಣವಾಗಿದೆ. ‘ಮಳೆಗಾಲದಲ್ಲಿ ಒಮ್ಮೆ ಕರೆಂಟ್ ಹೋದರೆ ಸುಮಾರು ಹದಿನೈದು ದಿನಗಳವರೆಗೆ ಬರುವುದೇ ಇಲ್ಲ. ಕಚೇರಿ ಕಾರ್ಯಗಳಿಗೆ ಹೋದರೆ ಝೆರಾಕ್ಸ್ ಸೇರಿದಂತೆ ಇನ್ನಿತರ ದಾಖಲಾತಿಗಳನ್ನು ಪಡೆಯಲು ವಾರಗಟ್ಟಲೆ ಅಲೆಯಬೇಕಾಗುತ್ತದೆ’ ಎಂದು ಕಾಡಪೋಡ ಗ್ರಾಮಸ್ಥ ತುಕಾರಾಮ ವೇಳಿಪ ಗೋಳು ತೋಡಿಕೊಂಡರು.

ಭಟ್ಕಳ ತಾಲ್ಲೂಕಿನ ಹೆಬಳೆಯಲ್ಲಿರುವ 33 ಗ್ರೀಡ್‌‍ನ ಪರಿವರ್ತಕದಿಂದ ಭಟ್ಕಳದಾದ್ಯಂತ ಏಕಕಾಲದಲ್ಲಿ ವಿದ್ಯುತ್‌ ಪೂರೈಕೆ ಸಾಧ್ಯವಿಲ್ಲದ ಕಾರಣ ಗ್ರಾಮೀಣ ಭಾಗದದಲ್ಲಿ ಅಲ್ಲಲ್ಲಿ 1 ರಿಂದ 2 ತಾಸು ವಿದ್ಯುತ್ ಕಡಿತ ಮಾಡಿ ಪರಿವರ್ತಕದ ಮೇಲೆ ಹೆಚ್ಚಿನ ಒತ್ತಡ ಬೀಳದಂತೆ ನೋಡಿಕೊಳ್ಳಲಾಗುತ್ತಿದೆ. ಕೆಲದಿನಗಳ ಹಿಂದೆ ಭಟ್ಕಳಕ್ಕೆ ವಿದ್ಯುತ್‌ ಕೊರತೆ ಆಗದ ಹಾಗೇ ಹೆಚ್ಚುವರಿ ಪರಿವರ್ತಕ ಅಳವಡಿಸಲಾಗಿದೆ. ಆದರೂ ಒಮ್ಮೊಮ್ಮೆ ಹೆಚ್ಚಿನ ಲೋಡ್‌ ಬಿದ್ದಾಗ ಪವರ್‌ ಕಟ್‌ ಅನಿವಾರ್ಯ ಎನ್ನುತ್ತಾರೆ ಹೆಸ್ಕಾಂ ಅಧಿಕಾರಿಗಳು.