ಕಾರವಾರ: ಮತ್ಸ್ಯ ಬೇಟೆಗಿಳಿದ ಟ್ರಾಲರ್ ಬೋಟು

ಎರಡೂ ಬದಿಯಿಂದಲೂ ಗುಡ್ಡಗಳಿಂದ ಆವೃತವಾಗಿರುವ ಇಲ್ಲಿನ ಮೀನುಗಾರಿಕೆ ಬಂದರು ರಾಜ್ಯದ ಅಪರೂಪದ ನೈಸರ್ಗಿಕ ಬಂದರು ಪ್ರಸಿದ್ಧಿ ಪಡೆದಿದೆ. ಹೀಗಾಗಿಯೇ ಮಳೆ, ಗಾಳಿ ಅಬ್ಬರ ಇದ್ದರೂ ಆಗಸ್ಟ್ 1ರಂದೇ ಯಾಂತ್ರೀಕೃತ ಮೀನುಗಾರಿಕೆ ಇಲ್ಲಿ ಆರಂಭಗೊಳ್ಳುತ್ತಿದೆ. ಮೊದಲ ದಿನ ಇಲ್ಲಿಂದ ಸುಮಾರು 75ಕ್ಕೂ ಅಧಿಕ ಟ್ರಾಲರ್ ಬೋಟ್‍ಗಳು ಮೀನುಬೇಟೆಗೆ ತೆರಳಿದವು.

ಎರಡು ತಿಂಗಳುಗಳಿಂದ ಮೀನುಗಾರಿಕೆಯ ಭರಾಟೆ, ಮೀನು ಸಾಗಣೆ ವಾಹನಗಳ ಓಡಾಟ, ಕಾರ್ಮಿಕರ ಕಾಲ್ನಡಿಗೆಯ ಸಪ್ಪಳ ಇಲ್ಲದೆ ಮೌನಕ್ಕೆ ಜಾರಿದ್ದ ಬಂದರು ಪ್ರದೇಶದಲ್ಲಿ ಮಂಗಳವಾರದಿಂದಲೇ ಗೌಜು ಗದ್ದಲಗಳು ಶುರುವಾದವು.

ಹತ್ತಾರು ಸಂಖ್ಯೆಯ ಕಾರ್ಮಿಕರು ದೋಣಿಗಳನ್ನು ಏರಿ ಮೀನುಗಾರಿಕೆಗೆ ತೆರಳಿದರೆ, ನೂರಾರು ಕಾರ್ಮಿಕರು ದಡದಲ್ಲಿ ಬುಟ್ಟಿಗಳನ್ನು ಹಿಡಿದು ಮೀನು ಇಳಿಸಲು ಕಾದು ನಿಂತಿದ್ದರು. ಸಂಜೆಯ ವೇಳೆಗೆ ಬೋಟುಗಳು ದಡದತ್ತ ಧಾವಿಸುತ್ತಿದ್ದಂತೆ ಮೀನು ಇಳಿಸಿ ವಾಹನಗಳಿಗೆ ತುಂಬಲು ಪೈಪೋಟಿ ನಡೆದಿತ್ತು.

ಮಹಿಳಾ ಕಾರ್ಮಿಕರು, ಮೀನು ಖರೀದಿಗೆ ಮುಗಿಬಿದ್ದ ಮಹಿಳಾ ವ್ಯಾಪಾರಿಗಳು ಬಂದರಿನಲ್ಲಿ ಹೆಚ್ಚಿನ ಸಂಖ್ಯೆಯಲ್ಲಿ ಕಾಣಿಸಿಕೊಂಡರು. ಮೊದಲ ದಿನ ಓತ್ಲೆ (ಪಚಕಿ) ಮೀನು, ಸಿಗಡಿ, ತಾರ್ಲೆ, ಇನ್ನಿತರ ಸಣ್ಣಪುಟ್ಟ ಮೀನುಗಳು ಮಾತ್ರ ಲಭಿಸಿದ್ದವು. ಸ್ಥಳೀಯ ಮಾರುಕಟ್ಟೆಯಲ್ಲಿ ಮಾರಾಟ ಮಾಡುವ ಸಲುವಾಗಿ ಮಹಿಳಾ ವ್ಯಾಪಾರಿಗಳು ಮೀನು ಖರೀದಿಸಲು ಪೈಪೋಟಿಗೆ ಬಿದ್ದಿದ್ದರು. ಸಿಗಡಿ ಮೀನುಗಳನ್ನು ಕಂಟೇನರ್ ಇದ್ದ ವಾಹನದಲ್ಲಿ ತುಂಬಿ ಕೇರಳಕ್ಕೆ ಕಳುಹಿಸಲಾಯಿತು.

‘ಮೊದಲ ದಿನ ತೀರಾ ಆಳದ ಪ್ರದೇಶಕ್ಕೆ ಮೀನುಗಾರಿಕೆಗೆ ಬೋಟುಗಳು ತೆರಳಲು ಸಾಧ್ಯವಾಗಿಲ್ಲ. 20ರಿಂದ 25 ನಾಟಿಕಲ್ ಮೈಲು ದೂರದವರೆಗೆ ಮಾತ್ರ ಬೋಟುಗಳು ಸಾಗಿದ್ದವು. ನಿರೀಕ್ಷೆಯಷ್ಟು ಮೀನು ಲಭಿಸಿಲ್ಲ. ಪರ್ಸಿನ್ ಬೋಟುಗಳು ಆಗಸ್ಟ್ 7ರ ಬಳಿಕ ಮೀನುಗಾರಿಕೆಗೆ ತೆರಳಲಿವೆ’ ಎಂದು ಟ್ರಾಲರ್ ಬೋಟ್ ಮಾಲೀಕ ಸಚಿನ್ ಹರಿಕಂತ್ರ ‘ಪ್ರಜಾವಾಣಿ’ಗೆ ತಿಳಿಸಿದರು.