ತುಂಗಭದ್ರಾ ಅಣೆಕಟ್ಟೆ: ಮುರಿದ 19ನೇ ಗೇಟ್‌– ಭಾರಿ ಪ್ರಮಾಣದಲ್ಲಿ ನೀರು ನಷ್ಟ

‘70 ವರ್ಷದ ಅಣೆಕಟ್ಟೆಯ ಇತಿಹಾಸದಲ್ಲಿ ಇದೇ ಮೊದಲ ಬಾರಿಗೆ ಇಂತಹ ದುರಂತ ಸಂಭವಿಸಿದ್ದು, ಜಲಾಶಯ ತುಂಬಿರುವುದರಿಂದ ಸದ್ಯ ದುರಸ್ತಿ ಮಾಡುವುದೂ ಕಷ್ಟವಾಗಿದೆ. ಹೀಗಾಗಿ ಈ ಗೇಟ್‌ನಲ್ಲಿ ಪ್ರತಿದಿನಕ್ಕೆ 35 ಸಾವಿರ ಕ್ಯುಸೆಕ್‌ನಷ್ಟು ನೀರು ನದಿಗೆ ಹರಿದು ಹೋಗುತ್ತದೆ’ ಎಂದು ತುಂಗಭದ್ರಾ ಮಂಡಳಿಯ ಮೂಲಗಳು ‘ಪ್ರಜಾವಾಣಿ’ಗೆ ತಿಳಿಸಿವೆ.

ಜಲಾಶಯದ ಒಳಹರಿವಿನ ಪ್ರಮಾಣ ಕುಸಿದ ಕಾರಣ ಶುಕ್ರವಾರ ರಾತ್ರಿಯಷ್ಟೇ ಅಣೆಕಟ್ಟೆಯ ಗರಿಷ್ಠ ಮಟ್ಟಕ್ಕೆ ನೀರು ನಿಲ್ಲಿಸಲಾಗಿತ್ತು. 9 ಗೇಟ್‌ಗಳ ಮೂಲಕ 28 ಸಾವಿರ ಕ್ಯುಸೆಕ್ ನೀರು ಹೊರಗೆ ಬಿಡಲಾಗುತ್ತಿತ್ತು.

‘ಪ್ರತಿದಿನ 35 ಸಾವಿರ ಕ್ಯುಸೆಕ್‌ನಂತೆ ನೀರು ಹೊರಗೆ ಹೋಗುತ್ತಲೇ ಇದ್ದರೆ ಜಲಾಶಯದ ನೀರು ಸಂಗ್ರಹ ಪ್ರಮಾಣ ಕೆಲವೇ ದಿನಗಳಲ್ಲಿ ಈಗಿನ 105.78 ಟಿಎಂಸಿ ಅಡಿಯಿಂದ 40 ಟಿಎಂಸಿ ಅಡಿಗೆ ಕುಸಿಯಬಹುದು, ಹಾಗಾದರೆ ಈ ಬಾರಿಯೂ ಒಂದು ಬೆಳೆಗೆ ಮಾತ್ರ ನೀರು ಸಿಗುವಂತಾಗಬಹುದೇ’ ಎಂಬ ಆತಂಕ ರೈತರನ್ನು ಕಾಡತೊಡಗಿದೆ.