ಹೊಸಪೇಟೆ (ವಿಜಯನಗರ): ಹೊಸಪೇಟೆ ನಗರಾಭಿವೃದ್ಧಿ ಪ್ರಾಧಿಕಾರದ (ಹುಡಾ) ನಿವೇಶನಕ್ಕಾಗಿ ಹಣ ತುಂಬಿರುವ ಸಾರ್ವಜನಿಕರಿಗೆ ಶೀಘ್ರವೇ ನಿವೇಶನ ಹಂಚಿಕೆ ಮಾಡಬೇಕು ಎಂದು ಆಗ್ರಹಿಸಿ ವಿಜಯನಗರ ಪ್ರಜಾ ವೇದಿಕೆಯಿಂದ ಗುರುವಾರ ಇಲ್ಲಿನ ತಾಲ್ಲೂಕು ಕಚೇರಿ ಬಳಿ ಧರಣಿ ಹಮ್ಮಿಕೊಳ್ಳಲಾಯಿತು.
ವೇದಿಕೆ ಅಧ್ಯಕ್ಷರೂ ಆಗಿರುವ ನಗರಸಭೆ ಮಾಜಿ ಸದಸ್ಯ ವೈ.ಗೋಂವಿಂದರಾಜು ಮಾತನಾಡಿ, 'ಹುಡಾ’ದಿಂದ 2014ರಲ್ಲಿ ನಗರದ ವಿವಿಧ ಭಾಗಗಳಲ್ಲಿ ಲೇಔಟ್ಗಳನ್ನು ಅಭಿವೃದ್ಧಿಪಡಿಸಲಾಗಿತ್ತು. ಅದರಲ್ಲಿ 20x30, 30x40 ಅಳತೆಯ ನಿವೇಶನಗಳನ್ನು ನೀಡುವುದಾಗಿ ಸಾರ್ವಜನಿಕರಿಂದ ಲಕ್ಷಾಂತರ ಹಣ ಪಾವತಿಸಿಕೊಂಡಿದೆ. ಆದರೆ, ಇದುವರೆಗೂ ನಿವೇಶನ ಹಂಚಿಕೆ ಮಾಡದೇ ವಂಚಿಸಲಾಗಿದೆ ಎಂದರು.
ಸರ್ಕಾರಿ ಆಸ್ಪತ್ರೆಯಲ್ಲಿ ಸಂತಾನಶಕ್ತಿ ಹರಣ ಚಿಕಿತ್ಸೆಗೆ ಒಳಗಾದವರಿಗೆ 30x40 ಅಡಿ ಅಳತೆಯ ನಿವೇಶನ ನೀಡಲಾಗುತ್ತಿತ್ತು. ಅದರಂತೆ ಇಲ್ಲಿನ 25ಕ್ಕೂ ಹೆಚ್ಚು ಜನರು ನಿವೇಶನದ ಆಸೆಗಾಗಿ ಈ ಶಸ್ತಚಿಕಿತ್ಸೆಗೆ ಒಳಗಾಗಿದ್ದರು. ಅವರಿಗೆ ನಗರದ ಹೊರ ವಲಯದಲ್ಲಿ ನಿವೇಶನ ನೀಡಿದೆಯಾದರೂ, ಅದಕ್ಕೆ ಹುಡಾದಿಂದ ಹಕ್ಕುಪತ್ರಗಳನ್ನು ನೀಡಿಲ್ಲ ಎಂದು ಅವರು ದೂರಿದರು.
ಸಂಘದ ಪ್ರಮುಖರಾದ ಬಿ.ಆರ್.ಶರತ್ ಬಾಬು, ಶೈನಾಜ್, ಶಮ್ ಷದ್ ಬೇಗಂ, ಅಕ್ಟರ್, ಲಿಂಗಪ್ಪ ಇದ್ದರು.
