ವಿಜಯಪುರ | ಮಹಾನಗರ ಪಾಲಿಕೆ ನಿರ್ಲಕ್ಷ್ಯ: ನಿರ್ವಹಣೆ ಇಲ್ಲದೆ ಸೊರಗಿದ ಉದ್ಯಾನಗಳು

ಮಹಾನಗರದ ಪಾಲಿಕೆ ವ್ಯಾಪ್ತಿಯಲ್ಲಿ ಬರುವ ನೂರಾರು ಉದ್ಯಾನಗಳಲ್ಲಿ ಬೆರಳಣಿಕೆಯಷ್ಟು ಉದ್ಯಾನಗಳು ಮಾತ್ರ ದಣಿದ ಮನಸುಗಳಿಗೆ ಮುದ ನೀಡುವ, ಚೈತನ್ಯ ತುಂಬುವ, ಮುಂಜಾನೆ–ಸಂಜೆ ವಾಯು ವಿಹಾರಕ್ಕೆ, ವಿಶ್ರಾಂತಿಗೆ ಆಶ್ರಯತಾಣವಾಗಿವೆ. ಇನ್ನು ಬಹುತೇಕ ಉದ್ಯಾನಗಳು ಸೂಕ್ತ ನಿರ್ವಹಣೆ ಇಲ್ಲದೆ ಪಾಳು ಕೊಂಪೆಗಳಾಗಿ ಮಾರ್ಪಡುತ್ತಿವೆ.

ಉದ್ಯಾನಗಳಿಗೆ ಸೂಕ್ತ ಆವರಣ ಗೋಡೆ, ವಿದ್ಯುತ್‌ ದೀಪದ ವ್ಯವಸ್ಥೆ, ನೀರಿನ ವ್ಯವಸ್ಥೆ, ಹೂವಿನ ಗಿಡ, ಮರಗಳ ನಿರ್ವಹಣೆ ಇಲ್ಲದೇ ಬರಡಾಗಿವೆ. ಕಾವಲುಗಾರರು ಇಲ್ಲದ ಕಾರಣ ಕೆಲವು ಉದ್ಯಾನಗಳು ಪುಂಡ, ಪೋಕರಿಗಳಿಗೆ ಅಡ್ಡೆಯಾಗಿ ಪರಿಣಮಿಸಿವೆ. ಇನ್ನು ಕೆಲವು ಉದ್ಯಾನಗಳು ಕಸ, ತ್ಯಾಜ್ಯವನ್ನು ಎಸೆಯುವ ತೊಟ್ಟಿಯಂತಾಗಿವೆ.

ಬೆಳಿಗ್ಗೆ ಹಾಗೂ ಸಂಜೆ ಸಮಯದಲ್ಲಿ ಮಕ್ಕಳಿಗೆ ಆಡಲೆಂದೇ ಇರುವ ಜೋಕಾಲಿ, ಜಾರುಗುಂಡಿ ಪ್ರಯೋಜನಕ್ಕೆ ಬಾರದ ಸ್ಥಿತಿಯಲ್ಲಿ ಇದ್ದಂತೆ ಗೋಚರಿಸುತ್ತವೆ. ಓಪನ್‌ ಜಿಮ್‌ಗಳಲ್ಲಿರುವ ಸಾಧನ, ಸಲಕರಣೆಗಳು ಕಳಚಿ ಬಿದ್ದಿವೆ. ಕೆಲವು ಉದ್ಯಾನಗಳು ನಾಯಿ, ಬಿಡಾಡಿ ದನಕರುಗಳಿಗೆ ಆಸರೆಯಾಗಿವೆ. ಆಯಾಸ ತಣಿಸಿಕೊಳ್ಳಲು ಉದ್ಯಾನದಲ್ಲಿ ಸ್ವಲ್ಪ ಹೊತ್ತು ಕೂತು ಸಮಯ ಕಳೆಯೋಣ ಎಂದರೂ ಕಲ್ಲು ಬೆಂಚ್‌ಗಳು ಉರುಳಿ ಬಿದ್ದಿರುವುದು ಕಂಡು ಮನೆಗೆ ಮರಳುವಂತಾಗಿದೆ.

ಉದ್ಯಾನಕ್ಕೆ ಮೀಸಲಿಟ್ಟ ಜಾಗವನ್ನು ಒತ್ತುವರಿ ಮಾಡಿರುವ ಉದಾಹರಣೆಗಳು ವಿಜಯಪುರ ನಗರ ಸೇರಿದಂತೆ ಇತರೆ ತಾಲ್ಲೂಕು ಕೇಂದ್ರಗಳಲ್ಲಿ ಬೆಳಕಿಗೆ ಬಂದಿವೆ. ಆದರೂ ಅಧಿಕಾರಿಗಳು ತೆರವುಗೊಳಿಸಲು ಮುಂದಾಗಿಲ್ಲ. ನಗರದ ನಿವಾಸಿಗಳಿಗೆ ಬೆಳಿಗ್ಗೆ–ಸಂಜೆ ವೇಳೆ ವಾಯು ವಿಹಾರಕ್ಕೆ ಹೋದಾಗ ಆಹ್ಲಾದಕರ ವಾತಾವರಣ ನೀಡಬೇಕಾದ ಉದ್ಯಾನಗಳ ಸ್ಥಿತಿ ಚಿಂತಾಜನಕವಾಗಿದ್ದರೂ ಸಂಬಂಧಪಟ್ಟ ಮಹಾನಗರ ಪಾಲಿಕೆ ಸ್ವಲ್ಪವೂ ಇತ್ತ ಗಮನ ಹರಿಸುತ್ತಿಲ್ಲ.

ಹೊಸದಾಗಿ ಯಾವುದೇ ಬಡಾವಣೆ ನಿರ್ಮಾಣವಾದರೆ ಉದ್ಯಾನಕ್ಕಾಗಿ ಜಾಗ ಮೀಸಲಿರಿಸಲಾಗುತ್ತದೆ. ಇಂತಹ ಜಾಗಗಳು ವಿಜಯಪುರ ನಗರದಾದ್ಯಂತ ಸಾಕಷ್ಟಿವೆ. ಕೆಲವೆಡೆ ಉದ್ಯಾನದ ಜಾಗಗಳನ್ನು ಅತಿಕ್ರಮಿಸಿ ಕಟ್ಟಡಗಳು ತಲೆ ಎತ್ತಿವೆ. ಉದ್ಯಾನಕ್ಕಾಗಿ ಮೀಸಲು ಜಾಗ ಎನ್ನುವ ಫಲಕ ಅಳವಡಿಸಲಾಗಿದೆ. ವಾಸ್ತವದಲ್ಲಿ ಉದ್ಯಾನ ಅಭಿವೃದ್ಧಿ ಮಾಡುತ್ತಿಲ್ಲ ಈ ಕುರಿತು ಮಹಾನಗರ ಪಾಲಿಕೆ ಆಯುಕ್ತರಿಗೆ ಸಂಪರ್ಕಿಸಿದಾಗ ಪ್ರತಿಕ್ರಿಯಿಸಲು ನಿರಾಕರಿಸಿದರು.ಪಾಲಿಕೆ ಅಧಿಕಾರಿಗಳ ಇಚ್ಛಾಶಕ್ತಿ ಕೊರತೆಯಿಂದ ಉದ್ಯಾನ ಸರಿಯಾಗಿ ನಿರ್ವಹಣೆಯಾಗುತ್ತಿಲ್ಲ. ಅನೇಕ ವರ್ಷಗಳಿಂದ ಸಲಕರಣೆಗಳು ಹಾಳಾಗಿದ್ದು ಯಾರೂ ಗಮನಿಸುತ್ತಿಲ್ಲ. –ಎಂ.ಬಿ ಶ್ರೀಧರ ವಿಜಯ‍‍ಪುರ