ತಿಕೋಟಾ | ಔಷಧೀಯ ಗುಣವುಳ್ಳ ಸಸ್ಯ ಬೆಳೆಯಲು ಶಾಲಾ ಆವರಣ ಸಜ್ಜು

ರಾಜ್ಯ ಔಷಧಿ ಗಿಡಮೂಲಿಕಾ ಪ್ರಾಧಿಕಾರ ಈ ವರ್ಷ ಸರಕಾರಿ ಶಾಲೆಗಳಲ್ಲಿ ಔಷಧವನ ನಿರ್ಮಾಣ ಮತ್ತು ಪೋಷಣೆ ವಿಶೇಷ ಯೋಜನೆ ಪ್ರಾರಂಭಿಸಿದ್ದು, ಈ ಯೋಜನೆಯಡಿ ವಿಜಯಪುರ ನಗರದ ಬಿ.ಎಲ್.ಡಿ.ಇ ಸಂಸ್ಥೆಯ ಎ.ವಿ.ಎಸ್. ಆಯುರ್ವೇದ ಮಹಾವಿದ್ಯಾಲಯ ಆಸ್ಪತ್ರೆ ಮತ್ತು ಸಂಶೋಧನೆ ಕೇಂದ್ರದ ಜೊತೆ ಒಡಂಬಡಿಕೆ ಮಾಡಿಕೊಂಡಿದೆ. ಈ ಯೋಜನೆಯಡಿ ವಿಶ್ವ ಪರಿಸರ ದಿನದ ಅಂಗವಾಗಿ ಮಕ್ಕಳು ಶಾಲೆಯ ಆವರಣದಲ್ಲಿ ಔಷಧಿಯ ಗುಣಗಳುಳ್ಳ ತುಳಸಿ, ಆಡುಸೊಗೆ, ಹೆಬ್ಬೇವು, ಲೋಳಸರ, ಮಧುನಾಶಿನಿ, ಮದಯಂತಿಕಾ, ನುಗ್ಗೆ ಮುಂತಾದ 250 ಕ್ಕೂ ಹೆಚ್ಚು ಸಸಿಗಳನ್ನು ನೆಟ್ಟು ವೈಜ್ಞಾನಿಕವಾಗಿ ಶಾಲಾ ಔಷಧಿ ವನ ನಿರ್ಮಿಸಿದರು.

ಈ ಮೂಲಕ ಮಂಡಳಿ ಮತ್ತು ಆಯುರ್ವೇದ ಕಾಲೇಜು ಪ್ರಕೃತಿಯ ಮಡಿಲಿನಲ್ಲಿರುವ ಗಿಡಗಳಲ್ಲಿಯ ಜೌಷಧೀಯ ಗುಣಗಳ ಬಗ್ಗೆ ಮಕ್ಕಳಿಗೆ ಬಾಲ್ಯದಲ್ಲಿಯೇ ಅರಿವು ಮೂಡಿಸಿ ಪರಿಸರದ ಬಗ್ಗೆ ಮತ್ತು ಸದೃಢ ಆರೋಗ್ಯದ ಬಗ್ಗೆ ಗಿಡಮೂಲಿಕೆಗಳ ಸದ್ಬಳಕೆಯ ಬಗ್ಗೆ ಜಾಗೃತಿ ಮೂಡಿಸಿದವು.

ಈ ಸಂದರ್ಭದಲ್ಲಿ ಆಯುರ್ವೇದ ಮಹಾವಿದ್ಯಾಲಯದ ಪ್ರಾಧ್ಯಾಪಕ ಡಾ. ಡಿ. ಎನ್. ಧರಿ ಮಾತನಾಡಿ, ಪರಿಸರದ ಮಹತ್ವ ಮತ್ತು ಸಂರಕ್ಷಣೆ ಬಗ್ಗೆ ಹಾಗೂ ಮಕ್ಕಳ ಆರೋಗ್ಯಕ್ಕೆ ಸಸ್ಯ ಸಂಜೀವಿನಿಯಾಗಬಲ್ಲದು ಎಂದು ಹೇಳಿದರು.

ಪ್ರಾಧ್ಯಾಪಕಿ ಡಾ. ಕಸ್ತೂರಿ ಪಾಟೀಲ ಮಾತನಾಡಿ, ಒಂದು ಮರ ನೂರು ವರವಾಗಿ ಸಹಾಯ ಮಾಡುತ್ತದೆ. ಪ್ರತಿಯೊಂದು ಮಕ್ಕಳಿಗೆ ಒಂದೊಂದು ಸಸಿ ಬೆಳೆಸುವ ಜವಾಬ್ದಾರಿ ನೀಡಿ ಅವುಗಳ ಪೋಷಣೆ ಬಗ್ಗೆ ಅರಿವು ಮೂಡಿಸಿದರು.

ಸಹಪ್ರಾಧ್ಯಾಪಕಿ ಡಾ. ವಿದ್ಯಾಲಕ್ಷ್ಮಿ ಪೂಜಾರಿ, ವಿಜ್ಞಾನ ಶಿಕ್ಷಕ ಗೋಟಕಂಡಕಿ, ಎನ್.ಎಸ್.ಎಸ್ ಅಧಿಕಾರಿ ಡಾ. ಆರ್. ಎ. ದೇಶಮುಖ, ಶಿಬಿರಾರ್ಥಿಗಳು, ಕಾಲೇಜಿನ ದ್ರವ್ಯಗುಣ ಸ್ನಾತಕೋತ್ತರ ವಿಭಾಗದ ವಿದ್ಯಾರ್ಥಿಗಳು ಉಪಸ್ಥಿತರಿದ್ದರು.