ಹುಣಸಗಿ (ಯಾದಗಿರಿ ಜಿಲ್ಲೆ): ತಾಲ್ಲೂಕಿನ ಯಡಹಳ್ಳಿ ಗ್ರಾಮದ ಬಡ ರೈತ ಕುಟುಂಬದ ವಿದ್ಯಾರ್ಥಿನಿ ಸಾಬವ್ವ ದೊಡ್ಡಮನಿ ಅವರು ದ್ವಿತೀಯ ಪಿಯುಸಿ ಕಲಾ ವಿಭಾಗದಲ್ಲಿ ಒಟ್ಟು 588 (ಶೇ 98) ಅಂಕ ಪಡೆದಿದ್ದಾರೆ.
‘ಪ್ರಜಾವಾಣಿ’ ಯೊಂದಿಗೆ ಮಾತನಾಡಿದ ಸಾಬವ್ವ, ‘ಬಡ ಕುಟುಂಬದಿಂದ ಬಂದಿರುವ ನನಗೆ ತಂದೆ ನಿಂಗಪ್ಪ ಹಾಗೂ ತಾಯಿ ಅಯ್ಯಮ್ಮ ಅವರು ಕೊಟ್ಟೂರು ಕಾಲೇಜಿಗೆ ಸೇರಿಸಿದರು. ರಾಜ್ಯದಲ್ಲಿಯೇ ಪ್ರಥಮ ಸ್ಥಾನ ಪಡೆಯಬೇಕು ಎಂಬ ಗುರಿಯೊಂದಿಗೆ ಅಧ್ಯಯನದಲ್ಲಿ ತೊಡಗಿದೆ. ಆದರೂ ನನಗೆ ಈ ಫಲಿತಾಂಶ ಸಂತಸ ತಂದಿದೆ‘ ಎಂದರು.
‘ಶಿಕ್ಷಣದಲ್ಲಿ ಶೇ 100 ಅಂಕ ಬಂದಿವೆ. ಸಂಸ್ಕೃತದ ಗಂಧವೇ ಗೊತ್ತಿರಲಿಲ್ಲ. ಕಷ್ಟಪಟ್ಟು ಅಧ್ಯಯನ ಮಾಡಿದ್ದರಿಂದ ಆ ವಿಷಯದಲ್ಲಿ ಶೇ 99 ಹಾಗೂ ಐಚ್ಚಿಕ ಕನ್ನಡದಲ್ಲಿ ಶೇ 99 ಅಂಕ ಬಂದಿವೆ. ಪ್ರತಿ ದಿನ ಬೆಳಿಗ್ಗೆ 4 ಗಂಟೆಯಿಂದಲೇ ಅಧ್ಯಯನ ಮಾಡುತ್ತಿದ್ದೆ. ಮುಂದೆ ಐಎಎಸ್ ಮಾಡುವ ಕನಸು ಹೊಂದಿದ್ದೇನೆ’ ಎಂದು ತಿಳಿಸಿದರು.
