ಕಕ್ಕೇರಾ | ಬಿತ್ತನೆಗೆ ಸಿದ್ಧನಾದ ಅನ್ನದಾತ

ಕಕ್ಕೇರಾ: ಸತತ ನಾಲ್ಕು ದಿನಗಳಿಂದ ಸುರಿಯುತ್ತಿರುವ ಜಿಟಿ ಜಿಟಿ ಮಳೆಯಿಂದ ಜನ ಜೀವನ ಅಸ್ತವ್ಯಸ್ತವಾದರೂ ರೈತರ ಮೊಗದಲ್ಲಿ ಮಂದಹಾಸ ಮೂಡಲು ಕಾರಣವಾಗಿದೆ. ಮಳೆಯಿಲ್ಲದೇ ಕೈಕಟ್ಟಿ ಕುಳಿತವರು ಕೃಷಿಯತ್ತ ಮತ್ತೆ ಮುಖ ಮಾಡಿದ್ದಾರೆ. ಮಳೆಯಿಂದ ಕಳೆದ ತಿಂಗಳಲ್ಲಿ ಬಿತ್ತಿದ ಬೆಳೆಗಳಿಗೆ ಮರುಜೀವ ಬಂದಿದೆ.

ಜಿಲ್ಲಾದ್ಯಾಂತ ಸುರಿಯುತ್ತಿರುವ ಮಳೆಗೆ ಹಳ್ಳಗಳು ತುಂಬಿ ಹರಿಯುತ್ತಿದ್ದು, ಜಮೀನಿನಲ್ಲಿ ನೀರು ನಿಂತಿವೆ. ಸ್ವಲ್ಪ ಮಳೆ ಕಡಿಮೆಯಾದರೆ ಸಾಕು, ಬಿತ್ತನೆಗೆ ತೊಗರಿ, ಸಜ್ಜಿ ಬಿತ್ತನೆಗೆ ಸನ್ನದ್ಧರಾಗಿದ್ದೇವೆ ಎಂದು ರೈತರು ತಿಳಿಸಿದ್ದಾರೆ.

‘ರೈತರಿಗೆ ತಾಡಪತ್ರಿ, ಸ್ಪಿಂಕ್ಲರ್‌ ಪೈಪ್, ಸುಮಾರು 110 ಕ್ವಿಂಟಲ್ ತೊಗರಿ ಬೀಜ ವಿತರಿಸಿದ್ದು, ಹೆಸರು ಬೀಜಗಳನ್ನು ಮಾತ್ರ ಯಾವ ರೈತರು ತೆಗೆದುಕೊಳ್ಳದ ಕಾರಣ ಮರಳಿ ಇಲಾಖೆಗೆ ತಲುಪಿಸಲಾಗಿದೆ’ ಎಂದು ಕೃಷಿ ಅಧಿಕಾರಿ ಚನ್ನಪ್ಪಗೌಡ ಮಾಹಿತಿ ನೀಡಿದರು.

ಮುಂಗಾರು ಹಿನ್ನಡೆಯಾದರೂ ಕಳೆದ ಮೂರು ದಿನಗಳಿಂದ ಪಟ್ಟಣದ ವ್ಯಾಪ್ತಿಯಲ್ಲಿ ಕ್ರಮವಾಗಿ 2.06, 10.02, 3.04 ಮೀಮಿ ಮಳೆಯಾಗಿದ್ದು,  ವಿವಿಧ ವಾರ್ಡ್‌ಗಳಲ್ಲಿ ತ್ಯಾಜ್ಯ ಸಂಗ್ರಹವಾಗಿದ್ದು, ಪುರಸಭೆ ಕಾರ್ಮಿಕರು ಮಳೆಯಲ್ಲೇ ಸ್ವಚ್ಛತಾ ಕಾರ್ಯ ಮಾಡುತ್ತಿರುವುದು ಕಂಡು ಬಂದಿತು.

‘ಒಂದೂವರೆ ತಿಂಗಳ ಹಿಂದೆ ಟೊಮೆಟೊ ಬಿತ್ತನೆಗೆ ಸಕಲ ಸಿದ್ಧತೆ ನಡೆಸಿದ್ದೆವು. ಜಮೀನು ಸಮೀಪದ ವಿದ್ಯುತ್ ಪರಿವರ್ತಕ ಸುಟ್ಟಿದ್ದರಿಂದ ಸಮಸ್ಯೆಯಾಯಿತು. ಇಲ್ಲದಿದ್ದರೆ ಟೊಮೆಟೊದಿಂದ ಲಕ್ಷಾಂತರ ರೂಪಾಯಿ ಲಾಭ ಬರುತ್ತಿತ್ತು. ಆದರೂ ಒಂದು ಎಕರೆ ಸೌತೆಕಾಯಿ, ಟೊಮೆಟೊ, ಮೆಣಸಿನಕಾಯಿ, ಮೂಲಂಗಿ ಇನ್ನಿತರ ತರಕಾರಿ ಬೆಳೆಗಳನ್ನು ಬೆಳೆಯಲಾಗಿದ್ದು, 40 ದಿನಗಳಲ್ಲಿ ಸಂಪೂರ್ಣ ಬೆಳೆ ಬರಲಿದೆ’ ಎಂದು ರೈತ ಪ್ರಭು ಹಡಪದ ತಿಳಿಸಿದರು.