ಶುಕ್ರವಾರ, 22 ಸೆಪ್ಟೆಂಬರ್ 2023
×
ADVERTISEMENT
ಈ ಕ್ಷಣ :
ADVERTISEMENT
ನೀರಿನ ಸಮಸ್ಯೆಗೆ ಬೇಕು ಶಾಶ್ವತ ಪರಿಹಾರ: ಮರುಕಳಿಸುತ್ತಿವೆ ವಾಂತಿ ಭೇದಿ ಪ್ರಕರಣಗಳು
ನೀರಿನ ಸಮಸ್ಯೆಗೆ ಬೇಕು ಶಾಶ್ವತ ಪರಿಹಾರ: ಮರುಕಳಿಸುತ್ತಿವೆ ವಾಂತಿ ಭೇದಿ ಪ್ರಕರಣಗಳು
ಮರುಕಳಿಸುತ್ತಿವೆ ವಾಂತಿ ಭೇದಿ ಪ್ರಕರಣಗಳು; ಸ್ವಚ್ಛತೆಗೆ ಜನರೂ ಕೈಜೋಡಿಸಲಿ ಎಂದ ಆಡಳಿತ
Published 3 ಜುಲೈ 2023, 7:20 IST
Last Updated 3 ಜುಲೈ 2023, 7:20 IST
ಅಕ್ಷರ ಗಾತ್ರ

ಯಾದಗಿರಿ: ಜಿಲ್ಲೆಯಲ್ಲಿ ಪ್ರತಿ ವರ್ಷವೂ ಕಲುಷಿತ ನೀರು ಸೇವಿಸಿ ಹಲವಾರು ಜನರು ವಾಂತಿ ಭೇದಿಯಿಂದ ಬಳಲುವುದು ಸಾಮಾನ್ಯ ಎಂಬಂತಾಗಿದೆ.

2022ರ ಅಕ್ಟೋಬರ್ ತಿಂಗಳಲ್ಲಿ ಶಹಾ‍ಪುರ ತಾಲ್ಲೂಕಿನ ಹೊತಪೇಟ ಗ್ರಾಮದಲ್ಲಿ ಕಲುಷಿತ ನೀರು ಕುಡಿದು ಮೂವರು ಮೃತಪಟ್ಟಿದ್ದರು. ಶುದ್ಧ ಕುಡಿಯುವ ನೀರು ಪೂರೈಸುವಲ್ಲಿ ವಿಫಲರಾದ ಪಿಡಿಒ, ಎಂಜಿನಿಯರ್‌ ಅಮಾನತುಗೊಂಡಿದ್ದರು. ಇದಾದ ನಂತರ ಸ್ವಚ್ಛತೆ ಹಾಗೂ ನೀರು ಸರಬರಾಜಿಗಾಗಿ ಗಾಂಧಿ ಪ್ರಶಸ್ತಿ ಸಿಕ್ಕಿತು ಎಂದು ಹೇಳಲಾದ ಅನಪುರ ಗ್ರಾಮದಲ್ಲೇ ‘ಮಲ ಮಿಶ್ರಿತ ನೀರು’ ಕುಡಿದು 2023ರ ಫೆಬ್ರುವರಿ ತಿಂಗಳಲ್ಲಿ ತೀವ್ರ ಸ್ವರೂಪದ ವಾಂತಿ ಭೇದಿ ಕಾಣಿಸಿಕೊಂಡಿತ್ತು. 90ಕ್ಕೂ ಹೆಚ್ಚು ಜನ ಅಸ್ವಸ್ಥರಾಗಿದ್ದು, ಮೂರು ಜನ ಮೃತಪಟ್ಟರು.

ಗುರುಮಠಕಲ್ ತಾಲ್ಲೂಕಿನ ಅನಪುರ ಗ್ರಾಮದಲ್ಲಿ ನೀರಿನ ತೊಟ್ಟಿಯಲ್ಲಿ ಪಾಚಿಗಟ್ಟಿರುವುದು
ಗುರುಮಠಕಲ್ ತಾಲ್ಲೂಕಿನ ಅನಪುರ ಗ್ರಾಮದಲ್ಲಿ ನೀರಿನ ತೊಟ್ಟಿಯಲ್ಲಿ ಪಾಚಿಗಟ್ಟಿರುವುದು

ಅನಪುರ ಘಟನೆ ಸಂಪೂರ್ಣ ಹತೋಟಿಗೆ ಬರುವಷ್ಟರಲ್ಲೇ ಚಿನ್ನಾಕಾರ ಗ್ರಾಮದಲ್ಲಿ (ಫೆ.28) 8 ಜನ ವಾಂತಿ ಭೇದಿಗೆ ಅಸ್ವಸ್ಥರಾದರು. ಅದಾದ ತಿಂಗಳ ಅವಧಿಯಲ್ಲಿ ಮತ್ತೆ ದಂತಾಪುರದಲ್ಲಿ ವಾಂತಿ ಭೇದಿ ಕಾಣಿಸಿಕೊಂಡಿತು. ಕಳೆದ ಸೋಮವಾರ (ಜೂ.24) ದಿಂದ ಚಪೆಟ್ಲಾ ಗ್ರಾಮ ಪಂಚಾಯಿತಿ ವ್ಯಾಪ್ತಿಯ ಹಿಮಾಲಪುರ ಗ್ರಾಮದಲ್ಲೂ ವಾಂತಿ ಭೇದಿ ಕಾಣಿಸಿಕೊಂಡಿದ್ದು, ಈವರೆಗೆ (ಜು.1) 95ಕ್ಕೂ ಹೆಚ್ಚು ಜನರು ಅಸ್ವಸ್ಥರಾಗಿದ್ದಾರೆ.

ಅಲ್ಲದೇ ಹುಣಸಗಿ ತಾಲ್ಲೂಕಿನ ಮಾರನಾಳ ತಾಂಡಾ ಹಾಗೂ ಬೈಲಾಪುರ ತಾಂಡಾದಲ್ಲಿ ಕಲುಷಿತ ನೀರು ಸೇವನೆಯಿಂದಾಗಿ ಕೆಲವರಲ್ಲಿ ವಾಂತಿ ಭೇದಿ ಜೂನ್‌ 26–27ರಂದು ಕಾಣಿಸಿಕೊಂಡಿತ್ತು. ಅಧಿಕಾರಿಗಳು ಹಾಗೂ ವೈದ್ಯರು ತೀವ್ರ ಕಟ್ಟೆಚ್ಚರ ವಹಿಸಿದ್ದರಿಂದಾಗಿ ಎಲ್ಲರೂ ಗುಣಮುಖರಾಗಿದ್ದು, ಸದ್ಯ ಎರಡೂ ತಾಂಡಾಗಳಲ್ಲಿ ಜನತೆ ಆರೋಗ್ಯದಿಂದ ಇದ್ದಾರೆ.

ಜಿಲ್ಲೆಯಲ್ಲಿ ಪದೇ ಪದೇ ವಾಂತಿ ಭೇದಿಗೆ ಜನ ಹೈರಾಣಾಗುತ್ತಿದ್ದಾರೆ. ಹಳೇ ಕಾಲದ ಪೈಪ್ ಲೈನ್ ಇನ್ನೂ ಬಳಕೆಯಲ್ಲಿದ್ದು. ಅಲ್ಲಲ್ಲಿ ಸೋರಿಕೆಗಳು ಕಂಡುಬಂದ ಕೂಡಲೇ ದುರಸ್ತಿ ಮಾಡಬೇಕಿದೆ. ಈ ಸಮಸ್ಯೆಯ ಜೊತೆಗೆ ಜೆಜೆಎಂ ಕಾಮಗಾರಿಯ ಕುರಿತು ‘ಕಳಪೆ ಗುಣಮಟ್ಟ, ಅಸಮರ್ಪಕ ಅಳವಡಿಕೆ, ಕಾಟಾಚಾರದ ಕೆಲಸ, ದೂರದೃಷ್ಟಿಯಿಲ್ಲದೆ ಪೈಪ್ ಲೈನ್ ಅಳವಡಿಕೆ’ ಮಾಡುತ್ತಿದ್ದಾರೆ ಎನ್ನುವ ಆರೋಪಗಳೂ ಗ್ರಾಮೀಣ ಭಾಗದಲ್ಲಿ ಕೇಳಿಬರುತ್ತಿದೆ.

ಕೇಂದ್ರ ಸರ್ಕಾರದ ಬಹು ನಿರೀಕ್ಷಿತ ಯೋಜನೆಯಾದ ಜಲ ಜೀವನ ಮಿಷನ್ ಸಂಪೂರ್ಣವಾಗಿ ಹಳ್ಳ ಹಿಡಿದಿದೆ. ಆಯಾ ಗ್ರಾಮ ಪಂಚಾಯಿತಿಯ ಸ್ಥಳೀಯ ಪ್ರಭಾವಿ ರಾಜಕೀಯ ಮುಖಂಡರು ಕಾಮಗಾರಿಯನ್ನು ಗುತ್ತಿಗೆ ರೂಪದಲ್ಲಿ ಪಡೆದುಕೊಂಡು ಅರೆ ಬರೆ ಕೆಲಸ ಮಾಡುವುದರ ಜತೆಗೆ ರಸ್ತೆಯನ್ನು ಮಧ್ಯದಲ್ಲಿ ಸೀಳಿ ಪೈಪು ಹಾಕುವ ನೆಪದಲ್ಲಿ ರಸ್ತೆಯನ್ನು ಹಾಳು ಮಾಡಿದ್ದಾರೆ. ಕಳಪೆ ಗುಣಮಟ್ಟದ ಪೈಪುಗಳನ್ನು ಹಾಕಿದ್ದರಿಂದ ನೀರು ಬರುವ ಮುನ್ನವೇ ಪೈಪು ಒಡೆದು ಹೋಗಿವೆ ಎನ್ನುತ್ತಾರೆ ಗ್ರಾಮೀಣ ಪ್ರದೇಶದ ಜನತೆ.

ಗುರುಮಠಕಲ್ ತಾಲ್ಲೂಕಿನ ಅನಪುರ ಗ್ರಾಮದಲ್ಲಿ ಮನೆಗಳಿಗೆ ನಳದ ಸಂಪರ್ಕದ ಪೈಪ್ ಲೈನ್ ಇರುವ ಚರಂಡಿ ಸ್ವಚ್ಛಗೊಳಿಸಿಲ್ಲ
ಗುರುಮಠಕಲ್ ತಾಲ್ಲೂಕಿನ ಅನಪುರ ಗ್ರಾಮದಲ್ಲಿ ಮನೆಗಳಿಗೆ ನಳದ ಸಂಪರ್ಕದ ಪೈಪ್ ಲೈನ್ ಇರುವ ಚರಂಡಿ ಸ್ವಚ್ಛಗೊಳಿಸಿಲ್ಲ

ಗ್ರಾಮ ಪಂಚಾಯಿತಿಗಳು ಅಥವಾ ಸ್ಥಳೀಯ ಸಿಬ್ಬಂದಿಯ ಜೊತೆಗೆ ಜನತೆಯೂ ಸ್ವಚ್ಛತೆ ನಿರ್ವಹಣೆಗೆ ಕೈ ಜೋಡಿಸಬೇಕು. ಚರಂಡಿಯಲ್ಲೇ ಮನೆಯ ಕಸವನ್ನೂ ಎಸೆಯುವ ಕೆಲಸ, ಶೌಚಕ್ಕೆ ಬಯಲಿಗೆ ತೆರಳುವುದು ಇನ್ನೂ ಮುಂದುವರೆದಿದೆ. ಎಷ್ಟೇ ಜಾಗೃತಿ ಮೂಡಿಸಿದರೂ ಜನ ಕೇಳುವುದಿಲ್ಲ. ಹೆಚ್ಚು ಹೇಳಿದರೆ ಜಗಳಕ್ಕೂ ಬಂದ ಉದಾಹರಣೆಗಳಿವೆ ಎಂದು ಪಂಚಾಯಿತಿಯೊಂದರ ಸಿಬ್ಬಂದಿ ತಿಳಿಸಿದರು.

ಗುರುಮಠಕಲ್ ತಾಲ್ಲೂಕಿನ ಗುಂಜನೂರು ಗ್ರಾಮದ ನೀರಿನ ನಳದ ಸುತ್ತಲೂ ಚರಂಡಿ ನಿರು ನಿಂತು ಗಬ್ಬೆದ್ದಿದೆ
ಗುರುಮಠಕಲ್ ತಾಲ್ಲೂಕಿನ ಗುಂಜನೂರು ಗ್ರಾಮದ ನೀರಿನ ನಳದ ಸುತ್ತಲೂ ಚರಂಡಿ ನಿರು ನಿಂತು ಗಬ್ಬೆದ್ದಿದೆ

ಜಿಲ್ಲೆಯಲ್ಲಿ ಕಲುಷಿತ ನೀರು ಕುಡಿದು ಅಸ್ವಸ್ಥರಾಗುವುದು, ಸಾವನ್ನಪ್ಪುವುದು ವರ್ಷದಲ್ಲಿ ಅಲ್ಲಲ್ಲಿ ನಡೆಯುವುದು ಕಂಡು ಬರುತ್ತಿದೆ. ಆಗ ಕೆಲ ದಿನ ಟ್ಯಾಂಕರ್‌ ಮೂಲಕ ನೀರು ಪೂರೈಸಲಾಗುತ್ತದೆ. ನಂತರ ಮತ್ತೆ ಅದೇ ಮೆಲ್ತೊಟ್ಟಿ ಟ್ಯಾಂಕ್‌ ನೀರು ಸೇವಿಸುವುದು ಸಾಮಾನ್ಯವಾಗಿದೆ. ಇದ್ದ ಶುದ್ಧ ಕುಡಿಯುವ ನೀರಿನ ಘಟಕಗಳು ಹಾಳಾಗಿವೆ. ಕೆಲವು ಕಡೆ ಯಂತ್ರೋಪಕರಣಗಳೇ ಇಲ್ಲದಂತಾಗಿವೆ.

ಅಧಿಕಾರಿ, ಜನಪ್ರತಿನಿಧಿಗಳು ಕಲುಷಿತ ನೀರಿನ ಸಮಸ್ಯೆಗಳಿಗೆ ತಾತ್ಕಾಲಿಕ ಪರಿಹಾರ ಒದಗಿಸುವ ಬದಲಿಗೆ ಶುದ್ಧ ಕುಡಿಯುವ ನೀರಿಗೆ ಶಾಶ್ವತ ಪರಿಹಾರಕ್ಕೆ ಚಿಂತನೆ ಮಾಡಬೇಕಿದೆ.

ಗುರುಮಠಕಲ್ ತಾಲ್ಲೂಕಿನ ಗಾಜರಕೋಟ ಗ್ರಾಮದಲ್ಲಿ ನೀರಿನ ಟ್ಯಾಂಕ್ ಕೆಳಗಿನ ವಾಲ್ವ್ ಗುಂಡಿಯಲ್ಲಿ ಚರಂಡಿ ನೀರು ಸಂಗ್ರಹವಾಗಿದೆ
ಗುರುಮಠಕಲ್ ತಾಲ್ಲೂಕಿನ ಗಾಜರಕೋಟ ಗ್ರಾಮದಲ್ಲಿ ನೀರಿನ ಟ್ಯಾಂಕ್ ಕೆಳಗಿನ ವಾಲ್ವ್ ಗುಂಡಿಯಲ್ಲಿ ಚರಂಡಿ ನೀರು ಸಂಗ್ರಹವಾಗಿದೆ
ತಾಲ್ಲೂಕು ವ್ಯಾಪ್ತಿಯ ಎಲ್ಲಾ ಗ್ರಾಮಗಳಲ್ಲೂ ಪ್ರತಿ ಹದಿನೈದು ದಿನಗಳಿಗೊಮ್ಮೆ ನೀರಿನ ಟ್ಯಾಂಕ್ ಹಾಗೂ ಚರಂಡಿ ಸ್ವಚ್ಛತೆ ಕಡ್ಡಾಯವೆಂದು ಪಿಡಿಒಗಳಿಗೆ ಸೂಚನೆ ನೀಡಲಾಗಿದೆ. ಅಂತೆಯೇ ಪ್ರತಿ ಗ್ರಾಮದ ಜಲ ಮೂಲಗಳಿಂದ ನೀರಿನ ಮಾದರಿ ಪರೀಕ್ಷೆಯನ್ನೂ ಸತತ ಮಾಡಿಸಲಾಗುತ್ತಿದೆ
– ಎಸ್.ಎಸ್.ಖಾದ್ರೋಳಿ, ಗುರುಮಠಕಲ್‌ ತಾಲ್ಲೂಕು ಪಂಚಾಯಿತಿ ಇಒ
ಅನಪುರ ಗ್ರಾಮದಲ್ಲಿ ವಾಂತಿ ಭೇದಿಗೆ ಮೃತಪಟ್ಟವರ ಕುಟುಂಬಕ್ಕೆ ಸರ್ಕಾರದಿಂದ ಪರಿಹಾರ ಒದಗಿಸಲು ಈಗಾಗಲೇ ಕಡತ ಸರ್ಕಾರದ ಹಂತದಲ್ಲಿದೆ. ಶೀಘ್ರ ಪರಿಹಾರ ದೊರುಕುವ ಭರವಸೆಯಿದೆ
– ಮಹ್ಮದ್ ಮೋಸಿನ್ ಅಹ್ಮದ್, ಗುರುಮಠಕಲ್ ತಹಶೀಲ್ದಾರ್
ಫೆಬ್ರುವರಿ ತಿಂಗಳ ಕೊನೆಯಲ್ಲಿ ನನ್ನ ಪತ್ನಿ ವಾಂತಿ ಭೇದಿಗೆ ಮೃತಪಟ್ಟಳು. ಸರ್ಕಾರ ಪರಿಹಾರ ನೀಡುವ ಭರವಸೆ ನೀಡಿತ್ತು. ವಿಧಾನಸಭಾ ಚುನಾವಣೆಗಳ ನಂತರ ಕೊಡಬಹುದೆಂದು ಭಾವಿಸಿದ್ದೆವು. ಆದರೆ ಈವರೆಗೂ ಇನ್ನೂ ಪರಿಹಾರಧನ ಬಂದಿಲ್ಲ
– ವೆಂಕಟಪ್ಪ ನಕ್ಕ, ಮೃತ ಸಾವಿತ್ರಮ್ಮಳ ಪತಿ
ಗ್ರಾಮದಲ್ಲಿ ಸ್ವಚ್ಛತೆಯೆಂಬುದು ಗಗನ ಕುಸುಮ. ರಸ್ತೆಯಲ್ಲಿ ನಳಗಳಿರುವಲ್ಲಿ ಪೈಪ್‌ಲೈನ್ ಇರುವಲ್ಲಿ ಚರಂಡಿ ನೀರು ಗಲೀಜು ತುಂಬಿರುತ್ತದೆ. ನಮ್ಮ ಅಳಲು ಕೇಳಲು ಅಧಿಕಾರಿಗಳಿಗೆ ಪುರುಸೊತ್ತೇ ಸಿಗುತ್ತಿಲ್ಲ
– ಅಂಜಪ್ಪ ಗುಂಜನೂರು, ಗ್ರಾಮಸ್ಥ
ಪೈಪ್‌ನಲ್ಲಿ ಕಲುಷಿತ ನೀರು ಸಂಗ್ರಹ
ಶಹಾಪುರ ತಾಲ್ಲೂಕು ವ್ಯಾಪ್ತಿಯಲ್ಲಿ ಜೆಜೆಎಂ ಕಾಮಗಾರಿಗೆ ಹೊಸ ಪೈಪ್‌ ಅಳವಡಿಸುವ ಭರದಲ್ಲಿ ಹಳೆ ಪೈಪ್‌ ಒಡೆದಿರುವುದು ಅಲ್ಲಿ ಕಲುಷಿತ ನೀರು ಸಂಗ್ರಹವಾಗಿ ವಿವಿಧ ರೋಗಗಳಿಗೆ ಕಾರಣವಾಗುತ್ತಿದೆ. ಅಲ್ಲದೆ ಸದ್ಯ ಸರಬರಾಜು ಮಾಡುವ ಜಲಮೂಲದಲ್ಲಿ ಯಾವುದೇ ಸ್ವಚ್ಛತೆ ಹಾಗೂ ಸುರಕ್ಷತೆ ಇಲ್ಲವಾಗಿದೆ. ಜಾಲಿಗಿಡ ಬೆಳೆದಿರುವುದು ಹಾಗೂ ನೀರು ಸೋರಿಕೆಯಿಂದ ಅಲ್ಲಿನ ಪ್ರದೇಶ ದುರ್ವಾಸನೆಯಿಂದ ಕೂಡಿದೆ. ಸಮೃದ್ಧ ನೀರು ಇರುವ ಕಡೆ ನಿರ್ವಹಣೆ ಇಲ್ಲ. ನಿರ್ವಹಣೆ ಇರುವ ಕಡೆ ನೀರಿನ ಲಭ್ಯತೆ ಇಲ್ಲದೆ ಪರದಾಡುವಂತೆ ಆಗಿದೆ. ‘ಸರಿಯಾದ ಟ್ಯಾಂಕ್ ನಿರ್ಮಿಸಿಲ್ಲ. ಹಳೆ ಟ್ಯಾಂಕಿಗೆ ಪೈಪ್‌ ಜೋಡಣೆ ಸಮೃದ್ಧಿಯ ನೀರಿನ ಮೂಲವನ್ನು ಅರೆಯದೆ ಕೊಳವೆ ಬಾವಿ ಕೊರೆಯಿಸಿದ್ದಾರೆ. ಅಂತರ್ಜಲಮಟ್ಟ ಕುಸಿತದಿಂದ ಕೊಳವೆ ಬಾವಿ ಒಣಗಿವೆ. ಮನೆ ಮನೆಗೆ ಸರಿಯಾದ ಪೈಪ್‌ ಜೊಡಣೆ ಮಾಡಿಲ್ಲ. ಹೀಗೆ ಹಲವು ಸಮಸ್ಯೆಗಳನ್ನು ಜೆಜೆಎಂ ಯೋಜನೆ ಹುಟ್ಟು ಹಾಕಿದೆ' ಎನ್ನುವುದು ಗ್ರಾಮಸ್ಥರ ಆರೋಪ. ಇವೆಲ್ಲದರ ನಡುವೆ ಗ್ರಾಮ ಪಂಚಾಯಿತಿ ಹಾಗೂ ಜೆಜೆಎಂ ಕೆಲಸ ಪೂರ್ಣಗೊಳಿಸಿದ ಗುತ್ತೆದಾರರ ನಡುವೆ ಶಿಥಿಲ ಸಮರ ಶುರುವಾಗಿದೆ. ‘ಗ್ರಾಪಂ ಅಧೀನಕ್ಕೆ ತೆಗೆದುಕೊಳ್ಳುವಂತೆ ಗುತ್ತಿಗೆದಾರರು ದುಂಬಾಲು ಬಿದ್ದಿದ್ದಾರೆ. ಕಳಪೆ ಕಾಮಗಾರಿ ಅಪೂರ್ಣ ಕೆಲಸ ಹೀಗೆ ವಿವಿಧ ನೆಪ ಹೇಳಿ ಇಂತಿಷ್ಟು ಹಣ ನೀಡಿದರೆ ಚಾರ್ಚ್ ತೆಗೆದುಕೊಳ್ಳುವ ಅಲಿಖಿತ ಒಪ್ಪಂದ ಶುರವಾಗಿದೆ. ಆದರೆ ಶುದ್ಧ ನೀರು ಸರಬರಾಜು ಮಾತ್ರ ಮರೀಚಿಕೆಯಾಗಿದೆ’ ಎನ್ನುತ್ತಾರೆ ಶಿರವಾಳ ಗ್ರಾಮದ ಶಿವಪ್ಪ.
ನಮ್ಮೂರಿನ ನೀರಿನ ಸಮಸ್ಯೆಯನ್ನು ಬಗೆಹರಿಸಲು ಸಾಧ್ಯವೇ ಇಲ್ಲದ ಸಮಸ್ಯೆಯೇನೋ? ಅಧಿಕಾರಿಗಳಿಗೆ ಜನಪ್ರತಿನಿಧಿಗಳಿಗೆ ನಮ್ಮ ಸಮಸ್ಯೆಯನ್ನು ಬಗೆಹರಿಸುವ ಮನಸ್ಸಿಲ್ಲವೇನೊ?
– ಆನಂದ ಇಟ್ಕಾಲ್ ಗಾಜರಕೋಟ ಗ್ರಾಮಸ್ಥ
ಗ್ರಾಮದ ನೀರು ಸರಬರಾಜು ಪೈಪ್‌ಲೈನ್ ಜಾಲವು ಸಂಪೂರ್ಣ ಚರಂಡಿ ಪಕ್ಕದಲ್ಲೇ ಇದೆ. ಚರಂಡಿಗಳೂ ಸ್ವಚ್ಛಗೊಳಿಸಿಲ್ಲ. ವಾಂತಿ ಭೇದಿಗೆ ವರ್ಷಾರಂಭದಲ್ಲಿ ಮೂರು ಪ್ರಾಣಗಳು ಹೋದರೂ ತಿದ್ದಿಕೊಳ್ಳದಿದ್ದರೆ ಹೇಗೆ?
– ಚಂದ್ರು ಅನಪುರ, ಕರವೇ ಗ್ರಾಮ ಘಟಕದ ಅಧ್ಯಕ್ಷ

Cut-off box - ಇನ್ನೂ ಸಿಗದ ಪರಿಹಾರ ಗುರುಮಠಕಲ್‌: 2023ರ ಫೆಬ್ರುವರಿ ತಿಂಗಳಲ್ಲಿ ಗುರುಮಠಕಲ್‌ ತಾಲ್ಲೂಕಿನ ಅನಪುರ ಗ್ರಾಮದಲ್ಲಿ ಕಾಣಿಸಿಕೊಂಡಿದ್ದ ವಾಂತಿ ಭೇದಿಗೆ ಸಾವಿತ್ರಮ್ಮ ವೆಂಕಟಪ್ಪ ನಕ್ಕ ಸಾಯಮ್ಮ ಭೀಮಶಪ್ಪ ಮಿನಾಸಪುರಂ ಹಾಗೂ ನರಸಮ್ಮ ಯಲ್ಲಪ್ಪ ಸೇರಿದಂತೆ ಮೂವರು ಮೃತಪಟ್ಟಿದ್ದರು. ಅಂದಿನ ಸರ್ಕಾರ ಮೃತರ ಕುಟುಂಬಕ್ಕೆ ಪರಿಹಾರ ಒದಗಿಸುವ ಭರವಸೆ ನೀಡಿತ್ತು. ಆದರೆ ಈವರೆಗೂ ಮೃತರ ಕುಟುಂಬಗಳಿಗೆ ಪರಿಹಾರಧನ ತಲುಪಿಸಿಲ್ಲ. ಗುರುಮಠಕಲ್ ತಾಲ್ಲೂಕಿನ 18 ಗ್ರಾಮ ಪಂಚಾಯಿತಿಗಳ ವ್ಯಾಪ್ತಿಯಲ್ಲಿ ಯಂಪಾಡ ಗಾಜರಕೋಟ ಪುಟಪಾಕ ಚಂಡ್ರಿಕಿ ಸೇರಿ ವಿವಿಧ ಗ್ರಾಮಗಳಲ್ಲಿ ನೀರು ಸಿಕ್ಕರೆ ಸಾಕು ಎನ್ನುವ ಸ್ಥಿತಿಯಿದ್ದರೆ ಮತ್ತೆ ಕೆಲವೆಡೆ ಸಾಕಷ್ಟು ನೀರಿದ್ದರೂ ಸ್ವಚ್ಛತೆಗೆ ಆದ್ಯತೆ ಸಿಗದಿರುವುದು ಮತ್ತೊಂದು ಸಮಸ್ಯೆ.

ಬಗೆಹರಿಯದ ನೀರಿನ ಸಮಸ್ಯೆ
ಹುಣಸಗಿ: ತಾಲ್ಲೂಕು ವ್ಯಾಪ್ತಿಯಲ್ಲಿ 18 ಗ್ರಾಮ ಪಂಚಾಯಿತಿಗಳು 36 ತಾಂಡಾಗಳಿದ್ದು ಇತ್ತಿಚೆಗೆ ತಾಲ್ಲೂಕಿನ ಮಾರನಾಳ ಬೈಲಾಪುರ ತಾಂಡಾದಲ್ಲಿ ಕಲುಷಿತ ನೀರು ಸೇವಿಸಿ 10 ಜನರು ವಾಂತಿ ಭೇದಿಯಿಂದ ಅಸ್ವಸ್ಥರಾಗಿದ್ದರು. ಶುದ್ಧ ಕುಡಿಯುವ ನೀರು ಪೂರೈಸುವ ಸಮಸ್ಯೆ ಈವರೆಗೂ ಬಗೆಹರಿದಿಲ್ಲ. ‘ಮಾರನಾಳ ತಾಂಡಾದಲ್ಲಿ ಮತ್ತೆ ಐದು ಜನರಿಗೆ ಆರೋಗ್ಯ ಸಮಸ್ಯೆ ಕಾಣಿಸಿಕೊಂಡಿತ್ತು. ನಮ್ಮ ಸಿಬ್ಬಂದಿ ಸೂಕ್ತ ಚಿಕಿತ್ಸೆ ನೀಡಿದ್ದರಿಂದಾಗಿ ಸದ್ಯ ಎಲ್ಲರೂ ಆರೋಗ್ಯದಿಂದ ಇದ್ದಾರೆ. ಗ್ರಾಮದಲ್ಲಿ ಆರೋಗ್ಯ ಸಿಬ್ಬಂದಿ ಕಾರ್ಯನಿರ್ವಹಿಸುತ್ತಿದ್ದಾರೆ’ ಎಂದು ಕೊಡೇಕಲ್ಲ ಸಮುದಾಯ ಆರೋಗ್ಯ ಕೇಂದ್ರದ ವೈದ್ಯ ಡಾ. ಪವನ್ ರಾವ್ ತಿಳಿಸಿದರು. ‘ತಾಲ್ಲೂಕಿನ ಬೈಲಾಪುರ ತಾಂಡಾದಲ್ಲಿ ಒಂದೇ ಕೊಳವೆ ಬಾವಿಯಿಂದ ನೀರು ಲಭ್ಯವಾಗಿದ್ದು ನೀರಿನ ತೊಂದರೆ ಇದೆ' ಎಂದು ಗ್ರಾಮ ಪಂಚಾಯಿತಿ ಸದಸ್ಯ ತಾರಾನಾಥ್ ಚವಾಣ್ ಹೇಳಿದರು. ‘ಇನ್ನೂ ತಾಲ್ಲೂಕಿನ ಬಹುತೇಕ ಗ್ರಾಮಗಳಲ್ಲಿ ಕುಡಿಯುವ ನೀರಿನ ಜಲಮೂಲಗಳನ್ನು ಸ್ವಚ್ಛಗೊಳಿಸಲಾಗಿದ್ದು ಯಾವುದೇ ತೊಂದರೆ ಇಲ್ಲ’ ಎಂದು ತಾಲ್ಲೂಕು ಪಂಚಾಯಿತಿ ಅಧಿಕಾರಿಗಳು ತಿಳಿಸಿದರು. ‘ಹುಣಸಗಿ ಪಟ್ಟಣಕ್ಕೆ ನೀರು ಸರಬರಾಜು ಆಗುತ್ತಿರುವ ದೇವಾಪುರ ( ಜೆ) ಬಳಿ ಇರುವ ಜಲಮೂಲ ಹಾಗೂ ಟ್ಯಾಂಕ್ ಅನ್ನು ಈಗಾಗಲೇ ಸ್ವಚ್ಛಗೊಳಿಸಲಾಗಿದ್ದು ಯಾವುದೇ ತೊಂದರೆ ಆಗದಂತೆ ಕ್ರಮ ಕೈಗೊಳ್ಳಲಾಗಿದೆ' ಎಂದು ಪಟ್ಟಣ ಪಂಚಾಯಿತಿ ಮುಖ್ಯ ಅಧಿಕಾರಿ ಚಂದ್ರಶೇಖರ್ ತಿಳಿಸಿದರು.

ಪೂರಕ ವರದಿ:ಟಿ.ನಾಗೇಂದ್ರ, ಭೀಮಶೇನರಾವ ಕುಲಕರ್ಣಿ, ಎಂ.ಪಿ.ಚಪೆಟ್ಲಾ

ತಾಜಾ ಸುದ್ದಿಗಾಗಿ ಪ್ರಜಾವಾಣಿ ಟೆಲಿಗ್ರಾಂ ಚಾನೆಲ್ ಸೇರಿಕೊಳ್ಳಿ | ಪ್ರಜಾವಾಣಿ ಆ್ಯಪ್ ಇಲ್ಲಿದೆ: ಆಂಡ್ರಾಯ್ಡ್ | ಐಒಎಸ್ | ನಮ್ಮ ಫೇಸ್‌ಬುಕ್ ಪುಟ ಫಾಲೋ ಮಾಡಿ.

ADVERTISEMENT
ADVERTISEMENT
ADVERTISEMENT
ADVERTISEMENT