ಹಂಪಿ (ಹೊಸಪೇಟೆ): ಜಾತಿ, ದೇಶ, ಭಾಷೆ ಮೀರಿದ ಪ್ರೇಮವು ವಿವಾಹದಲ್ಲಿ ಕೊನೆಗೊಂಡ ಘಟನೆ ಇಲ್ಲಿ ನಡೆದಿದೆ. ಹಂಪಿಯ ಹುಡುಗ ಹಾಗೂ ಪೋಲೆಂಡ್ ಹುಡುಗಿ ಮಂಗಳವಾರ ಸಂಜೆ ಶಾಸ್ತ್ರೋಕ್ತವಾಗಿ ಮದುವೆಯಾದರು.
ಹಂಪಿಯಲ್ಲಿ ವಿದೇಶಿ ಪ್ರವಾಸಿಗರಿಗೆ `ಪ್ರವಾಸಿ ಮಾರ್ಗದರ್ಶಕ~ನಾಗಿ (ಗೈಡ್) ಕೆಲಸ ಮಾಡುತ್ತಿದ್ದ ಶಿವಕುಮಾರ ಶೇಖರ ಅವರು ಭಾರತೀಯ ಸಂಸ್ಕೃತಿಯ ಬಗ್ಗೆ ಅಪಾರ ಮೆಚ್ಚುಗೆ ಹಾಗೂ ಗೌರವ ಹೊಂದಿದ ಪೋಲೆಂಡ್ನ ಶಿಕ್ಷಕಿಯಾಗಿದ್ದ ಮಾಲಗೋರ್ಜಾತ ದುಸುಕಿ ಅವರನ್ನು ಭಾರತೀಯ ಸಂಪ್ರದಾಯದಂತೆ ಮದುವೆಯಾದರು.
ಹಂಪಿಯ ವಿರೂಪಾಕ್ಷೇಶ್ವರ ದೇವಾಲಯದಲ್ಲಿ ಈ ಮದುವೆ ನಡೆಯಿತು.
ಮೂರನೇ ಬಾರಿಗೆ ಭಾರತಕ್ಕೆ ಬಂದಿರುವ ದುಸುಕಿ ಪ್ರತಿ ಬಾರಿಯೂ ಹಂಪಿಗೂ ಬಂದಿದ್ದಾರೆ. ಎರಡನೇ ಬಾರಿ ಬಂದಾಗಲೇ ಪ್ರೇಮಬಂಧನದಲ್ಲಿ ಸಿಲುಕಿದ್ದರಂತೆ. ತಮ್ಮ ಮನೆಯವರ ಅನುಮತಿ ಪಡೆದಿರುವ ಅವರು ಈ ಬಾರಿಯ ಭೇಟಿ ಸಂದರ್ಭದಲ್ಲಿ ಮದುವೆಯಾದರು.
ವೃದ್ಧ ತಾಯಿಯನ್ನು ಹೊಂದಿರುವ ದುಸುಕಿ ಅವರು ಭಾರತದಲ್ಲಿ ಹಾಗೂ ಪೋಲೆಂಡ್ನಲ್ಲಿ ಸ್ವಲ್ಪದಿನ ಕಳೆಯುವುದಾಗಿ ಹೇಳಿದರು. ಹಂಪಿ ನಿವಾಸಿಗಳು ಹಾಗೂ ಶೇಖರ ಅವರ ಸ್ನೇಹಿತರು, ಕೆಲ ವಿದೇಶಿ ಪ್ರವಾಸಿಗರು ವಿವಾಹದಲ್ಲಿ ಪಾಲ್ಗೊಂಡಿದ್ದರು.