ಮಕ್ಕಳ ಸರ್ವತೋಮುಖ ಬೆಳವಣಿಗೆಗೆ ಆಟಗಳು ಏಕೆ ಮುಖ್ಯ?

ಕ್ರೀಡಾ ಚಟುವಟಿಕೆಗಳಿಲ್ಲದ ಶಿಕ್ಷಣ ಪರಿಪೂರ್ಣ ಶಿಕ್ಷಣವಾಗಲಾರದು, ಮಕ್ಕಳ ಸರ್ವತೋಮುಖ ಬೆಳವಣಿಗೆಗೆ ದೈಹಿಕ ಚಟುವಟಿಕೆಗಳು ಅನಿವಾರ್ಯ ಹಾಗೂ ಕಡ್ಡಾಯ.

‘ದೈಹಿಕ ಚಟುವಟಿಕೆಗಳು ದೇಹಕ್ಕೆ ನೀಡುವ ಶಿಕ್ಷಣ ವಾಗಿದ್ದು ಇದರಿಂದ ವಿದ್ಯಾರ್ಥಿಗಳಲ್ಲಿ ದೈಹಿಕ, ಮಾನಸಿಕ, ಭಾವನಾತ್ಮಕ ಹಾಗೂ ಸಾಮಾಜಿಕ ಬದಲಾವಣೆಗೆ ಒತ್ತು ನೀಡುತ್ತದೆ . ವಿದ್ಯಾರ್ಥಿಗಳು ಬೆಳಿಗ್ಗೆಯಿಂದ ಸಾಯಂಕಾಲದ ವರೆಗೆ ಪಠ್ಯ ಚಟುವಟಿಕೆಗಳಲ್ಲಿ ನಿರತರಾಗಿರುವುದರಿಂದ ಅವರ ಮನಸ್ಸಿಗೆ ಮುದ ಅಥವಾ ಆರಾಮ ಅನಿವಾರ್ಯವಾಗಿರುತ್ತದೆ.

ಈ ನಿಟ್ಟಿನಲ್ಲಿ ಮನಸ್ಸನ್ನು ಮುದ ಗೊಳಿಸಲು ಸಮಯವನ್ನು ಮೀಸಲಿರಿಸಿರಬೇಕಾಗುತ್ತದೆ. ಹಾಗಾಗಿ ವಿದ್ಯಾರ್ಥಿಗಳು ಆಟೋಟಗಳಲ್ಲಿ ಭಾಗವಹಿಸುವುದು ಗುಂಪುಗಳೊಂದಿಗೆ ಬೆರೆತು ನಲಿಯುವುದನ್ನು ರೂಢಿಸಿಕೊಂಡಾಗ ಮಾನಸಿಕ ಹಾಗೂ ದೈಹಿಕ ನೋವು, ದುಗುಡ, ದುಮಾನಗಳು ಎಲ್ಲವೂ ಮಂಜಿನಂತೆ ಕರಗಿ ಮಕ್ಕಳ ಮನಸ್ಸಲ್ಲಿ ನವೊಲ್ಲಾಸ ಮೂಡುತ್ತದೆ. ಎಂದು ಜೀವನ ಶೈಲಿಯ ವರದಿ ಇದಕ್ಕೆ ಪುಷ್ಠಿ ನೀಡುತ್ತದೆ.

ದೈಹಿಕ ಚಟುವಟಿಕೆ ಹಾಗೂ ಆಟಗಳು ಮಕ್ಕಳ ಆರೋಗ್ಯವನ್ನು ವೃದ್ಧಿಸಿ ಕಾಯಿಲೆಗಳಿಂದ ದೂರವಿರಿಸಿ ಸುಂದರ ಜೀವನ ನಡೆಸಲು ಸಹಕರಿಸುತ್ತವೆ.
ದೈಹಿಕ ಚಟುವಟಿಕೆಗಳಲ್ಲಿ ಒಂದಾದ ಸ್ಕ್ವಾಟ್ ಇದರ ಅಭ್ಯಾಸದಿಂದ ಆಗುವ ಪ್ರಯೋಜನಗಳನ್ನು ಕೆಳಕಂಡಂತೆ ನೋಡೋಣ.
  ಸ್ಕ್ವಾಟ್ ಇದರ ಅಭ್ಯಾಸವು ದೇಹದಲ್ಲಿ ಅನವಶ್ಯಕ ಪೋಷಕಾಂಶಗಳನ್ನು ಹೊರದೂಡುತ್ತದೆ.

ಇದರ ಅಭ್ಯಾಸದಿಂದ ದೇಹದ ಬಾಗುವಿಕೆಗೆ ಸಹಕಾರಿಯಾಗಿರುವುದರ ಜೊತೆಗೆ ದೇಹದ ಕೆಳಭಾಗವು ಗಟ್ಟಿಯಾಗುತ್ತದೆ. 

 ಜೀರ್ಣಕ್ರಿಯೆಗೆ ಅತ್ಯುತ್ತಮ ವ್ಯಾಯಾಮ ಇದಾಗಿದ್ದು ಹೊಟ್ಟೆಯ ಒಳಭಾಗದ ಅಂಗಾಂಗಗಳು ಹಾಗೂ ಕರುಳಿನ ಕಾರ್ಯಕ್ಷಮತೆಗೆ ಸಹಕರಿಸುತ್ತದೆ. 

ದೇಹದ ಒಳ ಮಾಂಸ ಖಂಡಗಳು ಬಲಿಷ್ಠಗೊಂಡು ಹೊಟ್ಟೆಯ ಮಾಂಸ ಖಂಡ ಅಥವಾ ಸ್ನಾಯುಗಳು ಶಕ್ತಿಯುತಗೊಂಡು ಕಾರ್ಯನಿರ್ವಹಿಸುತ್ತದೆ. ಈ ನಿಟ್ಟಿನಲ್ಲಿ ದೈಹಿಕ ಚಟುವಟಿಕೆ ಹಾಗೂ ಆಟಗಳ ಹಿನ್ನೆಲೆಯನ್ನು ತಿಳಿಯೋಣ.

ಮನೋಲಾಸ ಕ್ರೀಡೆ ಹಾಗೂ ಆಟಗಳು ಮನುಷ್ಯನಿಗೆ ಮಾತ್ರವಲ್ಲದೆ ಪ್ರಾಣಿ ಪಕ್ಷಿಗಳಿಗೂ ಸಹಜವಾಗಿದ್ದು, ಪ್ರಕೃತಿಯು ಕರುಣಿಸಿರುವ ಒಂದು ವರದಾನವಾಗಿದೆ.

ಉದಾಹರಣೆಗೆ ಬೆಕ್ಕು ತನ್ನ ಮರಿಗಳೊಂದಿಗೆ ಆಟ ಆಡುವುದು,ನಾಯಿ ತನ್ನ ಮರಿಗಳೊಂದಿಗೆ ಆಟ ಆಡುವುದು ಹಾಗೂ ಪಕ್ಷಿಗಳೂ ಸಹ ತಮ್ಮ ಮರಿಗಳೊಂದಿಗೆ ರೆಕ್ಕೆ ಬಡಿಯಲು ಹಾರಲು ಕಲಿಸುವ ರೂಪದಲ್ಲಿ ಅತ್ಯಂತ ಮೇಲಕ್ಕೆ ಹೊಯ್ದು ನಂತರ ಬಿಡುತ್ತವೆ ತದನಂತರ ಹಿಡಿದುಕೊಳ್ಳುತ್ತವೆ ಈ ರೀತಿಯಾಗಿ ಅವೂ ಸಹ ಪ್ರಕೃತಿಗೆ ಸಹಜವಾಗಿ ಆಟ ಆಡುತ್ತವೆ. ಹೀಗೆ ಹುಲಿ ಸಿಂಹ ಎಲ್ಲಾ ಪ್ರಾಣಿಗಳು ಕೂಡ ಬೇಟೆ ಕಲಿಸುವ ರೂಪದಲ್ಲಿ ತಮ್ಮ ಮರಿಗಳೊಂದಿಗೆ ಆಟ ಆಡುವುದು ಮಾತ್ರವಲ್ಲದೆ ವಿವಿಧ ಪ್ರಾಣಿ ಪಕ್ಷಿಗಳಿಗೆ ಆಟಗಳು ಪ್ರಕೃತಿ ನೀಡಿದ ವರದಾನವಾಗಿದೆ.