ಬೆಂಗಳೂರು ಗ್ರಾಮಾಂತರ ಲೋಕಸಭಾ ಕ್ಷೇತ್ರ | ಚಂದ್ರಶೇಖರ ಹೆಸರಲ್ಲಿದೆ ದಾಖಲೆ

ಸತತ ಐದು ಚುನಾವಣೆಯಲ್ಲಿ ಜಯಿಸಿ ಸೋಲಿಲ್ಲದ ಸರದಾರನಾಗಿದ್ದ ಚಂದ್ರಶೇಖರ ಮೂರ್ತಿ ಅವರಿಗೆ ಸೋಲಿನ ರುಚಿ ತೋರಿಸಿದ್ದು ಜೆಡಿಎಸ್‌ನ ಎಚ್‌.ಡಿ. ಕುಮಾರಸ್ವಾಮಿ. 1996ರ ಲೋಕಸಭಾ ಚುನಾವಣೆ ಮೂಲಕ ರಾಜಕೀಯ ಪ್ರವೇಶಿಸಿದ ಕುಮಾರಸ್ವಾಮಿ ಅವರು ಮೊದಲ ಚುನಾವಣೆಯಲ್ಲೇ ಅನುಭವಿ ಚಂದ್ರಶೇಖರ ಅವರನ್ನು ಸೋಲಿಸುವುದರೊಂದಿಗೆ ‘ಕೈ’ ಕೋಟೆಯನ್ನು ಬೇಧಿಸಿದ್ದರು. 440444 ಮತಗಳನ್ನು ಪಡೆದಿದ್ದ ಕುಮಾರಸ್ವಾಮಿ ಅವರು 107404 (ಶೇ10.27) ಮತಗಳ ಅಂತರದಲ್ಲಿ ಗೆಲುವು ಸಾಧಿಸಿದ್ದರು. ಚಂದ್ರಶೇಖರ ಅವರು 333040 ಮತಗಳನ್ನು ಪಡೆದಿದ್ದರು. ಸೋಲಿನಿಂದ ಕುಗ್ಗದೆ 1999ರಲ್ಲಿ ನಡೆದ ಚುನಾವಣೆಯಲ್ಲಿ ಮತ್ತೆ ಕಣಕ್ಕಿಳಿದ ಚಂದ್ರಶೇಖರ ಅವರು 532910 ಮತಗಳನ್ನು ಪಡೆದು ಹಿಂದಿನ ಚುನಾವಣೆ ಸೋಲಿನ ಸೇಡು ತೀರಿಸಿಕೊಂಡಿದ್ದರು. ಈ ಚುನಾವಣೆಯಲ್ಲಿ ಬಿಜೆಪಿಯ ಎಂ. ಶ್ರೀನಿವಾಸ್ ಎರಡನೇ ಸ್ಥಾನ ಪಡೆದರೆ ಜೆಡಿಎಸ್‌ನಿಂದ ಸ್ಪರ್ಧಿಸಿದ್ದ ಕುಮಾರಸ್ವಾಮಿ ಅವರು ಕೇವಲ 19661 ಮತಗಳನ್ನು ಪಡೆದು ಮೂರನೇ ಸ್ಥಾನಕ್ಕೆ ಕುಸಿದು ಠೇವಣಿ ಕಳೆದುಕೊಂಡಿದ್ದರು. 6ನೇ ಗೆಲುವು ಸಾಧಿಸಿದ್ದ ಚಂದ್ರಶೇಖರ ಅವರ ಖುಷಿ ಹೆಚ್ಚು ಕಾಲ ಇರಲಿಲ್ಲ. ಅನಾರೋಗ್ಯದಿಂದಾಗಿ 2001ರಲ್ಲಿ ಅವರು ನಿಧನರಾದರು.