ಈಗಲೂ ನಾನು ಸಮಾಜವಾದಿ: ಮಾಜಿ ಪ್ರಧಾನಿ ಚಂದ್ರಶೇಖರ್ ಪುತ್ರ, BJP ಅಭ್ಯರ್ಥಿ ನೀರಜ್

‘ಸಮಾಜವಾದವೆಂಬ ವಿಚಾರಧಾರೆಯನ್ನು ಹೊಂದಿರುವುದಾಗಿ ಸಮಾಜವಾದಿ ಪಕ್ಷ ಹೇಳುತ್ತದೆ. ಆದರೆ ವಾಸ್ತವದಲ್ಲಿ ಅದು ಆ ತತ್ವಗಳನ್ನೇ ಗಾಳಿಗೆ ತೂರಿದೆ. ಜಾತಿ ಬೇಲಿಯನ್ನು ಕಿತ್ತೊಗೆಯುವಂತೆ ಡಾ. ರಾಮಮನೋಹರ ಲೋಹಿಯಾ ಅವರು ಹೇಳಿದ್ದರು. ಆದರೆ ಇಂದಿನ ಸಮಾಜವಾದಿ ಪಕ್ಷವು ಜಾತಿ ಜನಗಣತಿ ಪರವಾಗಿ ಬ್ಯಾಟಿಂಗ್ ಮಾಡುತ್ತಿದೆ. 2025ರೊಳಗೆ ಜಾತಿ ಜನಗಣತಿ ಪೂರ್ಣಗೊಳಿಸುವುದಾಗಿ ವಾಗ್ದಾನ ಮಾಡಿದೆ’ ಎಂದು ನೀರಜ್ ಆರೋಪಿಸಿದ್ದಾರೆ.

2014ರಲ್ಲಿ ನೀರಜ್ ಶೇಖರ್ ಅವರು ಬಲಿಯಾ ಕ್ಷೇತ್ರದಿಂದ ಸ್ಪರ್ಧಿಸಿದ್ದರು. ಆದರೆ ಬಿಜೆಪಿಯ ಭಾರತ್ ಸಿಂಗ್ ವಿರುದ್ಧ ಪರಾಭವಗೊಂಡಿದ್ದರು. ನಂತರ ಬಂದ ಚುನಾವಣೆಯಲ್ಲಿ ಸಮಾಜವಾದಿ ಪಕ್ಷದಿಂದ ಅವರಿಗೆ ಟಿಕೆಟ್ ನಿರಾಕರಿಸಲಾಗಿತ್ತು.

‘ಚಂದ್ರಶೇಖರ್ ಕುಟುಂಬದ ಸಾಂಪ್ರದಾಯಿಕ ಕ್ಷೇತ್ರವಾದ ಬಲಿಯಾದಿಂದ ನನ್ನ ಸ್ಪರ್ಧೆಗೆ ಸಮಾಜವಾದಿ ಪಕ್ಷ ಟಿಕೆಟ್ ನಿರಾಕರಿಸಿದ್ದು ನನ್ನ ಜೀವನದ ಅತ್ಯಂತ ಕರಾಳ ದಿನ’ ಎಂದು ನೀರಜ್ ಹೇಳಿದ್ದರು. ಆದರೆ ಅದೇ ಸಮಾಜವಾದಿ ಪಾರ್ಟಿಯು ನೀರಜ್ ಅವರನ್ನು ರಾಜ್ಯಸಭೆಗೆ ಆಯ್ಕೆ ಮಾಡಿ ಕಳುಹಿಸಿತು. 2019ರಲ್ಲಿ ಅವರು ಪಕ್ಷ ತೊರೆದು, ಬಿಜೆಪಿ ಸೇರಿದರು.

ಬಲಿಯಾ ಕ್ಷೇತ್ರದಿಂದ ಈ ಮೊದಲು ಭರತ್ ಸಿಂಗ್ ಅವರು ಬಿಜೆಪಿಯಿಂದ ಸ್ಪರ್ಧಿಸಿ ಸಂಸರಾಗಿದ್ದರು. ಅವರ ನಂತರದಲ್ಲಿ ಇದೇ ಕ್ಷೇತ್ರಕ್ಕೆ ವೀರೇಂದ್ರ ಸಿಂಗ್ ಮಸ್ತ್ ಅವರಿಗೆ ಪಕ್ಷ ಟಿಕೆಟ್ ನೀಡಿತ್ತು. ಈ ಬಾರಿ ನೀರಜ್ ಶೇಖರ್ ಅವರನ್ನು ಬಿಜೆಪಿ ಕಣಕ್ಕಿಳಿಸಿದೆ.

1968ರ ನ. 10ರಂದು ಜನಿಸಿದ ನೀರಜ್ ಶೇಖರ್ ಅವರು ತಂದೆ ಚಂದ್ರಶೇಖರ್ ಅವರ ನಿಧನದ ನಂತರ ರಾಜಕೀಯ ಪ್ರವೇಶಿಸಿದರು. 2007ರಲ್ಲಿ ಸಮಾಜವಾದಿ ಪಕ್ಷದಿಂದ ಸ್ಪರ್ಧಿಸಿದ್ದರು. ಚಂದ್ರಶೇಖರ್ ಅವರು 1962ರಿಂದ 1977ರವರೆಗೆ ರಾಜ್ಯಸಭಾ ಸದಸ್ಯರಾಗಿದ್ದರು. 1977ರಲ್ಲಿ ಅವರು ಬಲಿಯಾ ಕ್ಷೇತ್ರವನ್ನು ಪ್ರತಿನಿಧಿಸಿದ್ದರು. 1997ರ ಜುಲೈ 8ರಂದು ನಿಧನರಾದರು.

ಇಂದಿರಾ ಗಾಂಧಿ ಹತ್ಯೆಯ ನಂತರ ಸಿಖ್ ವಿರುದ್ಧ ಬುಗಿಲೆದ್ದ ಆಕ್ರೋಶದಿಂದಾಗಿ ಚಂದ್ರಶೇಖರ್ ಅವರು 1984ರಲ್ಲಿ ಪರಾಭವಗೊಂಡಿದ್ದರು. 1989ರಲ್ಲಿ ಬಲಿಯಾ ಮತ್ತು ಬಿಹಾರದ ಮಹಾರಾಜಗಂಜ್ ಎರಡೂ ಕ್ಷೇತ್ರಗಳಿಂದ ಸ್ಪರ್ಧಿಸಿ, ಎರಡರಲ್ಲೂ ಗೆಲುವು ದಾಖಲಿಸಿದ್ದರು. ಮಹಾರಾಜಗಂಜ್ ಕ್ಷೇತ್ರವನ್ನು ನಂತರ ಬಿಟ್ಟುಕೊಟ್ಟರು.

2024ರಲ್ಲಿ ನಡೆಯುತ್ತಿರುವ ಲೋಕಸಭಾ ಚುನಾವಣೆಯಲ್ಲಿ ಬಲಿಯಾ ಕ್ಷೇತ್ರಕ್ಕೆ 7ನೇ ಹಂತದಲ್ಲಿ (ಜೂನ್ 1ರಂದು) ಮತದಾನ ನಡೆಯಲಿದೆ. ಈ ಕ್ಷೇತ್ರಕ್ಕೆ ನೀರಜ್ ಅವರನ್ನು ಬಿಜೆಪಿ ಕಣಕ್ಕಿಳಿಸಿದೆ. ಆದರೆ ಬಹುಜನ ಸಮಾಜ ಪಕ್ಷ ಮತ್ತು ಸಮಾಜವಾದಿ ಪಕ್ಷಗಳು ಈವರೆಗೂ ಅಭ್ಯರ್ಥಿಯನ್ನು ಅಂತಿಮಗೊಳಿಸಿಲ್ಲ.